¶ 1 FANOGO kiate au, akimoutolu oku muimui ki he maonioni, akimoutolu oku kumi kia Jihova: vakai ki he maka nae ta mei ai akimoutolu, bea ki he ava oe luo nae keli akimoutolu mei ai.

2 Vakai kia Ebalahame ko hoo mou tamai, bea kia Sela naa ne fua akimoutolu: he naaku ui ia toko taha be, bea tabuaki ia, beau fakatokolahi ia.

3 Koeuhi e fakafiemalie‘i e Jihova e Saione: te ne fakafiemalie‘i hono gaahi botu lala kotoabe; bea te ne gaohi hono toafa ke hage ko Iteni, bea ko hono botu liaki o hage koe goue a Jihova; e ilo i ai ae fiefia moe nekeneka, koe fakafetai, bea moe le‘o oe Same.

¶ 4 Fanogo kiate au, a hoku kakai, bea tokaga kiate au, a hoku buleaga: koeuhi e alu atu iate au ha fono, bea teu gaohi eku fakamāu ke nofo koe māma oe kakai.

5 Oku ofi eku maonioni; kuo alu atu eku fakamoui, bea e fakamāu e hoku nima ae kakai; e tatali kiate au ae gaahi motu, bea te nau falala ki hoku nima.

6 Hiki hake ho mou mata ki he gaahi lagi, bea jio ki he mamani i lalo: koeuhi e mole fakafokifa ae gaahi lagi o hage koe ohuafi, bea e fakaau o motua a mamani o hage koe kofu, bea e mate foki mo kinautolu oku nofo ai: ka oku tologa taegata a eku fakamoui, bea e ikai gata eku maonioni.

¶ 7 Fanogo kiate au, akimoutolu oku ilo ae maonioni, ae kakai oku i ho nau loto a eku fono; oua te mou manavahe ki he valoki ae kakai, bea oua te mou ilifia i he e nau lauikovi.

8 Koeuhi e kai o oji akinautolu e he ane o hage koe kofu, bea e kai akinautolu e he uaga o hage koe fulufulu‘i sibi: ka oku tologa taegata a eku maonioni, bea ko eku fakamoui mei he toutagata ki he toutagata.

¶ 9 Ke ke a, ke ke a, ai ae malohi, E nima o Jihova; ke ke a, o hage koe gaahi aho i mua, i he gaahi toutagata i mua. Ikai ko koe ia nae tuuji a Lehabi, bea nae ta‘i ae talakone?

10 Ikai ko koe ia kuo ke fakamomoa ae tahi, ae gaahi vai oe fuu moana; akoe kuo gaohi ae gaahi loloto oe tahi koe hala ke alu ai ae kakai kuo huhui?

11 Koia, e toe foki mai ae kakai kuo huhui e Jihova, bea ha‘u moe hiva ki Saione; bea e i ho nau ulu ae fiefia o taegata: te nau ma‘u ae fiefia moe nekeneka; bea e buna atu ae mamahi moe tagi.

12 Ko au, io ko au ia, oku fakafiemalie‘i koe: kohai koe, ke ke manavahe ki ha tagata aia e mate, bea ki he foha oe tagata aia e gaohi o hage koe mohuku;

13 Bea oku ke fakagalogalo‘i a Jihova ko ho tubuaga, aia kuo ne fofola ae gaahi lagi, bea ai moe gaahi tuuga o mamani; bea kuo ke manavahe mau ai be i he aho kotoabe koeuhi koe ita oia oku fakamalohi, o hage oku ne teu ke fakaauha? bea kofaaia ae lili oe fakamalohi?

14 Oku lele tootoo ae bobula ke vete ia, bea ke oua naa mate ia i he luo, bea ke oua naa oji ene ma.

15 Ka ko au ko Jihova ko ho Otua, naaku vaeua ae tahi, aia nae uulu hono beau: ko hono huafa ko Jihova oe gaahi kau tau.

16 Bea kuou ai eku gaahi lea ki ho gutu, bea kuou fufu koe aki ae malumalu o hoku nima, koeuhi keu to ae gaahi lagi, bea ai moe gaahi tuuga o mamani, bea behe ki Saione, Ko koe ko hoku kakai.

¶ 17 Ke ke a, ke ke a, tuu hake, E Jelusalema, akoe kuo inu i he nima o Jihova ae ibu o hono houhau; kuo ke inu ae efe oe ibu oe tetetete, bea tatau ia.

18 Oku ikai ha taha ke fakahinohino ia i he gaahi foha kotoabe kuo ne fanau‘i; bea oku ikai ha niihi oku buke ki hono nima i he gaahi foha kotoabe kuo ne tauhi.

19 Kuo hoko ae mea ni e ua kiate koe; kohai e mamahi koeuhi ko koe? koe maumau, mo fakaauha, moe hoge, moe heleta: teu fakafiemalie‘i koe i ahai?

20 Kuo bogia hoo gaahi foha, oku nau tokoto i he ulu oe gaahi hala kotoabe, o hage koe bulu tagata oku hehegi i he kubega: oku nau fonu i he houhau o Jihova, moe valoki mei ho Otua.

¶ 21 Koia fanogo ki he mea ni, akoe koe mahaki, moe kona, kae ikai i he uaine:

22 Oku behe ho Eiki ko Jihova, bea ko ho Otua oku lagomaki‘i a hono kakai, Vakai, kuou too mei ho nima ae ibu oe tetetete, io ae efe oe ibu o hoku houhau; e ikai te ke toe inu ia;

23 Ka teu ai ia ki he nima onautolu oku fakamamahi‘i koe; akinautolu kuo behe ki ho laumalie, Bunou hifo, ka mau laka atu: bea kuo ke fakatokoto ho jino o hage koe kelekele, bea hage koe hala, kiate kinautolu nae alu ai.