¶ 1 KOE malaia ki Aliela, ki Aliela, ae kolo nae nofo ai a Tevita! fakalahi ae tau ki he tau; tuku ke nau tamate‘i ae gaahi feilaulau.

2 Ka teu fakamamahi‘i a Aliela, bea e i ai ae ogojia moe mamahi: bea e behe ia kiate au o hage koe botu oe feilaulauaga.

3 Bea teu takatakai koe bea kabui koe aki ae mouga, bea teu laga ae gaahi kolo kiate koe.

4 Bea e fakavaivai‘i koe, bea te ke lea mei he kelekele, bea e maulalo ho le‘o mei he efu, bea e tatau ho le‘o mo ha taha oku iate ia ha laumalie kovi, mei he kelekele, bea e fafana ho le‘o mei he efu.

5 Bea koe toko lahi o hoo kau muli te nau hage koe efuefu momo iki, bea moe toko lahi oe kakai fakamanavahe te nau hage koe kafukafu oku mole atu: io, e hoko fakafokifa ia i he kemo be taha.

6 E aahi kiate koe e Jihova oe gaahi kau tau aki ae mana, bea moe mofuike, moe logoaa lahi, aki ae matagi lahi moe afā, bea moe ulo oe afi fakaauha.

¶ 7 Bea koe toko lahi oe gaahi buleaga kotoabe oku tau‘i a Aliela, io ko kinautolu kotoabe oku tau‘i ia mo ene kolo, bea oku fakamamahi‘i ia, te nau hage ko ha miji, be koe mea ha mai i he bo.

8 O hage koe miji ae tagata fiekaia, bea, vakai, oku hage oku ne kai; bea oka a ia oku gaogao hono laumalie: be hage koe miji a ha tagata fieinu, bea, vakai, hage oku inu ia; ka oku ne a, bea vakai, oku vaivai ia, bea oku ne holi: e behe be ae toko lahi oe gaahi buleaga kotoabe, oku tau‘i ae mouga ko Saione.

¶ 9 Mou tatali, bea ofo; mou kalaga, bea tagi: oku nau kona, kae ikai i he uaine; oku nau tajiba, kae ikai i he inu malohi.

10 He kuo liligi e Jihova kiate kimoutolu ae laumalie oe mohe mau, bea kuo tabuni ho mou mata: kuo ne fakabulou ae kau balofita mo hoo mou kau bule moe kau kikite.

11 Bea koe mea ha mai kotoabe kuo hoko kiate kimoutolu o tatau moe gaahi lea o ha tohi kuo tabuni, oku age e ha tagata ki ha toko taha oku boto, o behe, Oku ou kole kiate koe, ke ke lau ae mea ni, bea oku ne behe, Oku ikai teu faa fai ia he kuo mau ia;

12 Bea oku atu ae tohi kiate ia oku ikai boto, o behe, Oku ou kole kiate koe, ke ke lau ae mea ni: bea oku ne behe, Oku ikai teu boto.

¶ 13 Koia ne behe ai e Jihova, koe mea i he unuunu mai ae kakai ni kiate au aki ho nau gutu, bea fakaabaaba kiate au aki ho nau lougutu, ka kuo mamao ho nau loto iate au, bea koe nau manavahe kiate au oku tubu ia mei he gaahi fekau ae tagata be:

14 Koia, vakai, teu fai leva ha gaue fakaofo ki he kakai ni, io ae gaue fakaofo mo lahi: he koe boto oe nau kau tagata boto e auha ia, bea koe ilo oe nau kau tagata fakamākukaga e fufu ia.

15 E malaia akinautolu oku ahiahi lahi ke fufunaki ho nau loto mei a Jihova, bea oku fai i he bouli e nau gaahi gaue, bea oku nau behe, Kohai oku mamata kiate kitautolu? bea kohai oku ne ilo‘i akitautolu?

16 Koe mooni ko hoo mou fulifulihi ae gaahi mea e tatau moe umea oe tagata gaohi ibu: he e lea behe koa ae mea kuo gaohi kiate ia naa ne fakatufuga‘i, Nae ikai te ne gaohi au? be, e behe ae mea kuo gaohi kiate ia nae gaohi ia, Nae ikai haane ilo?

17 Ikai oku toetoe jii bea e liliu a Lebanoni ke hoko koe goue fua moui, bea koe goue fua e tatau ia moe vao akau?

¶ 18 Bea i he aho koia e fanogo ae tuli ki he gaahi lea oe tohi, bea e mamata ae mata oe kui mei he kakabu, bea mei he bouli.

19 Bea e ajili ai ae fiefia ae agavaivai ia Jihova, bea koe majiva i he kakai te nau fiefia i he Toko Taha Maonioni o Isileli.

20 He kuo mole ae toko taha nae fakamalohi, bea kuo auha moe tagata manuki, bea kuo tuuji ke motu akinautolu oku lama ke fai kovi.

21 Oku nau fakahalaia ha tagata i he kubu‘i lea, bea oku nau tau ae tauhele kiate ia oku valoki i he mataba, bea fakaafe ae agatonu i he mea tae aoga.

22 Koia oku behe ai e Jihova, aia naa ne huhui a Ebalahame, ki he fale o Jekobe, e ikai ma a Jekobe, bea e ikai liliu o tea hono mata.

23 Ka i he ene mamata ki he ene fānau, koe gaue a hoku nima, i he lotolotoga oia, te nau fakaabaaba ki hoku huafa, bea fakaabaaba ki he Toko Taha Maonioni o Jekobe, bea manavahe ki he Otua o Isileli.

24 Bea ko kinautolu foki nae hala i he laumalie te nau hoko o ilo, bea ko kinautolu nae lāuga te nau ma‘u ae akonaki.