¶ 1 BEA i he ene jio e Atalia koe fa‘e a Ahasia kuo mate a ene tama, naa ne tuu hake mo ne fakaauha ae hako kotoabe oe hau.

2 Ka ko Jihosiba koe ofefine oe tu‘i ko Jolami, koe tuofefine o Ahasia, nae ave a Joasa koe foha o Ahasia, mo ne ave fufu ia mei he lotolotoga oe gaahi foha oe tu‘i aia nae tamate‘i; bea naa nau fufu ia mei a Atalia, io aia mo ene fefine tauhi, i he fale mohe, bea koia nae ikai tamate‘i ai ia.

3 Bea nae fufu akinaua i he fale o Jihova i he ta‘u e ono. Bea nae bule a Atalia ki he fonua.

¶ 4 Bea i hono fitu oe ta‘u nae fekau e Jihoiata mo ne omi ae gaahi eiki nae bule ki he taki toko teau, moe gaahi eiki tau moe kau leo, o ne omi akinautolu kiate ia ki he fale o Jihova, bea naa ne fai fuakava mo kinautolu, baa naa ne ma‘u e nau lea fuakava i he fale o Jihova, mo ne fakaha kiate kinautolu ae foha oe tu‘i.

5 Bea naa ne fekau kiate kinautolu, o behe, Koeni ae mea te mou fai;  e vahe tolu akimoutolu oku huage i he aho tabu, bea ko ho mou vahe e taha e tauhi mo leohi ae fale oe tu‘i;

6 Bea ko ho mou vahe e taha e i he mataba o Suli; bea koe vahe e taha i he mataba ki mui i he kau leo: e behe be a hoo mou leohi ae fale ke oua naa maumau‘i ia.

7 Bea ko hono vahe ua okimoutolu kotoabe oku alu kitua i he aho tabu, e anautolu ae tauhi moe leohi ae fale o Jihova o takatakai i he tu‘i.

8 Bea te mou nofo takatakai i he tu‘i, bea too e he tagata taki taha a hono mahafu i hono nima: bea iloga ha taha e laka atu ki loto, tuku ke tamate‘i ia: bea te mou i he tu‘i i he ene alu kitua mo ene hu mai.

9 Baa nae fai e he gaahi eiki oe gaahi toko teau, o hage koia kotoabe nae fekau e Jihoiata koe taulaeiki: bea naa nau ave taki taha a ene kau tagata aia nae vahe ke hu mai i he aho tabu, bea mo kinautolu nae vahe ke alu kitua i he aho tabu, o nau omi kia Jihoiata koe taulaeiki.

10 Bea nae foaki e he taulaeiki ki he gaahi eiki oe gaahi toko teau, ae gaahi tao moe gaahi ba a Tevita koe tu‘i, aia nae tuku i he fale o Jihova.

11 Bea nae tutuu ae kau leo, koe tagata taki taha mo ene mahafu i hono nima, o takatakai i he tu‘i, mei he tuliki fakatoomatau oe fale tabu o fai hake ki he tuliki fakatoohema oe fale tabu, o vaofi moe feilaulauaga bea moe fale tabu.

12 Bea naa ne omi kitua ae foha oe tu‘i, o ne ai ae tatā fakatu‘i kiate ia, mo ne atu kiate ia ae tohi oe fono; bea naa nau fakanofo ia koe tu‘i, mo nau bani ia aki ae lolo; bea naa nau baji nima, o nau behe, Ke moui be ae tu‘i.

¶ 13 Bea i he ene fanogo e Atalia ki he logoaa oe kau leo bea moe kakai, naa ne ha‘u ki he kakai i he loto fale tabu o Jihova.

14 Bea i he ene jio, vakai, nae tuu ae tu‘i i he veebou, o hage ko hono aga, bea tutuu fakataha moe tu‘i ae houeiki bea moe kau tagata ifi mealea, bea nae fiefia ae kakai kotoabe oe fonua, bea naa nau ifi ae gaahi mealea: bea nae haehae e Atalia a hono gaahi kofu, bea ne kalaga, Koe laba, koe laba.

15 Ka nae fekau e Jihoiata koe taulaeiki ki he gaahi eiki oe gaahi toko teau, koe houeiki ki he kau tau, mo ne behe kiate kinautolu, Mou ave ia kituaa: bea koia oku muimui iate ia tuku ke tamate‘i ia aki ae heleta. He kuo behe e he taulaeiki, Ke oua naa tamate‘i ia i he fale o Jihova.

16 Bea naa nau buke nima ia; bea naa ne alu i he hala koia nae faa hu ai ae faga hose ki he nofoaga oe tu‘i: bea nae tamate‘i ia i ai.

¶ 17 Bea nae fokotuu e Jihoiata na fuakava ia Jihova bea moe tu‘i bea moe kakai, ke nau hoko koe kakai a Jihova akinautolu; bea i he tu‘i foki moe kakai.

18 Bea nae hu atu ae kakai kotoabe oe fonua ki he fale o Beali, bea  naa nau maumau hifo ia; a hono gaahi feilaulauaga bea mo hono gaahi mea fakatātā naa nau laiki ke oji, bea nae tamate‘i a Matani koe taulaeiki a Beali i he mua feilaulauaga. Bea nae fakanofo e he taulaeiki ae kau matābule ki he fale o Jihova.

19 Bea naa ne omi ae gaahi eiki oe gaahi toko teau, moe gaahi eiki tau, moe kau leo, bea moe kakai kotoabe oe fonua; bea naa nau o hifo ae tu‘i mei he fale o Jihova, bea naa nau ha‘u ki he fale oe tu‘i i he hala moe mataba oe kau leo. Bea naa ne nofo ki he nofoa fakatu‘i oe gaahi tu‘i.

20 Bea nae fakafiefia ae kakai kotoabe oe fonua, bea nae nofo lelei be ae kolo: bea naa nau tamate‘i a Atalia aki ae heleta o ofi ki he fale oe tu‘i.

21 Bea nae fitu ta‘u e motua o Jihoasa i he ene kamata bule aana.