¶ 1 BEA i hono hiva ta‘u o ene bule, i hono hogofulu oe mahina, bea i hono hogofulu oe aho oe mahina, nae hoko o behe, nae ha‘u a Nebukanesa koe tu‘i o Babilone, aia mo ene tau kotoabe, ke tau‘i a Jelusalema, bea naa nau fakatoka ae tau ki ai; bea naa nau laga ae gaahi kolo ki ai o fakatakamilo.

2 Bea nae kabui ae kolo aki ae tau o a‘u ki he ta‘u e hogofulu ma taha oe tu‘i ko Setikia.

3 Bea i hono hiva oe aho i hono fa oe mahina, nae lahi ae hoge i he kolo, bea nae ikai ha meakai ki he kakai oe fonua.

¶ 4 Bea nae kaba ae kolo, bea nae hola ae kau tagata  tau kotoabe i he bouli i he hala oe mataba i he vahaa oe ogo a maka, aia oku ofi ki he goue ae tu‘i; (ka koeni nae a‘i ae kolo e he kakai Kalitia:) bea nae alu  ae tu‘i i he hala ki he toafa.

5 Bea nae tuli ae tu‘i e he tau ae kakai Kalitia, o nau ma‘u atu i he toafa o Joatani, ka kuo movetevete ene tau kotoabe meiate ia.

6 Koia naa nau buke ae tu‘i, mo o hake ia ki he tu‘i o Babilone i Libila; bea naa nau fakamāu‘i ia.

7 Bea naa nau tamate‘i ae gaahi foha o Setikia i hono ao, bea nae kabe‘i ae mata o Setikia, bea ha‘i ia aki ae ha‘i balasa, bea nae ave ia ki Babilone.

¶ 8 Bea i hono nima oe mahina, i hono fitu oe aho oe mahina, aia ko hono hogofulu ma hiva ta‘u oe tu‘i ko Nebukanesa koe tu‘i o Babilone, nae ha‘u ai ki Jelusalema a Nebusaletani, koe eiki bule oe kau leo, koe tamaioeiki ae tu‘i o Babilone.

9 Bea nae tutu eia ae fale o Jihova, moe fale oe tu‘i, moe gaahi fale kotoabe o Jelusalema, moe fale oe tagata eiki kotoabe naa ne tutu ia aki ae afi.

10 Bea koe tau kotoabe oe kakai Kalitia, aia nae i he eiki bule oe leo,  naa nau holoki hifo ae gaahi a maka o Jelusalema o tatatakai.

11 Bea ko hono toe oe kakai nae tuku i he kolo, bea moe kau hola nae hoko ki he tu‘i o Babilone, mo hono toega oe kakai toko lahi, nae fetuku akinautolu e Nebusaletani koe eiki bule oe kau leo o ne ave.

12 Ka nae tuku e he eiki bule oe kau leo ae kakai majiva oe fonua ke nau tauhi goue vaine, mo to goue.

13 Bea koe gaahi bou balasa nae i he fale o Jihova, moe gaahi tuuga, moe aiaga‐vai balasa aia nae i he fale o Jihova, nae ta o lailaiki e he kakai Kalitia, o nau fetuku ae balasa ki Babilone.

14 Bea koe gaahi kulo, moe gaahi huo, moe gaahi helekojimāma, moe gaahi sibuni, moe gaahi ibu balasa aia naa nau fai aki ae gaue, naa nau fetuku o ave.

15 Moe gaahi ibu aiaga afi, moe gaahi ibu luoluo, moe gaahi mea koula, i he koula, moe siliva i he siliva, nae ave ia e he eiki bule oe kau leo.

16 Koe bou e ua, moe aiaga‐vai e taha, moe gaahi tuuga aia nae gaohi e Solomone ki he fale o Jihova: koe balasa oe gaahi mea ni nae ikai faa lau hono mamafa.

