¶ 1 HIVA, ae baa, akoe nae ikai te ke fanau; ke ke hiva, bea kalaga le‘o lahi, akoe nae ikai te ke laga i ha tamajii: he oku behe e Jihova, Oku toko lahi hake ae fānau ae liaki i he fānau oe fefine kuo mali.

2 Fakalahi ae botu o ho fale fehikitaki, bea tuku ke nau fofola ae buibui o ho gaahi nofoaga: oua e taofi, fakaloloa hoo gaahi afo, bea tutuki ke mau hoo gaahi tuki boubou;

3 He te ke alu atu ki he nima toomatau, bea ki he toohema; bea e ma‘u e ho hako ae gaahi Jenitaile, bea e fakakakai ae gaahi kolo nae lala.

4 Oua e manavahe; koeuhi e ikai te ke ma: bea oua naa ke bubutuu; koeuhi e ikai fakama‘i koe: he te ke fakagalo‘i ae ma o hoo kei talavou, bea e ikai te ke toe manatu ki he valoki o hoo nofo taka be i he mate ho unoho.

5 He ko ho Tubuaga kuo fakamau mo koe; ko Jihova oe gaahi kau tau ko hono huafa ia; bea ko ho Huhui koe Toko Taha Maonioni o Isileli; e ui ia koe Otua o mamani kotoabe.

6 He kuo ui koe e Jihova o hage koe fefine liaki bea mamahi i hono laumalie, bea hage koe unoho i he ene kei jii, ka kuo liaki, oku behe e ho Otua.

7 I he kihi‘i fuoloa jii kuou liaki koe; ka i he gaahi aloofa lahi teu tanaki koe.

8 I he houhau jii naaku fufu hoku fofoga meiate koe i he kemo be; ka i he ofa taegata teu aloofa kiate koe, oku behe e Jihova ko ho Huhui.

9 He oku tatau ae mea ni kiate au moe gaahi vai o Noa: o hage kuou fuakava e ikai toe lomaki a mamani aki ae gaahi vai o Noa; oku behe eku fuakava e ikai teu houhau kiate koe, be valoki‘i koe.

10 Koeuhi e mole ae gaahi mouga, bea hiki moe gaahi tafugofuga; ka ko eku ofa e ikai mole meiate koe, bea e ikai hiki ae fuakava o eku melino, oku behe e Jihova aia oku aloofa kiate koe.

¶ 11 Akoe koe mamahi, bea viligia i he matagi, bea tae fiemalie, vakai, teu ai hoo gaahi maka i he lanu lelei, bea ai hoo gaahi tuuga aki ae gaahi safaia.

12 Bea teu gaohi ho gaahi mataba jioata aki ae akete, bea mo ho gaahi mataba aki ae kabunikale, bea mo ho gaahi gataaga aki ae gaahi maka mahuiga.

13 Bea e akonaki‘i e Jihova hoo fānau kotoabe; bea e lahi ae fiemalie i hoo fānau.

14 E fokotuu mau koe i he maonioni: te ke mamao moe fakamalohia; koeuhi e ikai te ke manavahe: bea mei he ilifia; koeuhi e ikai ha‘u ia o ofi kiate koe.

15 Vakai, koe mooni te nau tanaki fakataha, ka e ikai iate au: koia kotoabe e fakataha koe fili kiate koe e higa koeuhi ko koe.

16 Vakai, kuou fakatubu ae tufuga ukamea aia oku tabili ae malala i he afi, bea oku omi ae mea fakatufuga ki he ene gaue; bea kuou fakatubu ae fakaauha ke fakaauha‘i.

¶ 17 E ikai monuia ha mahafu tau kuo gaohi ke tau‘i koe; bea koe elelo kotoabe e lea kovi kiate koe te ke fakamalaia i he fakamāu. Ko eni ae tofia oe kau tamaioeiki a Jihova, bea oku meiate au e nau maonioni, oku behe e Jihova.