¶ 1 KA koeni, oku behe e Jihova aia naa ne gaohi koe, E Jekobe, bea koia nae fakafuofua koe, E Isileli, Oua e manavahe: he kuou huhui koe, kuou ui koe aki ho higoa; oku aaku koe.

2 Oka ke ka alu i he vai, teu iate koe; bea i he gaahi vaitafe, e ikai te ke melemo ai: oka ke ka alu i he afi, e ikai te ke vela; bea e ikai alu hake iate koe ae ulo afi.

3 He ko au ko Jihova ko ho Otua, koe Toko Taha Maonioni o Isileli, ko ho Fakamoui: naaku foaki a Ijibite ko ho huhui, a Itiobea mo Siba maau.

4 Koe mea i hoo mahuiga i hoku ao, koia naa ke ogoogolelei ai, bea kuou ofa kiate koe: koia teu foaki ae kau tagata koeuhi ko koe, bea moe kakai koeuhi ko hoo moui.

5 Oua e manavahe: he oku ou iate koe: teu omi ho hako mei hahake, bea tanaki koe mei he luluga;

6 Teu behe ki he tokelau, Tukuage; bea ki he botu toga, Oua e taofi: omi hoku gaahi foha mei he mamao, mo hoku gaahi ofefine mei he gaahi gataaga o mamani;

7 Io akinautolu kotoabe oku ui aki hoku huafa: he kuo fakatubu ia keu ogoogolelei ai: naaku fakafuofua ia, io, naaku gaohi ia.

¶ 8 Omi ae kakai kui oku mata, bea moe tuli oku teliga.

9 Ke tanaki fakataha ae gaahi buleaga kotoabe, bea ke fakataha ae kakai: kohai iate kinautolu te ne fakaha ae mea ni, bea fakaha kiate kitautolu ae gaahi mea mua? tuku ke nau omi ae nau kau fakamooni, koeuhi ke nau tonuhia: be tuku ke nau fanogo, bea behe, Koe mooni ia.

10 Oku behe e Jihova, Ko eku kau fakamooni akimoutolu, bea ko eku tamaioeiki aia kuou fili: koeuhi ke mou ilo bea tui kiate au, bea ilo bau ko au ia: nae ikai ha Otua kuo fakatubu i mua iate au, bea e ikai ha taha kimui.

11 Ko au, io ko au, ko Jihova; bea oku ikai mo ha fakamoui ka ko au be.

12 Kuou fakaha, bea kuou fakamoui, bea kuou fakahinohino, i he ikai ha otua kehe iate kimoutolu: koia oku behe e Jihova, ko eku kau fakamooni akimoutolu. Ko au be koe Otua.

13 Io, i he heeki ai ae aho ko au ia; bea oku ikai ha taha te ne faa fakamoui mei hoku nima: teu gaue, bea kohai te ne taofi au?

¶ 14 Oku behe e Jihova, ko ho mou huhui, koe Toko Taha Maonioni o Isileli; Koe mea iate kimoutolu kuou fekau ki Babilone, bea kuo omi ki lalo ho nau houeiki, bea moe kakai Kalitia, aia oku i he gaahi vaka e nau tagi.

15 Ko au ko Jihova, ko ho mou Toko Taha Maonioni, koe Tubuaga o Isileli, ko ho mou Tu‘i.

16 Oku behe e Jihova, aia oku gaohi ae aluaga i he moana, bea moe hala i he gaahi vai lahi;

17 Aia oku omi ae saliote moe hosi, ae kogakau moe malohi: te nau tokoto fakataha, e ikai te nau tuu ki oluga: kuo nau auha, kuo fuifui akinautolu o hage koe filo oe māma.

¶ 18 Oua naa mou manatu ki he gaahi mea mua, be tokaga ki he gaahi mea motua.

19 Vakai, teu fai ha mea foou; e tubu hake ni ia; bea ikai te mou ilo ia? io teu gaohi ha hala i he botu lala, moe gaahi vaitafe i he toafa.

20 E fakaabaaba kiate au ae faga manu oe vao, ae talakone moe gaahi lulu: koeuhi oku ou foaki ae vai i he botu lala, moe vaitafe i he toafa, ke atu ae inu ki hoku kakai kuou fili.

21 Kuou gaohi ae kakai ni maaku; te nau fakaha hoku ogoogolelei.

¶ 22 Ka nae ikai te ke ui kiate au, E Jekobe; ka kuo ke fiu iate au, E Isileli.

23 Oku heeki te ke omi ae faga lami o hoo gaahi feilaulau tutu; bea teeki ai te ke fakaabaaba aki hoo gaahi feilaulau. Nae ikai teu fekau ke ke tauhi au aki ha mea foaki, be fakaogojia koe i he omi ae mea namu kakala.

24 Oku heeki te ke fakatau maaku ae akau namu kakala aki ha baaga, bea oku heeki te ke fakamakona au aki ae gako o hoo gaahi feilaulau; ka kuo ke taomia au aki hoo gaahi hia, kuo ke fakafiu‘i au i hoo gaahi fai kovi.

25 Ko au, io ko au ia, aia oku tamate‘i hoo gaahi hia koeuhi ko au, bea e ikai teu manatu hoo gaahi agahala.

26 Fakamanatu‘i au: ke tau fefakamāuaki: fai hoo fakamatala, koeuhi ke ke tonuhia.

27 Kuo fai hala hoo uluaki tamai, bea kuo talagataa kiate au hoo kau akonaki.

28 Bea kuo fakalielia‘i e ho gaahi houeiki hoku fale tabu, koia teu tuku a Jekobe ki he malaia, bea ko Isileli ki he valoki.