Ko Hono Ua oe Tohi oe Gaahi Tu‘i

¶ 1 I HE hili ae bekia a Ehabi, nae agatuu a Moabe ki Isileli.

2 Bea nae to hifo a Ahasia mei he katuba i hono botu fale ki oluga aia nae i Samelia, bea ne mahakiia ai: bea naa ne kouna atu ha kau talafekau, o ne behe kiate kinautolu, Mou alu o fakafehui kia Beali‐sebubi koe otua o Ekiloni, bea teu moui mei he mahaki ni be ikai.

3 Ka nae behe e he agelo o Jihova kia Ilaija koe tagata Tisiba, Tuu hake, mo ke alu hake ke fetaulaki moe kau talafekau oe tu‘i o Samelia, bea ke behe kiate kinautolu, Oku ikai ha Otua i Isileli, oku mou alu ai ke fehui kia Beali‐sebubi koe otua o Ekiloni?

4 Koia foki oku behe ai e Jihova, E ikai te ke alu hifo mei he mohega kuo ke alu hake ki ai, ka te ke mate mooni. Bea nae alu a Ilaija.

¶ 5 Bea i he liliu atu kiate ia ae kau talafekau, naa ne behe kiate kinautolu, Koeha eni kuo mou foki ai?

6 Bea naa nau behe kiate ia, Nae ai ha tagata nae fakafetaulaki mai kiate kimautolu bea naa ne behe kiate kimautolu, Mou alu, o toe foki atu ki he tu‘i aia naa ne fekau‘i akimoutolu, bea tala kiate ia, Oku behe e Jihova, Oku ikai abe ha Otua i Isileli kuo ke fekau ai ke fehui kia Beali‐sebubi koe otua o Ekiloni? koia e ikai te ke alu hifo mei he mohega kuo ke alu hake ki ai, ka te ke mate mooni.

7 Bea naa ne behe kiate kinautolu, Nae matamata fefe ae tagata aia naa ne fakafetaulaki mai kiate kimoutolu, mo ne lea aki ae gaahi lea ni kiate kimoutolu?

8 Bea naa nau beheage, Koe tagata fulufulu ia, bea nae nonoo aki ae nootaga kili‘i manu i hono kogaloto. Bea nae behe eia, Ta ko Ilaija koe tagata Tisiba.

9 Bea nae toki fekau atu kiate ia e he tu‘i ha eiki nae bule ki he toko nimagofulu mo ene toko nimagofulu. Bea naa ne alu hake kiate ia: bea vakai, naa ne nofo i he tumutumu o ha mouga. Bea naa ne behe kiate ia, Akoe koe tāgata oe Otua, kuo behe e he tu‘i, Ke ke alu hifo.

10 Bea nae tali e Ilaija o beheage ki he eiki oe toko nimagofulu, Kabau koe tagata oe Otua au, tuku ke to hifo ha afi mei he lagi, ke auha ai koe mo hoo toko nimagofulu. Bea nae to hifo ae afi mei he lagi, bea ne fakaauha ia bea mo ene toko nimagofulu.

11 Bea naa ne toe fekau atu kiate ia ha eiki kehe e toko taha mo ene toko nimagofulu Bea naa ne beheage kiate ia, E tagata oe Otua, kuo behe mai e he tu‘i, Ke ke alu hifo ke vave.

12 Bea nae tali e Ilaija o beheage kiate kinautolu, Kabau koe tagata oe Otua au, tuku ke to hifo ha afi mei he lagi, ke auha ai koe moo hoo toko nimagofulu. Bea nae to hifo ae afi mei he Otua mei he lagi, bea ne fakaauha ia bea mo ene toko nimagofulu.

13 Bea naa ne toe fekau atu ha eiki mo hono tolu oe toko nimagofulu, aia mo ene toko nimagofulu. Bea nae alu hake a hono toko tolu oe eiki  nae bule ki he toko nimagofulu, bea naa ne hokoage mo ne to o tuulutui i he ao o Ilaija, mo ne kole kiate ia, o ne behe ki ai, E tagata oe Otua, oku ou kole kiate koe, tuku ke mahuiga i ho ao a eku moui, bea moe moui a hoo kau tamaioeiki ni e toko nimagofulu.

14 Vakai, nae alu hifo mei he lagi ae afi, bea vela ai o oji ae ogo eiki oe gaahi muaki toko nimagofulu, bea moe na toko nimagofulu: koia tuku eni ke mahuiga a eku moui i ho ao.

15 Bea nae behe e he agelo o Jihova kia Ilaija, Ke ke alu hifo moia: oua naa ke manavahe kiate ia. Bea naa ne tuu hake, mo ne alu hifo mo ia ki he tu‘i.

16 Bea naa ne behe kiate ia, Oku behe e Jihova, Koeuhi kuo ke fekau atu ha kau talafekau ke fakafehui kia Beali‐sebubi koe otua o Ekiloni, koe mea abe i he ikai ha Otua i Isileli ke ke fakaogo ki he ene folofola? koia e ikai ai te ke toe alu hifo mei he mohega na aia kuo ke alu hake ki ai, ka te ke mate mooni.

¶ 17 Koia, nae mate ia o fakatatau moe folofola a Jihova, aia nae lea aki e Ilaija. Bea nae fetogi ia i he bule e Jiholami i hono ua oe ta‘u o Jiholami koe foha o Jihosafate koe tu‘i o Juta; koeuhi nae ikai hano foha.

18 Bea koeni, koe toe oe gaahi gaue a Ahasia aia naa ne fai, ikai kuo tohi ia i he tohi fakamatala ki he gaahi tu‘i o Isileli?