¶ 1 BEA nae mahaki a Hesekaia i he gaahi aho koia o teitei mate. Bea nae ha‘u kiate ia ae balofita ko Isaia koe foha o Amosi, o ne behe kiate ia, Oku behe e Jihova, Teuteu ke lelei ho fale: he te ke mate, bea ikai moui.

2 Bea nae toki tafoki ai eia hono mata ki he holiji, bea ne lotu eia kia Jihova, o behe,

3 Oku ou kole kiate koe e Jihova, ke ke manatu eni a eku alu i ho ao i he mooni bea moe loto agatotonu, bea kuou fai aia oku lelei i ho ao. Bea nae tagi mamahi a Hesekaia.

4 Bea nae hoko o behe, i he teeki alu a Isaia ki he loto kolo, mo ene ha‘u kiate ia ae folofola a Jihova, o behe,

5 Foki atu, bea tala kia Hesekaia koe eiki a hoku kakai, Oku behe e Jihova, koe Otua o Tevita ko hoo tamai, Kuou ogo‘i hoo lotu, kuou mamata ki ho gaahi loimata: vakai, teu fakamoui koe: i hono tolu oe aho te ke alu hake ki he fale o Jihova.

6 Bea teu fakatolotologa a hoo gaahi aho i he ta‘u e hogofulu ma nima; bea teu fakamoui koe moe kolo ni mei he nima oe tu‘i o Asilia; bea teu malu‘i ae kolo ni koeuhi ko au, bea koeuhi ko Tevita ko eku tamaioeiki.

7 Bea nae behe e Isaia, Too mai ha takaoga fiki. Bea naa nau ave o ai ia ki he kiatolo, bea naa ne moui ai.

¶ 8 Bea nae behe e Hesekaia kia Isaia, Koeha hono fakailoga oe fakamoui au, bea ki he eku alu hake ki he fale o Jihova i hono tolu oe aho?

9 Bea nae behe e Isaia, Ke ke ma‘u ae fakailoga koeni mei a Jihova, ki he ene fai mooni e Jihova ae mea ni aia kuo ne folofola ai: e fefe, e hiki ki mua ae ata i he tikeli e hogofulu, be te ne foki ki mui i he tikeli e hogofulu?

10 Bea nae beheage e Hesekaia, Koeni koe mea maamaa ke alu hifo ae ata i he tikeli e hogofulu: oua naa behe, kae tuku ke foki ki mui ae ata i he tikeli e hogofulu.

11 Bea tagi ae balofita ko Isaia kia Jihova: bea naa ne fakafoki ki mui ae ata i he tikeli e hogofulu, aia nae alu hifo ai ia i he mea a Ahasi aia nae fakailoga ai ae gaahi feituulaa.

¶ 12 I he kuoga koia nae fekau e Belotakibalatani, koe foha o Balatani, koe tu‘i o Babilone, ae gaahi tohi moe mea ofa kia Hesekaia: he nae fanogo ia kuo mahaki a Hesekaia.

13 Bea nae tokaga a Hesekaia kiate kinautolu, o ne fakaha kiate kinautolu ae fale kotoa o ene gaahi mea maogooga, koe siliva, moe koula, moe gaahi mea nanamu moe lolo maogooga, moe fale o ene mahafu tau, moia kotoabe nae ilo i hono fale koloa: nae ikai ha mea i hono fale, mo hono buleaga katoa nae tae fakaha e Hesekaia, kiate kinautolu.

¶ 14 Bea nae toki ha‘u ai a Isaia koe balofita ki he tu‘i ko Hesekaia, o ne behe kiate ia, Koeha ae lea nae fai e he kau tagata na? bea naa nau ha‘u meife kiate koe? Bea nae behe e Hesekaia. Kuo nau ha‘u mei he fonua mamao, io, mei Babilone.

15 Bea nae behe eia, Koeha kuo nau mamata ki ai i ho fale? Bea nae behe e Hesekaia, Ae mea kotoabe oku i hoku fale kuo nau mamata ki ai: oku ikai ha mea i hoku gaahi koloa nae ikai teu fakaha kiate kinautolu.

16 Bea behe e Isaia kia Hesekaia, Fanogo ki he folofola a Jihova.

17 Vakai, oku ha‘u ae gaahi aho, e fetuku ai ki Babilone aia kotoabe oku i ho fale, moia kotoabe nae tanaki e hoo gaahi tamai o a‘u ki he aho ni: oku behe e Jihova, E ikai ha mea e toe.

18 Bea koeuhi i ho gaahi foha e tubu iate koe, aia e fanau kiate koe, te nau ave ke mamao; bea te nau nofo koe kau talifekau i he fale oe tu‘i o Babilone.

19 Bea nae behe ai e Hesekaia kia Isaia, Oku lelei ae folofola a Jihova aia kuo ke lea aki. Bea behe eia, Ikai oku lelei, o kabau e ai ae melino moe mooni i hoku gaahi aho ooku?

20 Bea ko hono toe oe gaahi gaue a Hesekaia, mo ene malohi kotoabe, bea mo ene gaohi ae tukuga vai, moe tafeaga vai, mo ene omi ae vai ki he kolo, ikai kuo tohi ia i he tohi fakamatala ki he gaahi tu‘i o Juta?

21 Bea nae mohe a Hesekaia mo ene gaahi tamai: bea nae fetogi ia i he bule e hono foha ko Manase.