¶ 1 BEA nae hoko o behe, i he fanogo a Hesekaia ki ai, naa ne haehae hono kofu, bea kofu aki ia ae tauagaa, bea alu ki he fale o Jihova.

2 Bea ne fekau a Iliakimi, aia nae bule i he fale, mo Sebina koe tagata tohi, bea moe mātua i he kau taulaeiki, kuo kofu aki ae tauagaa, kia Isaia koe balofita, koe foha o Amosi.

3 Bea nau behe kiate ia, Oku behe e Hesekaia, Koe aho ni koe aho oe mamahi, moe valoki, bea moe kabekabe: he kuo hokojia ae aho ke faele, ka oku ikai ha malohi ke fanau‘i.

4 Hei ilo e fanogo nai e Jihova ko ho Otua ki he gaahi lea a Labisake, aia kuo fekau e he tu‘i o Asilia ko hono eiki ke valoki aki ae Otua moui, bea e tautea ae gaahi lea aia kuo fanogo ki ai e Jihova ko ho Otua: koe hiki hake hoo hu koeuhi koe kakai oku kei toe.

5 Koia nae ha‘u ae kau tamaioeiki a Hesekaia kia Isaia.

¶ 6 Bea nae behe e Isaia kiate kinautolu, Te mou lea o behe ki ho mou eiki, Oku behe e Jihova, Oua naa ke manavahe ki he gaahi lea kuo ke fanogo ki ai, aia kuo kabekabe aki kiate au e he kau tamaioeiki oe tu‘i o Asilia.

7 Vakai, teu fakahu kiate ia ha laumalie, bea te ne fanogo ki he ogoogo, bea foki ki hono fonua oona; bea teu bule ke to ia i he heleta i hono fonua oona.

¶ 8 Nae foki a Labisake, bea ilo oku tau ae tu‘i o Asilia mo Libina: he kuo ne fanogo kuo ha‘u ia mei Lakisi.

9 Bea naa ne fanogo ki he tala nae kau kia Tilaka koe tu‘i o Itiobea, o behe, Oku ha‘u ia ke tau‘i koe. Bea i he ene fanogo ki ai, naa ne fekau atu ae kau talafekau kia Hesekaia, o behe,

10 Ke behe hoo mou lea kia Hesekaia koe tu‘i o Juta, Oua naa tuku a ho Otua, aia oku ke faaki ki ai, ke kākā‘i koe, o behe, E ikai tukuage a Jelusalema ki he nima oe tu‘i o Asilia.

11 Vakai, kuo ke fanogo ki he mea kuo fai e he gaahi tu‘i o Asilia ki he gaahi fonua kotoabe i he fakaauha aubito akinautolu; bea e fakamoui koe?

12 Kuo fakamoui e he gaahi otua oe gaahi buleaga akinautolu nae fakaauha e he eku gaahi tamai, ko Kosani, mo Holani, mo Lesefi, moe fānau a Iteni aia nae i Tilasa?

13 Oku ife ae tu‘i o Hamati, bea moe tu‘i o Aabati, bea moe tu‘i oe kolo ko Sifaveimi, mo Hena, mo Iva?

¶ 14 Bea nae ma‘u e Hesekaia ae tohi mei he nima oe kau talafekau, bea lau ia: bea nae alu hake a Hesekaia ki he fale o Jihova, o ne folahi ia i he ao o Jihova.

15 Bea nae hu a Hesekaia kia Jihova, o behe,

16 E Jihova oe gaahi kau tau, koe Otua o Isileli, aia oku afio i he vahaa oe ogo Jelubi, ko koe koe Otua, io, ko koe toko taha be, i he gaahi buleaga o mamani: ko koe nae gaohi ae lagi mo mamani.

17 Fakaogo mai ho fofoga, e Jihova, bea fanogo; fakaa, e Jihova, ho fofoga, bea ke afio‘i: bea fanogo ki he lea kotoabe a Senakalibe, aia kuo fekau ke valoki aki ae Otua moui.

18 Koe mooni, E Jihova, koe gaahi tu‘i o Asilia kuo nau fakaauha ae gaahi buleaga kotoabe, mo ho nau gaahi fonua,

19 Bea kuo li ho nau gaahi otua ki he afi: he nae ikai ko ha otua akinautolu, ka koe gaue ae nima oe tagata, koe akau moe maka: koia kuo nau fakaauha ai akinautolu.

20 Koia, E Jihova ko ho mau Otua, fakahaofi akimautolu mei hono nima, koeuhi ke ilo e he gaahi buleaga kotoabe o mamani ko koe ko Jihova, io ko koe toko taha be.

