Koe Tohi ae Balofita ko Isaia

¶ 1 KOE mea nae ha mai kia Isaia koe foha o Amosi, aia naa ne mamata oku kau ki Juta mo Jelusalema i he gaahi aho o Usia, mo Jotame, mo Ahasi, bea mo Hesekaia, koe gaahi tu‘i o Juta.

2 Mou fanogo, ae gaahi lagi, bea fakafanogo mo mamani: he oku folofola a Jihova, Kuou fafaga mo tauhi ae fānau, bea kuo nau agatuu kiate au.

3 Oku ilo e he bulu aia oku aana ia, bea moe asi ae fale manu o ene eiki: ka oku ikai ilo e Isileli, oku ikai tokaga a hoku kakai.

4 Oiau! ae buleaga agakovi, koe kakai māfajia i he hia, koe hako fai mea kovi, koe fānau oku fakahala: kuo nau liaki a Jihova, kuo nau fakahouhau‘i ae Toko Taha Maonioni o Isileli, kuo nau fakaholomui.

¶ 5 Koeha e toe teia ai akimoutolu? e tubulaki be hoo mou agatuu: oku mahaki ae ulu kotoabe, bea vaivai moe loto kotoabe.

6 Mei he aofi va‘e o a‘u ki he ulu oku ikai ha haohaoa i ai; ka koe lavea, moe volu, moe bala kovi: oku heeki ai fakamaobo, be nonoo, be feau aki ae lolo faitoo.

7 Kuo lala ho mou fonua, kuo vela ho mou gaahi kolo i he afi: bea ko ho mou fonua, oku kai o oji e he kakai muli i ho mou ao, bea oku lala ia, o hage kuo fakaauha e he kau muli.

8 Bea kuo tuku ae ofefine o Saione o hage koe fale jii i he goue vaine, o hage koe fale leo i he goue kukumiba, o hage koe kolo kuo kabui e he tau.

9 Ka ne ikai tuku kiate kitautolu e Jihova oe gaahi kau tau ha toko jii, behe, kuo tau hage ko Sotoma, bea kuo tau tatau mo Komola.

¶ 10 Fanogo ki he folofola a Jihova, akimoutolu ae kau bule o Sotoma; fakafanogo ki he fono a ho tau Otua, akimoutolu koe kakai o Komola.

11 Oku behe e Jihova, Koeha hono aoga o hoo mou gaahi feilaulau lahi kiate au? Kuou fiu i he feilaulau aki ae faga sibi tagata, moe gako oe manu jino; bea oku ikai teu fiemalie i he toto oe faga bulu, be koe faga lami, be koe faga koji tagata.

12 Oka mou ka ha‘u ke fakaha akimoutolu i hoku ao, kohai kuo ne fekau ke omi ae mea ni i ho mou nima, ke malaki hoku gaahi botu tabu?

13 Oua naa toe omi ae gaahi feilaulau taeaoga; koe mea fakalielia kiate au ae tutu oe akau namu lelei; koe gaahi mahina foou moe gaahi aho tabu, moe ui ke fakataha, oku ikai teu faa kataki; bea naa moe fakataha ke lotu koe agahala ia.

14 Oku fehia a hoku laumalie ki hoo mou gaahi mahina foou mo hoo mou gaahi katoaga: koe mea fakamamahi ia kiate au; kuou fiu i hono kataki.

15 Oka mou ka mafao ho mou nima, teu fufu hoku fofoga iate kimoutolu: io, oka mou ka hu o liuga lahi, e ikai teu fanogo: he oku bito ho mou nima i he toto.

¶ 16 Fufulu akimoutolu, o gaohi ke mou maa; hiki ke mamao meiate au ae kovi o hoo mou faiaga; tuku ae fai kovi;

17 Ako ke mou fai lelei: kumi ki he agatonu, tokoni akinautolu kuo fakamalohia, fakamāu ki he tamai mate, lagomaki‘i ae fefine kuo mate hono unoho.

18 Oku behe e Jihova, Mou ha‘u, bea ke tau alea fakataha: he ne ogo ae tatau o hoo mou agahala moe kulaahoaho, e hoko ia ke hinehina o hage koe uha hinaekiaki; kabau oku kulokula ia o hage koe kulamumu, e tatau ia moe fulufulu‘i sibi.

19 Kabau te mou loto ki ai mo talagofua, te mou kai hono lelei oe fonua:

20 Ka i hoo mou talagataa mo agatuu, e auha ai akimoutolu i he heleta: he kuo folofola behe ae fofoga o Jihova.

¶ 21 Hono ikai liliu fau ae kolo nae agatonu koe faa feauaki! nae fonu ia i he fakamāu; nae nofo ai ae maonioni; ka oku i ai ni ae kau fakabo.

22 Kuo hoko hoo siliva koe taeaoga, mo hoo uaine kuo hui aki ae vai:

23 Oku agatuu ho mou houeiki, bea kaumea moe kau kaihaa: oku nau manako kotoabe ki he gaahi foaki, o nau muimui ki he totogi: oku ikai te nau fakamāu ki he tamai mate, bea oku ikai a‘u kiate kinautolu ae mamahi ae fefine kuo mate hono unoho.

24 Koia oku behe e he Eiki, ko Jihova oe gaahi kau tau, koe Toko Taha Mafimafi o Isileli, Io, teu fakafiemalie‘i au iate kinautolu oku agatuu mai, bea teu totogi e au ki hoku gaahi fili.

25 Bea e toe ala hoku nima kiate koe, bea fakamaa mooni hoo uli, bea ave mo hoo kovi kotoabe:

26 Bea teu toe fakanofo hoo kau fakamāu o hage koia i mua, bea mo hoo kau fakakaukau boto o hage koia i he kamataga: bea hili ia e ui koe, Koe kolo maonioni, koe kolo agatonu.

27 E huhui a Saione aki ae fakamāu, mo ene kakai ului aki ae maonioni.

¶ 28 Bea e fakaauha fakataha ae kau talagataa moe agahala, bea e auha akinautolu oku liaki a Jihova.

29 He te nau ma i he gaahi akau naa mou holi ki ai, bea te mou bubutuu i he gaahi goue kuo mou fili.

30 He te mou tatau moe akau kuo mae hono lau, bea hage koe goue oku ikai hano vai.

31 Bea e tatau ae malohi moe kaka, bea mo ene gaue o hage koe kalofiama, bea te na vela fakataha, bea e ikai tamate‘i ia e ha toko taha.