¶ 1 E MALAIA akinautolu oku fokotuu ae fono tae maonioni, bea oku tohi ae mamahi aia kuo nau tuutuuni;

2 Ke fakaafe ae majiva mei he fakamāu, bea faao ae totonu mei he majiva o hoku kakai, ke nau kākā‘i ae kau fefine kuo mate ho nau unoho, bea ke nau kaihaa mei he tamai mate!

3 Bea koeha te mou fai i he aho oe aahi, bea i he fakaauha aia e ha‘u mei he mamao? te mou kumi ae tokoni mei ahai? bea te mou tuku ife a ho mou nāunāu?

4 I he tae ma‘u au te nau hoko koe bobula ki he bobula, bea moulaloa kiate kinautolu kuo fakamoulaloa. Bea ne ogo ae mea ni kotoabe oku ikai taofi hono houhau, ka oku kei mafao hono nima.

¶ 5 E malaia ae tagata o Asilia, koe mea ta o eku tubutamaki, bea koe tokotoko i ho nau nima ko hoku houhau ia.

6 Teu fekau ia ki he buleaga malualoi, bea ki he kakai oku ou houhau ki ai teu tuku kiate ia ha fekau, ke ave ae koloa, bea ave moe mea kai, bea ke molomoloki akinautolu o hage koe belebela oe gaahi hala.

7 Ka koeni, oku ikai ko hono loto ia, bea oku ikai ke mahalo behe a hono loto; ka oku i hono loto ke tuuji mo fakaauha ae gaahi buleaga lahi.

8 He oku ne behe, Ikai koe gaahi tu‘i mooni ae gaahi eiki oku iate au?

9 Ikai oku tatau a Kalino mo Kalikimisi? ikai oku tatau a Hamate mo Abati? ikai oku tatau a Samelia mo Tamasikusi?

10 O hage koe ilo a hoku nima ae gaahi buleaga oe kau tamabua, aia nae lahi hake ki Jelusalema mo Samelia e nau gaahi tamabua;

11 O hage koia kuou fai ki Samelia mo ene gaahi tamabua, ikai teu fai behe foki ki Jelusalema mo ene gaahi tamabua?

12 Koia e hoko o behe, oka fakakakato e he Eiki a ene gaue kotoa i he mouga ko Saione bea mo Jelusalema, teu tautea ae futa oe loto malohi oe tu‘i o Asilia, bea moe heheki o hono mata fielahi.

13 He oku ne behe, I he malohi o hoku nima kuou fai eni, bea i he eku boto; he oku ou fai fakabotoboto: bea kuou too ae gaahi fakagatagata oe kakai, bea kaihaajia moe nau koloa, bea kuou fakamoulaloa ae kakai o hage koia oku tāu moe tagata to‘a:

14 Bea kuo ilo e hoku nima ae koloa ae kakai o hage ko ha bunuga: bea hage ko ha taha oku tanaki ae gaahi foi manu oku behe a eku tanaki a mamani kotoabe; bea nae ikai ha taha te ne ue‘i ae kabakau, be fakamaga ae gutu, be fakaaji.

15 E fielahi ae toki kiate ia oku ne ta aki ia? be fielahi ae kili kiate ia oku ne fetohoaki ia? o hage ka ta mai ae akau kiate ia oku ne too ia, bea hage ka hiki hake e he tokotoko kiate ia oku ne too ia.

16 Koia e fekau atu e Jihova, koe Eiki oe gaahi kau tau, ae tutue ki ho nau kakai jino; bea te ne tutu ke vela a hono nāunāu o hage koe kakaha ae afi.

17 Bea koe māma o Isileli e hoko ia koe afi, bea ko hono Toko Taha Maonioni koe ulo afi, bea e kakaha ia bea fakaauha i he aho be taha hono gaahi akau talatala moe talatalaamoa;

18 Bea e fakaauha ae lelei oe vao lahi oia, bea mo ene goue oku fua, ae laumalie moe jino fakatouoji; bea te nau hage koe tagata too fuka kuo bogia.

19 Bea ko hono toe oe akau oe vao lahi koia te nau toko jii, koia e faa tohi ia e ha tamajii.

¶ 20 Bea e hoko i he aho koia o behe, ko hono toe o Isileli, bea mo kinautolu kuo hao i he fale o Jekobe, e ikai te nau toe falala kiate ia nae ta‘i akinautolu; ka e falala mooni kia Jihova, koe Toko Taha Maonioni o Isileli.

21 E foki mai hono toe, io ae toe o Jekobe, ki he Otua Mafimafi.

22 He ne ogo ae tatau a hoo kakai, E Isileli, moe oneone oe tahi, ka e foki mai be hono toe: kuo bau ke hoko ae fakaauha e fonu mahua i he fai totonu.

23 He ko Jihova koe Eiki oe gaahi kau tau te ne fai ae fakaauha kuo kotofa, i he lotolotoga oe fonua kotoabe.

¶ 24 Koia oku behe e Jihova koe Eiki oe gaahi kau tau, E hoku kakai aia oku nofo i Saione, oua e manavahe ki he tagata Asilia: te ne ta‘i koe aki ae mea ta, bea hiki hake hono tokotoko kiate koe, ka e hage koia nae fai i Ijibite.

25 Koeuhi e toetoe jii bea e gata a hoku tubutamaki, bea mo hoku houhau, ka teu fakaauha akinautolu.

26 Bea e hiki hake e Jihova oe gaahi kau tau ae mea tautea o hage koe fakaauha a Mitiane i he maka ko Olebi: bea tatau mo ene tokotoko nae ai ki he tahi, e behe a ene hiki hake ia o hage koia nae fai ki Ijibite.

27 Bea e hoko behe, i he aho koia, e too ene kavega mei ho uma, mo ene haamoga mei ho kia, bea e maumau‘i ae haamoga mei ho mou uma.

28 Kuo ha‘u ia ki Aiata, kuo alu atu ia ki Mikiloni; kuo ne tanaki ene gaahi saliote i Mikimasi:

29 Kuo nau laka i he botu fa jii: kuo nau nofo i Keba; oku manavahe a Lama; bea kuo hola a Kibea o Saula.

30 E ofefine o Kalimi, hiki hake ho le‘o: fai ke ogo atu ia ki Leisi, E Anatoti majiva.

31 Kuo ave a Matemena; oku fakataha akinautolu e he kakai e Kebime ke nau hola.

32 Te ne nofo be ia i he aho ni i Nobe: te ne lulululu hono nima ki he mouga oe ofefine o Saione, ae mouga o Jelusalema.

33 Vakai, koe Eiki, ko Jihova oe gaahi kau tau, te ne tuuji ae vaa aki ae manavahe lahi: bea ko kinautolu oku maoluga e ta hifo, bea koe fielahi e fakavaivai‘i.

34 Bea te ne tuuji ki lalo ae gaahi botu akau matolu oe vao lahi aki ae ukamea, bea e to ki lalo a Lebanoni i ha taha malohi.