¶ 21 Bea nae toki fekau e Isaia koe foha o Amosi kia Hesekaia, o behe, Oku behe, e Jihova koe Otua o Isileli, koe mea i hoo hu kiate au koeuhi ko Senakalibe koe tu‘i o Asilia:

22 Ko eni ae lea aia kuo folofola aki e Jihova oku kau kiate ia; Koe taahine, koe ofefine o Saione, kuo fehia kiate koe, bea kata manuki kiate koe: koe ofefine o Jelusalema kuo ne kalokalo hono ulu kiate koe.

23 Kohai ia kuo ke manuki‘i mo kabe‘i? bea kuo ke hiki hake ho le‘o ki ahai, bea hiki mo ho mata ki oluga? io ki he Toko Taha Maonioni o Isileli.

24 Kuo ke manuki‘i e hoo kau tamaioeiki a Jihova, bea kuo ke behe, I he toko lahi o eku gaahi saliote kuou ha‘u ki he maoluga oe mouga, ki he tafaaki o Lebanoni, bea teu tuuji ki lalo ae gaahi sita maoluga oia, bea moe gaahi akau koe fea lelei oia: bea teu hu ki he maoluga o hono gaahi gataaga, moe vao akau o hono Kameli.

25 Kuou keli, bea inu vai, bea kuou fakamaha aki hoku aofi va‘e ae gaahi vaitafe kotoabe oe gaahi kolo kuo kabui e he tau.

26 Ikai kuo ke fanogo fuoloa, kuou fai ia eau; bea i he gaahi kuoga i mua, naaku tuutuuni ki ai? koeni, kuou fakahoko ia, koeuhi ke ke liliu ae gaahi kolo kuo teu tau, koe gaahi tuuga fale kuo auha.

27 Koia nae malohi jii be hoo nau kakai, naa nau manavahe bea bubutuu: naa nau hage koe mohuku oe goue, bea hage koe akau mata, o hage koe mohuku i he tua fale, bea hage koe uite kuo mahunu i he heeki ke tubu hake.

28 Ka oku ou ilo ho nofoaga, bea mo hoo alu kitua, mo hoo hu ki fale, mo hoo ita kiate au.

29 Koe mea i he alu hake ki hoku fofoga hoo ita kiate au, mo hoo fielahi, koia teu ai eku mātau ki ho ava‘i ihu, mo eku mea taofi i ho lougutu, bea teu fakafoki koe i he hala koia aia ne ke ha‘u ai.

30 Bea koe fakailoga eni kiate koe, Te mou kai i he ta‘u ni aia oku tubu iate ia be; bea i hono ua oe ta‘u aia oku tubu mei ai: bea i hono tolu oe ta‘u te mou tūtū‘i, bea tuuji mai, bea to ae gaahi goue vaine, bea kai ae gaahi fua oia.

31 Bea koe toe oe fale o Juta kuo hao e toe aka ki lalo, bea fua i oluga:

32 Koeuhi e alu i Jelusalema ha toega kakai, bea ko kinautolu kuo hao i he mouga ko Saione: koe ofa a Jihova oe gaahi kau tau te ne fai ae mea ni.

33 Koia oku behe ae folofola a Jihova aia oku kau ki he tu‘i o Asilia, E ikai te ne ha‘u ki he kolo ni, be fana‘i ha gahau ki ai, be ha‘u ki ai aki ae gaahi fakaū, be fokotuu ha tetanu ki ai.

34 Oku behe e Jihova, I he hala naa ne ha‘u ai, i he hala koia te ne foki atu ai, bea e ikai te ne ha‘u ki he kolo ni.

35 He teu malu‘i ae kolo ni o fakamoui ia koeuhi ko au, bea koeuhi ko eku tamaioeiki ko Tevita.

¶ 36 Bea nae toki alu atu ae agelo o Jihova, o ne ta‘i i he nofoaga tau oe kau Asilia ae toko taha kilu ma toko valu mano ma toko nima afe: bea i he tuu hegihegi hake ae kakai, vakai, kuo nau mate, koe agaaga kotoabe.

¶ 37 Koia nae alu ai a Senakalibe koe tu‘i o Asilia, o ne alu, o foki atu, bea nofo i Ninive.

38 Bea nae hoko o behe, lolotoga ene lotu i he fale o Nisiloki ko hono otua, nae ta‘i ia e hono ogo foha ko Atilameleki mo Salisa aki ae heleta; bea ne na hao ki he fonua ko Aminia: bea nae bule hono foha ko Asahatoni ko hono fetogi.