Vahe 6
1 Koe ha mai ae nāunāu o Jihova kia Isaia. 5 Oku manavahe ai ia, bea fakamalohi ia ki he ene gaue. 9 Oku ne fakaha ae baogataa ae kakai ki he e nau malaia. 13 Koe toega kakai e moui.
¶ 1 I HE ta‘u nae bekia ai ae tu‘i ko Usia neu mamata kia Jihova oku afio i hono afioaga, kuo maoluga mo hiki hake, bea ko hono kofu tōtōlofa nae fonu ai ae fale lotu lahi.
2 Bea nae tuu i oluga ae selafimi: nae taki ono ho na kabakau; naa ne fakabulou aki hono mata ae ua, bea ne ufiufi aki hono va‘e ae ua, bea ne buna aki ae ua.
3 Bea naa na lea fetaliaki, o behe, Oku maonioni, oku maonioni, oku maonioni, a Jihova oe gaahi kau tau: oku fonu a mamani kotoabe i hono nāunāu.
4 Bea nae gau‘eu‘e ae gaahi bou oe mataba i he le‘o oia nae ui, bea nae fakafonu ae fale i he ohu afi.
¶ 5 Bea neu toki behe, Kuou malaia au! he kuou auha; koeuhi koe tagata lougutu tae maa au, bea oku ou nofo i he lotolotoga oe kakai lougutu tae maa: he kuo mamata a hoku mata ki he Tu‘i, ko Jihova oe gaahi kau tau.
6 Bea nae toki buna mai ae toko taha oe Selafimi kiate au, nae i hono nima ae malala‘i afi, aia naa ne too aki ae hikofi mei he feilaulauaga.
7 Bea naa ne ai ia ki hoku gutu, mo ne behe, vakai kuo tau ae mea ni ki ho lougutu; bea kuo too o ave hoo hia, bea kuo fakamaa hoo agahala.
8 Bea neu fanogo foki ki he le‘o o Jihova, nae behe, Kohai teu fekau, bea kohai e alu ma amautolu? Bea neu toki behe, Ko au eni; ke ke fekau au.
¶ 9 Bea naa ne behe, Alu, bea tala ki he kakai ni, Oku mou fanogo mooni, kae ikai ogo‘i; bea oku mou mamata bau, kae ikai ilo‘i.
10 Gaohi ke fagabeji ae loto oe kakai ni, bea gaohi ke mamafa ho nau teliga, bea tabuni ho nau mata; telia naa nau mamata aki ho nau mata, bea fanogo aki ho nau teliga, bea ilo aki ho nau loto, bea liliu, bea hoko o moui.
11 Bea neu toki behe, E Jihova, e fefe hono fuoloa? Bea naa ne behe mai, Ke oua ke lala ae gaahi kolo o ikai ha toko taha ke nofo ai, bea ikai ha tagata i he gaahi fale, bea lala aubito ae fonua,
12 Bea ke oua ke ave e Jihova ae kakai, bea hoko ae liaki lahi ki he fonua.
¶ 13 Ka e i ai ae vahe e hogofulu, bea e toe foki ia, bea e keina ia; ka e hage koe akau koe teili, bea hage koe oke, oka ta hifo oku kei tuu hono aka: e behe e hoko ae hako maonioni koe aka oe buleaga.