Vahe 27
1 Koe tokaga ae Otua ki he ene goue vaine. 7 Oku fai kehekehe a ene takitala mo ene gaahi tautea. 12 Koe jiaji oe Jiu moe Jenitaile.
¶ 1 I HE aho koia e tautea e Jihova ae levaiatani koe gata malohi, aki ene heleta majila mo lahi mo malohi, io ae levaiatani koe gata bikobiko; bea te ne tamate‘i moe talakone oku i he tahi.
2 I he aho koia mou hiva kiate ia, koe goue vaine oe uaine kulokula.
3 Ko au ko Jihova oku ou tauhi ia: teu fakaviviku ia i he kuoga kotoabe: telia naa maumau‘i ia e ha taha, teu tauhi ia i he aho moe bo.
4 Oku ikai iate au ae houhau: kohai te ne fokotuu kiate au ae gaahi akau talatala moe talatalaamoa i he tau? Teu alu o aji iate kinautolu, teu tutu fakataha akinautolu.
5 Tuku ke ne buke mai ki hoku malohi, koeuhi ke ne fakalelei mo au; bea te ne fakalelei mo au.
6 Te ne gaohi ke aka akinautolu oku ha‘u ia Jekobe: e fiji mo moto a Isileli, bea fakafonu ae fuga o mamani aki ae fua.
¶ 7 Kuo ne ta‘i ia, o hage ko ene ta‘i akinautolu nae ta‘i ia? bea kuo tamate‘i ia o hage koe tamate‘i akinautolu kuo tamate‘i iate ia?
8 I hoo fekau atu ia naa ke fuofua kiate ia ae fakamāu: oku ne taofi a ene afā i he aho oe matagi hahake.
9 Koia koe mea ni e fakamaa ai ae hia a Jekobe; bea te ne ma‘u ae fua kotoabe ke ave ene agahala; oka gaohi eia ae gaahi maka kotoabe oe ejifeilaulauaga ke hage koe gaahi maka hinehina aia kuo momoji, e ikai tuu ki oluga ai ae gaahi akau fakamalumalu moe gaahi tamabua.
10 Ka e lala ae kolo kuo teuteu ki he tau, e liaki ae nofoaga, bea e tuku ia o hage koe toafa: e kai ai ae bulu mui, bea te ne tokoto i ai, o ne keina ae gaahi vaa litolito i ai.
11 Oka mae a hono gaahi vaa, e feji‘i ia: e ha‘u ae kau fefine o tutu ia: he koe kakai tae ilo ia: koia ia naa ne gaohi akinautolu e ikai te ne aloofa kiate kinautolu, bea koia naa ne fakafuofua akinautolu e ikai te ne fakaha ha ofa kiate kinautolu.
¶ 12 Bea e hoko o behe i he aho koia, e lohu‘i e Jihova hono gaahi fua, o fai mei he tafeaga oe gaahi vaitafe o a‘u ki he vaitafe o Ijibite, bea e tanaki akimoutolu o tautau toko taha, akimoutolu koe fānau o Isileli.
13 Bea e hoko o behe i he aho koia, e ifi ae mea lea lahi, bea e ha‘u akinautolu nae meimei mate i Asilia, bea moe kau auhe i he fonua ko Ijibite, bea e lotu kia Jihova i he mouga tabu i Jelusalema.