¶ 1 VAKAI, oku fakamaha e Jihova ae fonua, mo fakalala ia, mo ne fulihi ia, bea fakamovetevete a hono kakai.

2 Bea e behe be, hage koia oku i he kakai, e behe be ki he taulaeiki; hage koe tamaioeiki, e behe be ki he ene eiki; hage koe kaunaga, e behe be ki he ene eiki fefine; hage koe tagata fakatau mai, e behe be ki he tagata fakatau atu; hage koia oku tali ae nono, e behe be ki he tagata kole; hage koia oku i he tagata ma‘u totogi no baaga, e behe i he tagata oku atu ae totogi no baaga kiate ia.

3 E fakamaha aubito ae fonua, bea fakaauha ia: he kuo folofola aki e Jihova ae folofola ni.

4 Oku mamahi ae fonua bea mae ia, oku vaivai a mamani bea oku mae, oku vaivai ae kakai fieeiki oe fonua.

5 Kuo uli‘i foki ae fonua i hono kakai; koeuhi kuo nau maumau‘i ae gaahi fono, o liliu ae tuutuuni, o maumau‘i ae fuakava taegata.

6 Koia kuo auha ai ae fonua i he malaia, bea ko kinautolu oku nofo ai oku nau mamahi: koia kuo tutu ai ae kakai o mamani, bea oku toe ae tagata toko jii be.

7 Oku mamahi ae uaine foou, oku vaivai ae vaine, oku to‘e akinautolu kotoabe nae loto fiefia.

8 Kuo gata ae fakafiefia oe gaahi lali, kuo oji ae logoaa okinautolu nae fiefia, kuo gata ae fakafiefia oe haabe.

9 E ikai te nau kei inu uaine moe hiva; e kona ae kava malohi kiate kinautolu oku inu ia.

10 Kuo maumau‘i hifo ae kolo oe maveuveu: kuo tabuni ae gaahi fale kotoabe, koeuhi ke oua naa hu ki ai ha tagata.

11 Oku ai ae tagi ki he uaine i he gaahi hala; kuo fakabouli ae fiefia kotoabe, kuo mole ae fiefia i he fonua.

12 Kuo tuku i he kolo ae fakaauha, bea kuo ta‘i ke lailai hono gaahi mataba.

¶ 13 Oku hoko o behe ki he kakai oe loto fonua, e ai o hage koe lulululu oe akau koe olive, bea hage koe toega kalebi oka hili hono tanaki mei he vaine.

14 Te nau hiki hake ho nau le‘o, te nau hiva koeuhi koe maoluga a Jihova, te nau kalaga mei he tahi.

15 Koia ke mou fakaogoogolelei‘i a Jihova i he gaahi afi, io, ae huafa o Jihova koe Otua o Isileli i he gaahi otu motu oe tahi.

¶ 16 Kuo mau fanogo ki he gaahi hiva mei he gataaga o mamani, io koe fakaogolelei ki he maonioni. Ka naaku behe, A eku tutue, a eku tutue; e malaia au! kuo fai kākā ae kau fai tae totonu; io, kuo fai kākā lahi aubito ae kakai fai tae totonu.

17 Oku iate koe ae ilifia, moe luo, bea moe tauhele, akoe oku nofo i mamani.

18 Bea e hoko o behe, ko ia oku hola mei he logoaa oe ilifia e to ki he luo; bea ko ia oku alu hake mei he loto luo e moua ia i he tauhele: he kuo too ae gaahi mataba i oluga, bea oku galulu ae gaahi tuuga o mamani.

19 Kuo maumau hifo aubito a mamani, kuo auha aubito ae fonua, kuo galulu lahi aubito a mamani.

20 E tajibejiba a mamani o hage koe tagata kona, e hiki ia o hage ko ha fale jii, bea e mamafa ki ai a ene agahala; bea e higa ia, bea e ikai toetuu.

21 Bea e hoko o behe i he aho koia, e tautea e Jihova oe gaahi kau tau ae kakai eiki oku i oluga, bea i he mamani ae gaahi tu‘i o mamani.

22 Bea e tanaki fakataha akinautolu, o hage oku tanaki ae kau bobula ki he luo, bea e tabuni i he fale fakabobula, bea hili ae gaahi aho lahi e aahi‘i akinautolu.

23 Bea e toki bubutuu ae mahina, bea e ma moe laa, koeuhi e bule a Jihova oe gaahi kau tau i hono mafimafi i he mouga ko Saione, bea i Jelusalema, bea e ogoogolelei ia i he ao oe mātua o hono kakai.