¶ 1 I HONO hogofulu ma ua oe ta‘u o Ahasi koe tu‘i o Juta nae kamata bule ki Isileli i Samelia a Hosea koe foha o Ela, i he ta‘u e hiva.

2 Bea naa ne fai kovi i he ao o Jihova, ka nae ikai ke hage ia koe gaahi tu‘i o Isileli aia nae i mua iate ia.

¶ 3 Nae ha‘u kiate ia a Salimanesa koe tu‘i o Asilia ko hono tau‘i; bea nae fakatokalalo kiate ia a Hosea, bea naa ne foaki ae gaahi mea ofa kiate ia.

4 Bea nae ilo e he tu‘i o Asilia ae teu laba e Hosea: he kuo fekau atu eia ae kau talafekau kia So koe tu‘i o Ijibite, bea nae ikai omi ae mea ofa ki he tu‘i o Asilia, o hage koia naa ne faa fai i he ta‘u kotoabe; koia nae fakahu ia e he tu‘i o Asilia ki he fale bobula, mo ne ha‘i ia i he fale bobula.

5 Bea nae alu hake ai ae tu‘i o Asilia ki he botu kotoabe oe fonua, mo ne alu hake ki Samelia, mo ne kabui ia aki ae tau i he ta‘u e tolu.

6 Bea i hono hiva oe ta‘u o Hosea nae lava‘i a Samelia e he tu‘i o Asilia, bea naa ne ave ae kakai Isileli ki Asilia, mo ne tuku akinautolu i Hala bea i Haboa ki he vaitafe o Kosani, bea i he gaahi kolo ae kakai Mitia.

¶ 7 He nae behe, kuo fai agahala e he fānau a Isileli kia Jihova ko ho nau Otua, aia naa ne omi akinautolu mei he fonua ko Ijibite, mei he lalo nima o Felo koe tu‘i o Ijibite, bea kuo nau manavahe ki he gaahi otua kehe.

8 Bea kuo nau aeva i he gaahi fekau ae kakai hiteni, akinautolu nae kabuji atu e Jihova mei he ao oe fānau a Isileli, bea moe gaahi tu‘i o Isileli naa nau fakanofo.

9 Bea nae fai fakafufu e he fānau a Isileli ae gaahi mea nae ikai totonu kia Jihova ko ho nau Otua, bea naa nau laga mo onautolu ae gaahi botu maoluga i ho nau gaahi kolo kotoabe, mei he foi fale maoluga oe kau leo o fai hake ki he kolo nae faka a.

10 Bea naa nau fokotuu ma anautolu ae gaahi tamabua, moe gaahi vao tabu i he tafugofuga maoluga kotoabe, bea i he lolo akau mata kotoabe:

11 Bea naa nau tutu ae mea namu kakala i he botu maoluga kotoabe, o hage koe hiteni aia nae fakaauha atu mei ho nau ao e Jihova; bea naa nau fai ae gaahi mea kovi ke fakatubu ae houhau o Jihova:

12 He naa nau tauhi ki he gaahi tamabua, aia nae behe ai e Jihova kiate kinautolu, E ikai te mou fai ae mea ni.

13 Ka nae valokiekina e Jihova ki Isileli bea ki Juta i he ene kau balofita kotoabe moe kau kikite kotoabe, o behe, Ke tafoki akimoutolu mei ho mou gaahi hala kovi, bea tauhi ki he eku gaahi fekau mo eku gaahi tuutuuni o fakatatau moe fono kotoabe koia aia naaku fekau ki hoo mou gaahi tamai, beau fekau‘i kiate kimoutolu i he eku kau tamaioeiki koe kau balofita.

14 Ka ne ogo ia nae ikai te nau fie ogo‘i, ka naa nau fakakekeva a ho nau kia, o hage koe kia oe nau gaahi tamai, akinautolu nae ikai tui kia Jihova ko ho nau Otua.

15 Bea naa nau jiaki a ene gaahi tuutuuni, bea mo ene fuakava aia naa ne fai moe nau gaahi tamai, mo ene gaahi fakamooni naa ne fakamooni aki kiate kinautolu; bea naa nau muimui ki he vaiga, bea naa nau hoko o vaiga, mo nau muimui ki he kakai hiteni nae nofo takatakai iate kinautolu, aia nae fekau ai e Jihova kiate kinautolu, ke oua naa nau fai o hage ko kinautolu.

16 Bea naa nau jiaki ae gaahi fekau kotoabe o Jihova ko ho nau Otua, bea naa nau gaohi ma anautolu ae gaahi mea fakatātā nae haka, io ae uhiki bulu e ua, mo nau gaohi ha vao tabu, mo nau lotu ki he nāunāu kotoabe oe lagi, mo nau tauhi kia Beali.

17 Bea naa nau bule ki ho nau gaahi foha mo ho nau gaahi ofefine ke nau alu atu i he lotolotoga oe afi, bea naa nau fai fakatevolo mo nau fai ae sausau, bea naa nau fakatau atu akinautolu ke fai ae kovi i he ao o Jihova, ke fakatubu ai a hono houhau.

18 Koia nae houhau lahi ai a Jihova ki Isileli, mo ne fetuku atu akinautolu mei hono ao: nae ikai tuku ha taha ka koe faahiga be taha o Juta.

19 Bea naa mo Juta nae ikai tauhi eia ae gaahi fekau a Jihova ko ho nau Otua, ka naa nau alu i he gaahi tuutuuni o Isileli aia naa nau fokotuu ekinautolu.

20 Bea nae jiaki e Jihova ae hako kotoabe o Isileli, mo ne fakamamahi akinautolu, mo ne tukuage akinautolu ki he nima oe kau maumau, kae oua ke oji a ene liaki akinautolu mei hono ao.

