¶ 1 I HE ta‘u e uofulu ma fitu o Jeloboami koe tu‘i o Isileli, nae kamata bule ki Juta a Asalia koe foha o Amasia.

2 Nae hogofulu ma ono ta‘u ene motua i he ene hoko ki he bule, bea nae bule ia i he ta‘u e nimagofulu ma ua i Jelusalema. Bea koe higoa o ene fa‘e ko Jekolia o Jelusalema.

3 Bea nae fai lelei ia i he ao o Jihova; o fakatatau ki he mea kotoabe nae fai e he ene tamai ko Amasia;

4 Ka koe gaahi botu maoluga nae ikai liaki: nae feilaulau mo tutu ae mea namu kakala e he kakai i he gaahi botu maoluga.

¶ 5 Bea nae ta‘i e Jihova ae tu‘i, bea naa ne kilia ai o a‘u ki he aho o ene mate; bea naa ne nofo i he fale mavahe. Bea nae bule a Jotami koe foha oe tu‘i ki he fale, bea nae fakamāu eia ae kakai oe fonua.

6 Bea ko hono toe oe gaahi gaue a Asalia mo ia kotoabe naa ne fai, ikai oku tohi ia i he tohi fakamatala ki he gaahi tu‘i o Juta?

7 Koia, nae mohe a Asalia mo ene gaahi tamai; bea naa nau tanu ia mo ene gaahi tamai i he kolo o Tevita: bea nae fetogi ia i he bule e Jotami ko hono foha.

¶ 8 I hono tolugofulu ma valu oe ta‘u o Asalia koe tu‘i o Juta, nae bule a Sakalia koe foha o Jeloboami ki Isileli i Samelia i he mahina e ono.

9 Bea nae fai eia aia nae kovi i he ao o Jihova, o hage koia nae fai e he ene gaahi tamai: nae ikai mahui ia mei he gaahi agahala a Jeloboami koe foha o Nibati, aia naa ne fakaagahala‘i a Isileli.

10 Bea nae labaji ia e Salumi koe foha o Jebesi, o ne ta‘i ia i he ao oe kakai, bea ne tamate‘i ia, bea naa ne fetogi ia i he bule.

11 Bea ko hono toe oe gaahi gaue a Sakalia, vakai, kuo tohi ia i he tohi fakamatala ki he gaahi tu‘i o Isileli.

12 Koe folofola eni a Jihova aia nae folofola aki kia Jehu o behe, E nofo ho gaahi foha ki he nofoa fakatu‘i o Isileli o a‘u ki hono fa oe toutagata. Bea nae hoko ia o behe be.

¶ 13 I hono tolugofulu ma hiva oe ta‘u o Usaia koe tu‘i o Juta, nae kamata bule a Salumi koe foha o Jebesi; bea nae bule ia i he mahina katoa e taha i Samelia.

14 He nae alu hake a Minehemi koe foha o Kati, mei Tilisa, bea ha‘u ia ki Samelia, o ne ta‘i a Salumi koe foha o Jebesi i Samelia, o ne tamate‘i ia, bea naa ne fetogi ia i he bule.

15 Ka ko hono toe oe gaahi gaue a Salumi, mo ene fai ae laba, vakai, kuo tohi ia i he tohi fakamatala ki he gaahi tu‘i o Isileli.

¶ 16 Bea nae toki ta‘i e Minehemi a Tifisa, mo ia kotoabe nae i ai, mo hono gaahi botu gataaga, o a‘u ki Tilisa: koe mea i he ikai te nau fakaava ia kiate ia, koia naa ne ta‘i ai ia; bea koe kau fefine feitama kotoabe nae i ai naa ne hae hake.

17 I hono tolugofulu ma hiva oe ta‘u o Asalia koe tu‘i o Juta nae kamata bule ki Isileli a Minehemi koe foha o Kati, bea nae bule ia i he ta‘u e hogofulu i Samelia.

18 Bea nae fai eia ae kovi i he ao o Jihova; i hono gaahi aho kotoabe nae ikai te ne liaki ae gaahi agahala a Jeloboami koe foha o Nibati, aia naa ne fakaagahala‘i a Isileli.

19 Bea nae ha‘u a Buli koe tu‘i o Asilia ke tau‘i ae fonua: bea nae atu e Minehemi kia Buli ae taleniti siliva e taha afe, koeuhi ke na kau taha ke fakatuu mau ae buleaga i hono nima.

