1. Na, ka meinga e te Ariki, te Atua, te mate kai kia tino kaha i roto i te whenua o Uru, a na tera i mate ai a Harana, toku teina; engari a Teraha toku papa, e ora ana ano i roto i te whenua o Uru o nga Karari,

2. Nawai a, ka tango ahau, a Aperahama i a Harai hei wahine, a ka tango a Nehoro, toku teina i a Mireka hei wahine, a ko raua nga tamahine a Harana.

3. Na, kua mea mai te Ariki ki a au: E Aperahama, haere atu koe i tou whenua, i tou iwi, i te whare o tou papa, ki te whenua e whakaaturia e ahau ki a koe.

4. No reira i mahue i a au te whenua o Uru o nga Karari, kia haere atu ki te whenua o Kanaana, a ka mau ahau ki a Rota, ki te tama a toku teina, me tana wahine, me Harai taku wahine; a i aru ano hoki toku papa i muri i a au, ki te whenua i karangatia e matou ko Harana.

5. A ka iti iho te hemo kai; a ka noho toku papa i Harana, a tuturu ana ki reira, i te nui hoki o nga kahui i Harana; a ka tahuri ano toku papa ki tana mahi karakia whakapakoko, no reira ia i noho tonu ai i Harana.

6. Engari, ko ahau, ko Aperahama me Rota, te tama a toku teina, i inoi ake ki te Ariki, a ka puta mai te Ariki ki a au, ka mea ki a au: E ara, mauria a Rota i a koe; no te mea kua whakaaro ahau ki te tango atu i a koe ki waho o Harana, me te whakarite i a koe hei minita, hei kawe atu i toku ingoa ki roto i tetahi whenua tauhou e hoatu e ahau ki ou uri i muri i a koe, he whenua tupu mo ake tonu atu, ina ka whakarongo mai ratou ki toku reo.

7. No te mea, ko ahau te Ariki, tou Atua, e noho ana ahau i te rangi; ko te whenua toku turanga waewae; e totoro atu ana ahau i toku ringa i runga i te moana, a ngohengohe ana ki toku reo; a ka meinga e ahau te hau me te ahi hei hariata moku; a mea atu ana ahau ki nga maunga—Neke atu—a nana, ka kahakina tonutia atu ratou e nga awhiowhio,

8. Ko Ihowa toku ingoa, a e mohio ana ahau te mutunga mai o te timatanga; no reira ka mau tonu toku ringa i runga i a koe.

9. A ka meinga koe e ahau hei iwi nui, a ka manaakitia koe e ahau i runga noa atu i te mehua, a ka meinga tou ingoa kia nui i waenganui i nga iwi katoa, a ko koe he manaakitanga mo ou uri i muri i a koe, kia mauria atu e ratou ki roto i o ratou ringaringa tenei mahi minita, me tenei Tohungatanga ki nga iwi katoa;

10. A ka manaaki ahau i a ratou ma roto i tou ingoa; no te mea ko nga mea o ratou e whiwhi ki tenei Rongo-pai, e karangatia ki tou ingoa, a ka meinga ratou hei uri mou, a ka ara ake ratou, ka whakanui i a koe, ano ko to ratou matua.

11. A ka manaaki ahau i a ratou, e manaaki ana i a koe; a ka kanga i a ratou e kanga ana i a koe; a ma roto i a koe (ara i tou Tohungatanga) i roto hoki i ou uri, (ara i tou Tohungatanga) no te mea ka hoatu e ahau ki a koe he kupu whakaari, ka mau tonu tenei tikanga i roto i a koe, i roto hoki i ou uri i muri i a koe, (ara nga uri tuturu) ka manaakitia ai nga hapu katoa o te whenua, ae ra, ki nga manaakitanga o te Rongo-pai, ko era nei nga manaakitanga o te whakaoranga me te oranga-tonutanga.

12. Na i muri iho i ta te Ariki korerotanga mai ki a au, me te ngaronga atu o tona mata i a au, ka mea ahau i roto i toku ngakau: I rapu marire to pononga i a koe; na kua kitea koe e ahau;

13. I tonoa mai e koe tau anahera hei whakaputa i a au i nga atua o Erekana, a he mahi pai maku ko te whakarongo ki tou reo, mo reira tukua tau pononga kia ara ake, kia haere atu i runga i te rangimarie.

14. No reira ahau, a Aperahama me Rota hoki i haere ai, rite tonu ki ta te Ariki i mea ai ki a au; na ko ahau, ko Aperahama, kua ono tekau ma rua nga tau, te pakeke, i te wa i puta atu ai ahau i Harana.

15. I maua ano hoki e ahau a Harai, taku i tango ai hei wahine i a au i Uru i Karari, me Rota, te tama a toku teina, me a matou mea katoa i whakawhaitiria e matou, me nga wairua i riro mai i a matou i Harana, a haere mai ana ma te aronga atu ki te whenua o Kanaana, a noho teneti ana i a matou e haere atu ana;

16. No reira, ko te mau tonu to matou uhi, me to matou kamaka, me to matou whakaoranga, i a matou e haere mai ana i Harana, ma te aronga atu ki Herehona, kia haere mai ki te whenua o Kanaana.

17. Na, ka hanga e ahau, e Aperahama, he aata i te whenua o Herehona, a hoatu ana he whakahere ki te Ariki, me te inoi kia whakatahuritia atu te hemo kai i te whare o toku papa, kia kore ai ratou e ngaro.

18. Na, ka pahemo mai matou i Herehona, ma roto i te whenua ki te wahi o Hekeme; i roto tera i nga mania o More, a kua tae ke matou ki nga rohe o te whenua o nga Kanaana, a i tapaea atu e ahau he whakahere i roto i nga mania o More, a ka karanga marie atu ki te Ariki, no te mea kua tae matou ki roto i te whenua o tenei iwi karakia whakapakoko.

19. A puta mai ana te Ariki ki a au hei whakautu i aku inoi, a ka mea mai ki a au: Ka hoatu e ahau tenei whenua ki ou uri.

20. A ka whakatika ake e ahau, a Aperahama, i te wahi i hanga ai e ahau te aata ki te Ariki, a ka neke atu i reira ki tetahi maunga i te taha rawhiti o Peteere, a whakaturia ana e ahau toku teneti i reira, a ko Peteere ki te taha hauauru, ko Hai ki te taha rawhiti; a i hanga e ahau tetahi aata ano ki te Ariki, me te karanga ano ki runga i te ingoa o te Ariki.

21. Na, ka haere ano ahau, a Aperahama, e haere atu ana whaka-te-tonga; a e mau tonu ana te mate kai i runga i te whenua; na ka whakaaro ahau a Aperahama kia haere ki raro ki Ihipa, hei noho ki reira, no te mea kua kino rawa te mate kai.

22. Nawai a, i a au e whakatata ana te uru atu ki Ihipa, ka mea mai te Ariki ki a au: Nana, he wahine ataahua a Harai, tau wahine, ki te titiro atu;

23. No reira, ina kite nga Ihipiana i a ia tera ratou e mea—He wahine tenei mana; a ka patu ratou i a koe, engari ka whakarauorangia ia e ratou; no reira kia penei tau e mea ai;

24. Me ki atu ia ki nga Ihipiana, he tuahine ia nou, a ka ora ai koe.

25. Nawai a, ka korero atu ahau, a Aperahama, ki a Harai, ki taku wahine i nga mea katoa i korero ai te Ariki ki a au—No reira taku inoi ki a koe mea atu ki a ratou, he tuahine koe noku, kia whai painga ahau mo te taha ki a koe, na konei ahau e ora ai, mou te take.