¶ 1 KOENI, nae kamata bule ki Isileli a Jiholami koe foha o Ehabi, i Samelia, i hono hogofulu ma valu oe ta‘u o Jihosafate koe tu‘i o Juta, bea nae bule ia i he ta‘u e hogofulu ma ua.

2 Bea nae fai kovi eia i he ao o Jihova; ka nae ikai hage ko ene tamai, be hage ko ene fa‘e: he naa ne liaki ae mea fakatātā kia Beali aia nae gaohi e he ene tamai.

3 Ka ne ogo ia naa ne bikitai ki he gaahi agahala a Jeloboami koe foha o Nibati, aia nae fakaagahala‘i a Isileli; nae ikai tafoki ia mei ai.

¶ 4 Bea ko Mesa koe tu‘i o Moabe, koe eiki ia nae ma‘u faga sibi, bea naa ne tuku ki he tu‘i o Isileli ha faga lami e taha kilu, moe faga sibi tagata e taha kilu, bea mo ho nau fulufulu.

5 Ka nae hoko o behe, i he ene bekia a Ehabi, nae agatuu ae tu‘i o Moabe ki he tu‘i o Isileli.

6 Bea i he kuoga koia nae alu atu mei Samelia ae tu‘i ko Jiholami, mo ne lau hake a Isileli katoa.

7 Bea naa ne alu mo ne fekau kia Jihosafate, koe tu‘i o Juta, o behe, Kuo agatuu kiate au ae tu‘i o Moabe: te ke fie alu mo au ki Moabe ke fai ae tau be ikai? Bea nae behe mai eia, Teu alu hake be: oku ou hage ko koe, oku tatau a hoku kakai mo ho kakai, bea tatau a eku faga hose mo hoo faga hose.

8 Bea nae behe eia, Te ta alu hake i he hala fe? Bea nae beheage eia, I he hala oku alu atu i he toafa o Itomi.

9 Koia nae alu ai ae tu‘i o Isileli, moe tu‘i o Juta, bea moe tu‘i o Itomi: bea naa nau hala fakatakamilo hake o fonoga i he aho e fitu: bea nae ikai ha vai ma ae kau tau, be koe faga manu nae muimui iate kinautolu.

10 Bea nae behe e he tu‘i o Isileli, Oiaue! i he ui mai e Jihova ke fakataha ae tu‘i e toko tolu ni, ke tukuage akinautolu ki he nima o Moabe!

11 Ka nae behe e Jihosafate, Oku ikai i heni ha balofita a Jihova, koeuhi ke tau fehui iate ia kia Jihova? Bea nae tali e ha toko taha i he kau tamaioeiki ae tu‘i o Isileli, o behe, Oku i heni a Ilaisa koe foha o Safati, aia nae ligi vai ki he nima o Ilaija.

12 Bea nae behe e Jihosafate, Oku iate ia ae folofola a Jihova. Koia nae alu hifo ai kiate ia ae tu‘i o Isileli, mo Jihosafate, bea moe tu‘i o Itomi.

13 Bea nae behe e Ilaisa ki he tu‘i o Isileli, Koeha au kiate koe? Ke ke alu ki he kau balofita o hoo tamai, bea ki he kau balofita o hoo fa‘e. Bea nae behe kiate ia e he tu‘i o Isileli, E ikai: he kuo ui a Jihova ke fakataha mai ae gaahi tu‘i ni e toko tolu, koeuhi ke tuku akinautolu ki he nima o Moabe.

14 Bea nae behe e Ilaisa, Oku moui a Jihova oe gaahi toko lahi, aia oku ou tuu i hono ao, bea koe mooni, ka ne oua a eku tokaga ki he ao o Jihosafate koe tu‘i o Juta, behe, e ikai teu haga atu kiate koe, be mamata kiate koe.

15 Ka koeni, omi kiate au ha tagata oku ta ha mea faiva. Bea vakai i he ene ta ae hiva e he tagata ta mea faiva, nae hoko mai ae nima o Jihova kiate ia.

16 Bea naa ne behe, Oku behe e Jihova, Mou fakafonu ae telea ni i he gaahi luo.

17 He oku behe e Jihova, E ikai te mou jio ki ha matagi, be mamata ki ha uha; ka ne ogo ia, e bito ae telea ni i he vai, koeuhi ke mou inu, io akimoutolu, bea mo hoo mou faga bulu, bea mo hoo mou faga manu.

18 Bea koe mea maamaa eni i he ao o Jihova: te ne tuku mai foki ae kakai Moabe ki ho mou nima.

19 Bea te mou teia ae kolo kotoabe kuo tanu buke, moe kolo lelei kotoabe, bea te mou ta hifo ae akau lelei kotoabe, mo bunuji ae vaikeli kotoabe, mo maumau aki ae maka ae botu fonua lelei kotoabe.

20 Bea nae hoko o behe i he ene bogibogi, lolotoga ae o hake ae feilaulau meakai, vakai, nae tafe mai ae vai mei he hala ki Itomi, bea nae fonu ae fonua i he vai.

¶ 21 Bea i he fanogo e he kakai Moabe kotoabe, ki he alu hake ae gaahi tu‘i ke tau‘i akinautolu, naa nau tanaki mai akinautolu kotoabe nae faa fua ae mahafu tau, o fai hake, o nau tutuu i he gataaga  fonua.

22 Bea naa nau tuu hegihegi hake i he bogibogi, bea nae ulo ae laa ki he fuga vai, bea nae mamata e he kakai Moabe ki he vai mei he botu e taha, oku kulokula ae vai o hage koe toto:

23 Bea naa nau behe, Koe toto eni: ta koe mooni kuo fakaauha ae gaahi tu‘i, bea kuo nau fetamateaki akinautolu: koia foki, akimoutolu Moabe, ke tau alu atu ki he vete.

24 Bea i he e nau hoko mai ki he abitaga tau o Isileli, nae tuu hake ae kakai Isileli o nau teia ae kau Moabe, bea naa nau hola mei ho nau ao: ka naa nau muimui atu i he teia ae kakai Moabe, i ho nau fonua onautolu.

25 Bea naa nau fakalala ae gaahi kolo, bea iloga ae koga fonua kotoabe nae lelei, nae li ki ai e he tagata taki taha a ene maka, ke fonu ai ia; bea naa nau bunuji ae gaahi vaikeli kotoabe, mo nau ta hifo ae gaahi akau lelei kotoabe: ko Kili‐halaseti be naa nau tuku ai hono gaahi maka oia; ka nae nofo takai ki ai ae kau tagata makata, mo nau kabaji ia.

¶ 26 Bea i he ene mamata e he tu‘i o Moabe, kuo malohi fau ae tau kiate ia, naa ne ave moia ae kau tagata e toko fitugeau nae too heleta, ke nau oho atu ke lava ki he tu‘i o Itomi: ka nae ikai te nau mafai.

27 Bea naa ne toki too a hono uluaki foha aia nae tonu ke hoko moia ki he bule, mo ne feilaulau aki ia koe feilaulau tutu i he fuga a. Bea nae lahi aubito ae ita ki Isileli: bea naa nau liaki ia mo nau foki atu ki ho nau fonua.