¶ 1 VAKAI ki he eku tamaioeiki, aia oku ou boubou; aia kuou fili, bea oku fiefia iate ia hoku laumalie; kuou tuku hoku laumalie kiate ia: te ne fakaha ae fakamāu ki he gaahi Jenitaile.

2 E ikai te ne tagi, be hiki hake hono le‘o, be fakaogo atu ia i he hala.

3 E ikai te ne feji‘i ha kaho kuo volu, be tamate‘i ae māma oku kohu: te ne omi ae fakamāu ki he mooni.

4 E ikai te ne vaivai be manavajii, kae oua ke ne fokotuu ae fakamāu i mamani: bea e tatali ae gaahi motu ki he ene fono.

¶ 5 Oku behe e he Otua ko Jihova, aia naa ne fakatubu ae gaahi lagi, bea folahi atu ia; koia nae mafola atu ae fonua, bea mo ia oku tubu ai; koia oku foaki ae mānava ki he kakai i he fuga oia, moe laumalie kiate kinautolu oku eveeva i ai:

6 Ko au ko Jihova naaku ui koe i he maonioni, bea teu buke ho nima, bea tauhi koe, bea foaki koe koe fuakava oe kakai, koe māma ki he gaahi Jenitaile;

7 Ke fakaa ae mata oe kui, ke omi ae kau bobula mei he fale fakabobula, bea ko kinautolu oku nofo i he bouli mei he fale fakabobula.

8 Ko au ko Jihova: ko hoku huafa ia: bea ko hoku nāunāu e ikai teu foaki ki ha taha, be ko hoku fakamalo ki he gaahi tamabua kuo togi.

9 Vakai, kuo hoko ae gaahi mea mua, bea oku ou fakaha ae gaahi mea foou: i he heeki ke hoko oku ou fakaha ia kiate kimoutolu.

10 Hiva kia Jihova aki ae hiva foou, bea mo hono fakamalo mei he gataaga o mamani, akimoutolu oku alu hifo ki he tahi, bea mo ia kotoabe oku i ai; ae gaahi motu, moe kakai oku nofo ai.

11 Tuku ke hiki hake ho nau le‘o e he toafa moe gaahi kolo, ae gaahi nofoaga oku i Keta: tuku ke hiva ae gaahi kakai oe maka, tuku ke nau kalaga mei he tumutumu oe gaahi mouga.

12 Tuku ke nau atu ae ogoogolelei kia Jihova, bea fakaha hono fakamalo i he gaahi motu.

13 E haele atu a Jihova o hage koe tagata malohi aubito, te ne ue‘i hono houhau o hage koe tagata oku to‘a lahi: te ne kalaga, io, o kalaga malohi; te ne lava‘i hono gaahi fili.

14 Kuo fuoloa mo eku fakalogobe; naaku nofo be, o taofi au: ka teu tagi ni o hage ha fefine laga; teu fakaauha mo maumau‘i hifo fakataha.

15 Teu gaohi ke lala ae gaahi mouga moe botu tafugofuga, bea fakamomoa ae gaahi akau iki; bea teu gaohi ae gaahi vaitafe koe gaahi motu, bea teu fakamomoa moe gaahi anovai.

16 Bea teu omi ae kui i he hala nae ikai te nau ilo; teu tataki akinautolu i he gaahi hala nae ikai te nau ilo ki ai: teu gaohi ae bouli koe māma i ho nau ao, moe gaahi mea bikobiko ke totonu. Koe gaahi mea ni teu fai kiate kinautolu, ka e ikai liaki akinautolu.

¶ 17 E fakafoki kimui akinautolu, e ma lahi, akinautolu oku talala ki he gaahi tamabua kuo togi, akinautolu oku behe ki he gaahi fakatātā kuo hake, Ko ho mau otua akimoutolu.

18 Fanogo, akimoutolu oku tuli; bea jio, akimoutolu oku kui, koeuhi ke mou a.

19 Kohai oku kui, ka ko eku tamaioeiki? be tuli, o hage ko eku talafekau aia naaku fekau? kohai oku kui o hage koia oku haohaoa, bea kui o hage koe tamaioeiki a Jihova?

20 Oku ke mamata ki he gaahi mea lahi, ka oku ikai te ke tokaga‘i ia; o fakaava ae teliga, ka oku ikai te ke fanogo.

21 Oku fiemalie lahi a Jihova koeuhi ko ene maonioni aana; te ne hakeaki‘i ae fono, bea gaohi ke ogoogolelei ia.

22 Ka koe kakai eni kuo faao e nau gaahi mea, bea kuo vetea akinautolu; kuo moua akinautolu kotoabe i he gaahi luo, bea kuo fufu akinautolu i he gaahi fale fakabobula: oku bau ke bobula akinautolu, bea e ikai ha taha ke fakamoui; kuo faao akinautolu, bea oku ikai behe e ha taha, Ke toe omi.

23 Kohai iate kimoutolu te ne tokaga ki he mea ni? kohai te ne fakafanogo bea ogo‘i i he kuoga e hoko mai?

24 Kohai nae tuku a Jekobe ke vetea, bea mo Isileli ki he kau kaihaa? ikai ko Jihova, aia kuo tau fai hala ki ai? he nae ikai te nau fie eveeva i hono gaahi hala, bea nae ikai te nau talagofua ki he ene fono.

25 Koia kuo ne liligi kiate ia ae kakaha o hono houhau, bea moe malohi oe tau: bea kuo ne tutu ia o takatakai, ka nae ikai te ne faa ilo; bea nae vela ia, ka nae ikai tokaga hono loto ki ai.