¶ 1 OKU bekia ae kakai maonioni, ka oku ikai tokaga ki ai e ha tagata: bea oku ave ae kakai lotu mooni, ka e ikai ilo e ha taha oku ave ae kakai maonioni mei he kovi.

2 Te ne hu i he fiemalie: te nau mālōlō i ho nau gaahi mohega, akinautolu oku eveeva i he agatonu.

¶ 3 Kae unuunu mai ki heni, akimoutolu ae gaahi tama ae fefine fiemana, koe hako oe tonofefine moe feauaki.

4 Oku mou manuki ki ahai? oku fakamaga ho mou gutu ki ahai, bea fakatetee ae elelo? ikai koe fānau akimoutolu oe agatuu, koe hako oe loi,

5 Oku fakavela aki akimoutolu ae gaahi tamabua i he lolo akau moui kotoabe, o tamate‘i ae fānau tubu i he gaahi telea i he lalo lilifa?

6 Oku i he gaahi maka molemole oe vaitafe a ho inaji; koia, io, koia foki ko ho inaji: io kuo ke liligi ki ai ae feilaulau inu, kuo ke atu ki ai ae feilaulau kai. Bea teu ma‘u koa ae fiemalie i he gaahi mea ni?

7 Kuo ke ai ho mohega i he mouga maoluga: io naa ke alu hake ki ai ke fai hoo feilaulau.

8 Bea i he tua mataba moe tua bou kuo ke fokotuu hoo fakamanatu: he kuo ke liaki au ma ha taha kehe, bea kuo ke alu hake, kuo ke fakalahi ho mohega, bea fai ae fuakava mo kinautolu; naa ke manako ki ho nau mohega i he botu naa ke mamata ki ai.

9 Bea ne ke alu ki he tu‘i moe mea tākai, bea nae fakalahi hoo gaahi mea namu kakala, bea fekau ki he mamao hoo kau talafekau, bea ne ke fakalielia‘i koe o a‘u ki heli.

10 Kuo ke ogojia i hono lahi o ho hala; ka nae ikai te ke behe, Oku ikai ha amanaki: kuo ke ilo ae moui a ho aima; koia nae ikai te ke mamahi ai.

11 Bea kohai kuo ke ilifia mo manavahe ki ai koeuhi ke ke loi, kae ikai te ke manatu kiate au, be tokaga loto ki ai? ikai kuou fakalogobe o fuoloa, bea nae ikai te ke manavahe kiate au?

12 Teu fakaha hoo maonioni, bea mo hoo gaue; koeuhi e ikai te nau aoga kiate koe.

¶ 13 Oka ke ka tagi, tuku ke fakamoui koe e hoo kakai toko lahi: ka e avea akinautolu kotoabe e he matagi; e ave akinautolu e he vaiga: ka koia oku falala kiate au te ne ma‘u ae fonua, bea nofo i hoku mouga tabu;

14 Bea e behe eia, Mou laku hake, mou laku hake, teuteu ae hala, too ae tūkiaaga mei he hala o hoku kakai.

15 He oku behe e he Toko Taha lahi mo maoluga aia oku afio i he taegata, ko hono huafa koe Maonioni; Oku ou nofo i he botu maoluga mo maonioni, bea iate ia foki oku loto fakatomala mo agavaivai, ke fakamoui ae loto okinautolu oku fakatomala.

16 Koeuhi e ikai teu fai mau ai be, bea e ikai teu houhau mau ai be koeuhi e vaivai ae laumalie i hoku ao, bea moe gaahi laumalie kuou gaohi.

17 He naaku houhau koeuhi koe hia o ene manumanu, bea teia ia: naaku fufu au, bea neu houhau, bea nae alu talagataa ia i he hala o hono loto.

18 Kuou vakai ki hono gaahi hala, bea teu fakamoui ia: teu tataki foki ia, bea toe atu ae gaahi fakafiemalie kiate ia mo ene kau mamahi.

19 Oku ou fakatubu ae fua oe lougutu; Fiemalie, fiemalie kiate ia oku kei mamao, bea kiate ia oku ofi, oku behe e Jihova; bea teu fakamoui ia.

20 Ka oku tatau ae agakovi moe tahi hou, oku ikai faa toka lelei ia, oku laku hake e hono gaahi beau ae belebela moe uli.

21 Oku behe e hoku Otua, Oku ikai ha fiemalie ki he agahala.