20 Bea nae bule e Minehemi ke omi ae gaahi baaga mei Isileli, io mei he kau tagata ogoogo mo koloaia, i he tagata taki taha kotoabe koe sikeli siliva e nimagofulu, ke foaki ki he tu‘i o Asilia. Koia, nae toe alu ai ae tu‘i o Asilia, bea nae ikai nofo mau ia i he fonua.

¶ 21 Bea ko hono toe oe gaahi gaue a Minehemi, mo ia kotoabe naa ne fai, ikai oku tohi ia i he tohi fakamatala ki he gaahi tu‘i o Isileli?

22 Bea nae mohe a Minehemi mo ene gaahi tamai; bea nae fetogi ia i he bule e Bikaia ko hono foha.

¶ 23 I hono nimagofulu ta‘u o Asalia koe tu‘i o Juta nae kamata bule ki Isileli i Samelia a Bikaia koe foha o Minehemi bea nae bule ia i he ta‘u e ua.

24 Bea nae fai eia ae kovi i he ao o Jihova: nae ikai te ne liaki ae gaahi agahala a Jeloboami koe foha o Nibati, aia naa ne fakaagahala‘i a Isileli.

25 Ka nae teu laba kiate ia a Beka koe foha o Limalia ko ene eiki tau e taha aana, o ne ta‘i ia i Samelia, i he botu tabu oe fale oe tu‘i, fakataha mo Aakobi mo Eliia, bea moe kau tagata Kiliati e toko nimagofulu: bea naa ne tamate‘i ia, bea ne fetogi ia i he bule.

26 Bea ko hono toe oe gaahi gaue a Bikaia, mo ia kotoabe naa ne fai, vakai, kuo tohi ia i he tohi fakamatala ki he gaahi tu‘i o Isileli.

¶ 27 I hono nimagofulu ma ua oe ta‘u o Asalia koe tu‘i o Juta, nae kamata bule a Beka koe foha o Limalia ki Isileli i Samelia, bea nae bule ia i he ta‘u e uofulu.

28 Bea nae fai eia ae kovi i he ao o Jihova: nae ikai liaki eia ae gaahi agahala a Jeloboami koe foha o Nibati, aia naa ne fakaagahala‘i a Isileli.

29 Nae ha‘u a Tekilati‐bilesa koe tu‘i o Asilia, i he gaahi aho o Beka koe tu‘i o Isileli, o ne kabaji a Ijoni mo Ebeli‐bete‐meaka, mo Janoa, mo Ketesi, mo Hasoa, mo Kiliati, mo Kaleli, ae fonua kotoabe o Nafitali, bea nae fetuku bobula akinautolu ki Asilia.

30 Bea nae fai ae laba e Hosea koe foha o Ela kia Beka koe foha o Limalia, o ne ta‘i ia, bea ne tamate‘i ia, bea ne fetogi ia i he bule, i hono uofulu oe ta‘u o Jotami koe foha o Usia.

31 Bea ko hono toe oe gaahi gaue a Beka mo ia kotoabe naa ne fai, vakai, kuo tohi ia i he tohi fakamatala ki he gaahi tu‘i o Isileli.

¶ 32 I hono ua oe ta‘u o Beka koe foha o Limalia koe tu‘i o Isileli, nae kamata bule ki Juta a Jotami koe foha o Usia.

33 Nae uofulu ma nima ae ta‘u o ene motua i he ene kamata bule, bea nae bule ia i he ta‘u e hogofulu ma ono i Jelusalema. Bea koe higoa o ene fa‘e ko Jilusa, koe ofefine o Satoki.

34 Bea nae fai eia ae lelei i he ao o Jihova: nae fai ia o hage koia kotoabe nae fai e he ene tamai ko Usia.

35 Ka nae ikai jiaki ae gaahi botu maoluga: nae kei feilaulau mo tutu mea namu kakala e he kakai i he gaahi botu maoluga. Nae laga eia ae mataba maoluga oe fale o Jihova.

¶ 36 Bea ko hono toe oe gaahi gaue a Jotami, mo ia kotoabe naa ne fai, ikai kuo tohi ia i he tohi fakamatala ki he gaahi tu‘i o Juta?

37 I he gaahi aho ko ia nae kamata ue‘i e Jihova a Lisini koe tu‘i o Silia, mo Beka koe foha o Limalia ke na tau‘i a Juta.

38 Bea nae mohe a Jotami mo ene gaahi tamai, bea nae tanu ia mo ene gaahi tamai i he kolo o Tevita, ko ene tamai: bea nae fetogi ia i he bule e hono foha ko Ahasi.