17 Ko hono loloa oe bou e taha koe haga e tolugofulu ma ono; bea koe ulu‘i bou koe balasa ia: bea koe ulu‘i bou koe haga ia e ono; bea nae balasa kotoabe ae gaue fihifihi moe gaahi fua‘i akau nae takatakai i he ulu‘i bou: bea nae tatau moia ae gaue fihifihi i hono ua oe bou.

¶ 18 Bea nae ave e he eiki bule oe kau leo a Selaia koe taulaeiki lahi, mo Sefanaia ko hono ua oe taulaeiki, moe kau leo mataba e toko tolu.

19 Bea nae ave eia mei he kolo ae matābule e taha nae bule ki he kau tagata tau, moe kau tagata e toko nima okinautolu nae i he ao oe tu‘i, aia nae ilo i he kolo, moe tagata nae tuu ki mua i he kau tagata tohi oe tau, aia nae tanaki ae kakai oe fonua, moe kau tagata e toko onogofulu oe kakai oe fonua aia nae ilo i he kolo:

20 Nae ave akinautolu ni e Nebusaletani, koe eiki bule oe kau leo, bea ne omi akinautolu ki he tu‘i o Babilone ki Libila.

21 Bea nae ta‘i akinautolu e he tu‘i o Babilone, o ne tamate‘i akinautolu i Libila i he fonua o Hemati. Nae behe ae fetuku ae kakai Juta ke mamao mei ho nau fonua.

¶ 22 Bea koe kakai oe fonua aia nae toe i he fonua o Juta, aia nae tuku e Nebukanesa koe tu‘i o Babilone, nae fakanofo ke bule kiate kinautolu a Ketalia koe foha o Ahikami, koe foha o Safani.

23 Bea i he fanogo ae gaahi eiki nae bule ki he gaahi kogakau, akinautolu moe nau kakai, o behe kuo fakanofo e he tu‘i o Babilone a Ketalia ke bule ia, nae ha‘u ai kia Ketalia i Misiba, io, a Isimeli koe foha o Netania, mo Johanani koe foha o Kalia, mo Selaia koe foha o Tanumeti koe tagata Nitofa, mo Jeasania koe foha oe tagata o Meaka, akinautolu moe nau kakai.

24 Bea nae fuakava a Ketalia kiate kinautolu, bea moe nau kakai, o ne behe kiate kinautolu, Oua naa mou manavahe ke hoko koe kau tamaioeiki ki he kakai Kalitia: nofo i he fonua, bea tauhi ae tu‘i o Babilone; bea te mou lelei ai.

25 Ka nae hoko o behe i hono fitu oe mahina, nae ha‘u ai a Isimeli koe foha o Netania, koe foha o Ilisama i he hako oe tu‘i, koia moe kau tagata e toko hogofulu, o ne ta‘i a Ketalia, bea bekia ai ia, moe kau Jiu moe kau Kalitia nae iate ia i Misiba.

26 Bea nae tuu hake ae kakai kotoabe, ae jii moe lahi, moe gaahi eiki oe gaahi kau tau, bea naa nau ha‘u ki Ijibite he naa nau manavahe ki he kakai Kalitia.

¶ 27 Bea i hono tolugofulu ma fitu oe ta‘u oe nofo bobula a Jihoiakini koe tu‘i o Juta, i hono hogofulu ma ua oe mahina, i he aho e uofulu ma fitu oe mahina, i he ta‘u nae kamata ene bule a Ivilimelotaki koe tu‘i o Babilone, naa ne hiki hake ae ulu o Jihoiakini koe tu‘i o Juta mei he fale fakabobula:

28 Bea naa ne lea ofa kiate ia, bea naa ne hiki hono nofoa fakatu‘i ke maoluga i he gaahi nofoa fakatu‘i oe gaahi tu‘i nae nofo moia i Babilone;

29 Bea nae fetogi hono gaahi kofu fakafale bobula: bea nae kai ma ia i hono ao i he gaahi aho kotoabe o ene moui.

30 Bea ko ene meakai nae tufa mau ai be mei he tu‘i, koe tufakaga ki he aho taki taha, i he aho kotoabe o ene moui.