¶ 1 NAE valu ta‘u ae motua o Josaia i he ene kamata ene bule, bea nae bule ia i he ta‘u e tolugofulu ma taha i Jelusalema. Bea koe higoa o ene fa‘e ko Jitita, koe ofefine o Ataaia o Bosi-kate.

2 Bea nae fai lelei ia i he ao o Jihova, bea naa ne alu i he gaahi hala kotoabe o Tevita ko ene tamai, bea nae ikai tafoki ia mei ai ki he nima toomatau be ki he toohema.

¶ 3 Bea i hono hogofulu ma valu oe ta‘u oe tu‘i ko Josaia, nae fekau ai e he tu‘i a Safani koe foha o Asalia, koe foha o Mesulami, koe tagata tohi, ki ke fale o Jihova o behe,

4 Alu hake kia Hilikia koe taulaeiki lahi, koeuhi ke ne lau ae siliva aia kuo omi ki he fale o Jihova, aia kuo tanaki e he kau leo mataba mei he kakai:

5 Bea tuku ke nau atu ia ki he nima o kinautolu oku fai ae gaue, akinautolu oku ekinaki i he tauhi fale o Jihova: bea tuku ke nau atu ia ki he kau gaue oku gaue i he fale o Jihova, ke nau gaohi ke lelei ae gaahi botu maumau oe fale,

6 Ki he kau tufuga akau, moe kau laga fale, moe kau tufuga maka, bea ke fakatau ae gaahi akau, moe gaahi maka kuo tātā ke gaohi aki ae fale.

7 Ka nae ikai ha eke e fai kiate kinautolu i he gaahi baaga nae atu ki ho nau nima, koeuhi naa nau fai agatonu be.

¶ 8 Bea nae behe e Hilikia koe taulaeiki lahi kia Safani koe tagata tohi, Kuou ilo ae tohi oe fono i he fale o Jihova. Bea nae atu e Hilikia ae tohi kia Safani, bea naa ne lau ia.

9 Bea nae ha‘u a Safani koe tagata tohi ki he tu‘i, bea ne toe omi ae lea ki he tu‘i, o behe, Kuo tanaki e hoo kau tamaioeiki ae gaahi baaga nae ilo i he fale, bea kuo atu ia ki he nima o kinautolu oku fai ae gaue, akinautolu oku ekinaki i he fale o Jihova.

10 Bea nae fakaha e Safani koe tagata tohi ki he tu‘i, o behe, Kuo tuku kiate au e Hilikia koe taulaeiki ha tohi. Bea nae lau ia e Safani i he ao oe tu‘i.

11 Bea i he fanogo ae tu‘i ki he gaahi lea i he tohi oe fono, naa ne haehae hono gaahi kofu.

12 Bea nae fekau e he tu‘i kia Hilikia koe taulaeiki, mo Ahikami koe foha o Safani, mo Akiboa koe foha o Mikaia, mo Safani koe tagata tohi, mo Asahia koe tamaioeiki ae tu‘i, o behe,

13 Mou alu, bea fehui kia Jihova koeuhi ko au, bea moe kakai, bea mo Juta, i he gaahi lea ae tohi kuo ilo ni: he kuo lahi ae houhau a Jihova aia kuo tubu kiate kitautolu, koe mea i he ikai tokaga ae tau gaahi tamai ki he gaahi lea oe tohi, ke fai o fakatatau ki he mea kotoabe kuo tohi kiate kitautolu.

14 Koia nae alu ai a Hilikia koe taulaeiki, mo Ahikami, mo Akiboa, mo Safani, mo Asahia kia Hulita koe fefine balofita, koe unoho o Salumi, koe foha o Tikiva, koe foha o Hahasi, koe tauhi oe fale tukuga kofu: (bea nae nofo ia i Jelusalema i he fale ako:) bea naa nau alea mo ia.

15 Bea nae behe eia kiate kinautolu, Oku behe e Jihova koe Otua o Isileli, Tala ki he tagata naa ne fekau‘i akimoutolu kiate au,

16 Oku behe mai e Jihova, Vakai teu omi ae kovi ki he botu ni, bea ki hono kakai, io, ae gaahi lea kotoabe ae tohi aia kuo lau e he tu‘i o Juta:

17 Koe mea i he e nau liaki au, bea kuo nau tutu ae mea namu kakala ki he gaahi otua kehe, koeuhi ke nau fakatubu eku houhau aki ae gaahi gaue kotoabe a ho nau nima: koia e tubu ai eku houhau ki he botu ni, bea e ikai fuifui‘i.

18 Ka te mou lea ki he tu‘i o Juta aia naa ne fekau‘i akimoutolu ke fehui kia Jihova, o behe, Oku behe mai e Jihova koe Otua o Isileli, Koe mea i he gaahi lea aia kuo ke ogo‘i:

19 Koeuhi nae ogogofua ho loto, bea kuo ke fakavaivai‘i koe i he ao o Jihova, i hoo fanogo aia naaku lea ki ai ki he botu ni, bea ki hono kakai, koeuhi ke nau hoko koe auhia, moe malaia, bea kuo ke haehae ho gaahi kofu, bea tagi i hoku ao; oku behe e Jihova, Kuou ogo‘i koe foki.

20 Koia, vakai, Teu fakataha koe mo hoo gaahi tamai, bea e tanaki koe ki ho tanuaga i he melino; bea e ikai mamata e ho mata ki he kovi kotoabe aia teu omi ki he botu ni. Bea naa nau toe omi moe lea ki he tu‘i.