¶ 1 KOE tala mamafa oku kau ki Babilone, aia nae mamata ki ai e Isaia koe foha o Amosi.

2 Mou fokotuu ae fuka i he mouga maoluga, hiki hake ae le‘o kiate kinautolu, taalo aki ae nima, ke nau hu i he gaahi mataba oe houeiki.

3 Kuou fekau ki he eku kau maonioni, kuou ui foki eku kau malohi koeuhi ko hoku houhau, io, akinautolu oku fiefia i he eku mafimafi.

4 Koe logoaa oe toko lahi i he gaahi mouga, o hage koe kakai lahi; koe logoaa lahi oe gaahi buleaga, io oe gaahi buleaga kuo tanaki fakataha: he oku fakataha e Jihova ae gaahi kau tau o ene kogakau ki he tau.

5 Oku nau ha‘u mei he fonua mamao, mei he gataaga oe lagi, io ko Jihova, moe mahafu o hono houhau, ke fakaauha ae fonua kotoabe.

¶ 6 Mou tagilāulāu akimoutolu; he oku ofi ae aho o Jihova; e ha‘u ia o hage koe fakaauha mei he Mafimafi.

7 Koia e vaivai ai ae nima kotoabe, bea e molu moe loto oe tagata kotoabe:

8 Bea te nau manavahe: e buke akinautolu e he mamahi moe ogojia; te nau laga o hage koe fefine oku faele: te nau feofoaki; e tatau ho nau mata moe ulo oe afi.

9 Vakai, oku ha‘u ae aho o Jihova, oku mamafa i he tubutamaki bea moe houhau lahi, ke fakaauha ae fonua: bea te ne tamate‘i ae kakai agahala mei ai.

10 He koe gaahi fetuu oe lagi moe gaahi faahiga fetuu i ai e ikai te nau omi e nau māma; e fakabouli ae laa i he ene hobo hake, bea e ikai ulo atu ae māma oe mahina.

11 Bea teu tautea a mamani koeuhi koe nau hia, bea moe kakai agakovi koeuhi koe nau agahala; bea teu bule ke gata ae fielahi oe laukau, bea teu li ki lalo ae fieeiki oe kakai fakamana.

12 Teu gaohi ke mahuiga hake ae tagata i he koula lelei; io e mahuiga hake ae tagata i he koula lelei o Ofeli.

13 Koia teu lulululu ai ae gaahi lagi, bea e hiki mo mamani mei hono botu, i he houhau o Jihova oe gaahi kau tau, bea i he aho o hono houhau vela.

14 Bea e tatau ia moe anitelobe kuo tulia, bea hage koe faga sibi oka ikai ha tagata ke tanaki fakataha: e tafoki taki taha ae tagata ki hono kakai, bea hola taki taha ki hono fonua.

15 Ko kinautolu kotoabe oku moua e hoka‘i ke aji; bea e to i he heleta akinautolu kotoabe oku kau mo kinautolu.

16 E laiki e nau fānau i ho nau ao; e vete a ho nau gaahi fale, bea e tohotoho a ho nau gaahi unoho.

17 Vakai, teu hiki hake ae kakai o Mitia ke tau‘i akinautolu, e ikai te nau tokaga ki he siliva; bea koe koula, e ikai te nau manako ki ai.

18 E laikina ae kau talavou aki e nau gaahi kaufana; bea e ikai te nau ofa ki he fua oe manāva; bea e ikai fakamoui e ho nau mata ae fānau tubu.

¶ 19 Bea ko Babilone, koe lelei lahi oe gaahi buleaga, koe toulekeleka oe laukau ae kakai o Kalitia, e tatau ia moe fakaauha a Sotoma mo Komola e he Otua.

20 E ikai aubito toe kakai ia, e ikai nofo i ai ha kakai mei he toutagata ki he toutagata: bea e ikai fokotuu e ha tagata Alebea ae fale fehikitaki i ai; bea e ikai gaohi i ai e he kau tauhi sibi ha nau lotoa.

21 Ka e tokoto i ai ae gaahi manu kaivao oe botu lala; bea e fonu ho nau gaahi fale i he gaahi manu fakalielia; bea e nofo ai ae gaahi lulu, bea e mee ai ae faahi kehe oe vao.

22 Bea e tagi i ho nau gaahi fale liaki ae faga manu kaivao oe otu motu, bea moe gaahi talakone i ho nau gaahi fale fakaeieiki: bea kuo ofi ae hokojia a hono kuoga, bea e ikai fakaloloa hono gaahi aho.