21 He naa ne haea mai a Isileli mei he fale o Tevita; bea naa nau fakanofo ke tu‘i a Jeloboami koe foha o Nibati: bea nae teketeke‘i a Isileli e Jeloboami mei he muimui kia Jihova, bea naa ne fakaagahala‘i akinautolu i he agahala lahi.

22 He nae aeva ae fānau a Isileli i he gaahi agahala kotoabe a Jeloboami aia naa ne fai; nae ikai mahui akinautolu mei ai;

23 Bea nae hiki atu a Isileli e Jihova mei hono ao, o hage koe folofola naa ne fai i he ene kau tamaioeiki koe kau balofita kotoabe. Koia nae fetuku atu ai a Isileli mei ho nau fonua onautolu ki Asilia o a‘u mai ki he aho ni.

¶ 24 Bea nae omi e he tu‘i o Asilia ae kakai mei Babilone, bea mei Kuta, bea mei Ava, bea mei Hemati, bea mei Sifaveimi, mo ne tuku akinautolu i he gaahi kolo o Samelia, koe fetogi oe fānau a Isileli: bea naa nau ma‘u a Samelia, mo nofo i hono gaahi kolo oia.

25 Bea i he kamataaga oe nau nofo i ai, nae ikai te nau manavahe kia Jihova: bea koia nae tuku atu ai e Jihova ae faga laione kiate kinautolu, bea nae mate ai a ho nau niihi.

26 Koia naa nau lea ai ki he tu‘i o Asilia, o behe, Oku ikai ilo ae aga oe Otua oe fonua e he gaahi buleaga kuo ke hiki mo tuku ki he gaahi kolo o Samelia: koia kuo ne fekau atu ae faga laione kiate kinautolu, bea vakai, oku nau tamate‘i akinautolu, koeuhi oku ikai ke ilo ekinautolu ae aga oe Otua oe fonua.

27 Bea nae toki fekau ai e he tu‘i o Asilia, o behe, Ave ki ai ha toko taha i he kau taulaeiki aia naa mou omi mei ai; bea tuku ke nau alu o nofo i ai, bea tuku ke ne ako‘i akinautolu i he aga oe Otua oe fonua.

28 Bea nae toki ha‘u ai ha toko taha i he kau taulaeiki aia naa nau ave mei Samelia o ne nofo i Beteli, bea naa ne akonaki‘i akinautolu ke nau manavahe kia Jihova.

29 Ka nae fokotuu e he gaahi buleaga taki taha a hono gaahi otua onautolu, mo nau ai akinautolu ki he gaahi fale oe gaahi botu maoluga aia nae gaohi e he kakai Samelia, koe taki taha ae buleaga i he gaahi kolo naa nau nofo ki ai.

30 Bea nae fokotuu e he kakai o Babilone a Sukote‐binoti, bea a he kakai o Kuta nae fokotuu a Nelikali, bea e he kakai o Hemati nae fokotuu a Asima,

31 Bea e he kakai Avi nae fokotuu a Nibasi mo Talitaki, bea e he kakai Sifaveimi nae tutu e nau fānau i he afi kia Atilameleki mo Anameleki, koe gaahi otua o Sifaveimi.

32 Koia naa nau manavahe kia Jihova, bea naa nau gaohi kiate kinautolu mei he kakai meavale aubito iate kinautolu ae kau taulaeiki ki he gaahi botu maoluga, bea naa nau fai feilaulau ekinautolu i he gaahi fale oe gaahi botu maoluga ma anautolu.

33 Naa nau manavahe kia Jihova, kae tauhi be ki ho nau gaahi otua onautolu, o hage koe aga oe gaahi buleaga naa nau ave bobula mei ai.

34 Oku nau fai ki he e nau aga i mua o a‘u mai ki he aho ni: oku ikai te nau manavahe kia Jihova, bea oku ikai fai ekinautolu ke tatau moe nau gaahi tuu tuuni, be koe nau gaahi fekau, be hage koe fono moe fekau aia nae fekau e Jihova ki he fānau a Jekobe, aia naa ne fakahigoa ko Isileli;

35 Aia nae fai e Jihova moia ha fuakava, bea naa ne valoki akinautolu, o behe, E ikai te mou manavahe ki he gaahi otua kehe, be fakatomabee akimoutolu kiate kinautolu, be tauhi ki ai, be feilaulau kiate kinautolu:

36 Ka ko Jihova aia nae omi akimoutolu mei he fonua ko Ijibite i he malohi lahi, moe nima nae mafao atu, koia ia te mou manavahe ki ai, bea koia ia te mou lotu ki ai, bea koia ia te mou fai ki ai ae feilaulau.

37 Bea koe gaahi tuutuuni, moe gaahi fakamāu, bea moe fono, moe fekau, aia naa ne tohi ma amoutolu, te mou tokaga ke fai ia olauikuoga; bea e ikai te mou manavahe ki ha gaahi otua kehe.

38 Bea koe fuakava aia kuou fai mo kimoutolu, e ikai te mou fakagalo‘i; bea e ikai foki te mou manavahe ki he gaahi otua kehe.

39 Ka te mou manavahe kia Jihova ko ho mou Otua; bea te ne fakamoui akimoutolu mei he nima o ho mou gaahi fili kotoabe.

40 Ka nae ikai te nau fanogo, bea naa nau fai be o hage koe nau muaki aga.

41 Koia, nae manavahe ae gaahi buleaga koia kia Jihova, ka naa nau tauhi ki he gaahi mea fakatātā nae togi, ae nau fānau moe fānau oe nau fānau: o hage koia nae fai e he e nau gaahi tamai, kuo behe be e nau fai ekinautolu o a‘u mai ki he aho ni.