¶ 1 I HONO gaahi aho oona nae alu hake ai a Nebukanesa koe tu‘i o Babilone, bea nae hoko a Jihoiakimi ko ene tamaioeiki i he ta‘u e tolu: bea hili ia naa ne toe agatuu kiate ia.

2 Bea nae fekau e Jihova kiate ia ae kau tau oe kakai Kalitia moe kau tau oe kakai Silia, moe kau tau oe kakai Moabe, moe kau tau oe fānau a Amoni, bea ne fekau‘i akinautolu ke tau‘i a Juta, ke fakaauha ia, o fakatatau ki he folofola a Jihova aia naa ne folofola ai i he ene kau tamaioeiki koe kau balofita.

3 Koe mooni nae hoko ae mea ni ki Juta i he fekau a Jihova, ke hiki akinautolu mei hono ao, koeuhi koe gaahi agahala a Manase, o fakatatau ki he mea kotoabe naa ne fai;

4 Bea koeuhi foki koe toto maonioni naa ne liligi: he naa ne fakabito a Jelusalema i he toto maonioni; aia nae ikai finagalo a Jihova ke fakamolemole.

¶ 5 Bea koe toe oe gaahi gaue a Jihoiakimi, moia kotoabe naa ne fai, ikai kuo tohi ia i he tohi fakamatala ki he gaahi tu‘i o Juta?

6 Bea nae mohe a Jihoiakimi mo ene gaahi tamai: bea nae fetogi ia i he bule e hono foha ko Jihoiakini.

7 Bea nae ikai toe ha‘u ae tu‘i o Ijibite mei hono fonua: he nae ma‘u e he tu‘i o Babilone aia kotoabe nae oe tu‘i o Ijibite, mei he vaitafe o Ijibite, o a‘u ki he vaitafe ko Iufaletesi.

¶ 8 Nae hogofulu ma valu ta‘u ae motua o Jihoiakini i he ene kamata ene bule, bea nae bule ia i Jelusalema i he mahina e tolu. Bea koe higoa o ene fa‘e ko Nehusita, koe ofefine o Elinatani o Jelusalema.

9 Bea nae fai eia ae kovi i he ao o Jihova, o hage koia kotoabe nae fai e he ene tamai.

¶ 10 I he kuoga koia nae ha‘u ai ae kau tamaioeiki a Nebukanesa koe tu‘i o Babilone ke tau‘i a Jelusalema, bea nae kabui ae kolo aki ae tau.

11 Bea nae ha‘u a Nebukanesa koe tu‘i o Babilone ke tau‘i ae kolo, bea nae kabui ia e he ene kau tamaioeiki.

12 Bea nae alu kitua a Jihoiakini koe tu‘i o Juta ki he tu‘i o Babilone, aia mo ene fa‘e, mo ene kau tamaioeiki, mo ene houeiki, mo ene kau matābule: bea nae buke ia e he tu‘i o Babilone i hono valu ta‘u o ene bule.

13 Bea naa ne fetuku mei ai ae gaahi koloa kotoabe oe fale o Jihova, moe gaahi koloa mei he fale oe tu‘i, bea naa ne tuutuu ke iki ae gaahi ibu koula aia nae gaohi e Solomone koe tu‘i o Isileli i he fale tabu o Jihova, o hage koe folofola a Jihova.

14 Bea naa ne fetuku o ave ae kakai Jelusalema kotoabe moe gaahi houeiki kotoabe, moe kau tagata to‘a kotoabe, io, koe bobula e toko taha mano, moe kau tagata tufuga moe kau tufuga ukamea: nae ikai toe ha  kakai, ka koe kakai majiva aubito oe fonua.

15 Bea naa ne ave a Jihoiakini ki Babilone, moe fa‘e ae tu‘i, moe gaahi unoho oe tu‘i, mo ene kau matābule, moe kau malohi oe fonua, naa ne fetuku bobula akinautolu mei Jelusalema ki Babilone.

16 Bea koe kau tagata to‘a kotoabe, io ae toko fitu afe, moe kau tufuga kehekehe, moe kau tuki ukamea, koe toko taha afe, akinautolu kotoabe nae malohi mo boto i he tau, nae fetuku bobula akinautolu e he tu‘i o Babilone ki Babilone.

¶ 17 Bea nae fakanofo e he tu‘i o Babilone a Matania koe tokoua o ene tamai ke tu‘i ia ko hono fetogi, bea naa ne liliu hono higoa ko Setikia.

18 Nae uofulu ma taha ae ta‘u ae motua o Setikia i he ene kamata ene bule, bea nae bule ia i he ta‘u e hogofulu ma taha i Jelusalema. Bea koe higoa o ene fa‘e ko Hamutali, koe ofefine ia o Jelemaia o Libina.

19 Bea nae fai kovi eia i he ao o Jihova, o hage koia kotoabe nae fai e Jihoiakimi.

20 He koe mea i he houhau a Jihova nae hoko eni ki Jelusalema mo Juta, bea koeuhi ke ne liaki akinautolu mei hono ao, nae fai ae agatuu a Setikia ki he tu‘i o Babilone.