1. Na, i a au, i a Aperahama te Urimi me te Tumime, i homai ai ki a au e te Ariki, e te Atua, i te whenua o Uru o nga Karari;

2. A ka kite ahau i nga whetu, he mea nunui rawa, a kotahi o era e tata atu ana ki te torona o te Atua; a he tini nga mea nunui e tata atu ana ki reira;

3. Na, ka mea mai te Ariki ki a au: Ko enei nga kai whakahaere; a ko te ingoa o te mea nui rawa, ko Korapa, no te mea e tata ana mai ki a au, no te mea ko ahau te Ariki, tou Atua; naku tenei i whakarite hei kai-whakahaere mo era atu katoa, no roto ano i taua ritenga, pera me tena e tu na koe i runga.

4. A ka mea mai te Ariki ki a au, ma roto i te Urimi me te Tumime, ko Korapa e rite ana ki te tauira a te Ariki, ki ona taima, ki ona wa i to reira taka-hurihuri; ara, kotahi takahurihuritanga kotahi ra ki te Ariki, i runga i tana ritenga tatau, a kotahi mano tau e rite ana ki te taima i whakaritea mo te whenua e tu na koe i runga. Koia nei ta te Ariki tatau i te taima, e rite ana ki te tatau taima o Korapa.

5. Na, ka mea mai te Ariki ki a au: Ko te ao iti na te marama, iti iho i tera e tohutohu ana i te awatea, ae ra, ko te po, kei runga ake, ara nui noa ake i tena e tu na koe i runga, i runga i te ahua o te tatau, no te mea e ata haere ana tera; e tika ana tenei no te mea e tu ana tera i runga ake i te whenua, i tena e tu na koe i runga, no reira i kore ai tona tatau taima e rite te nui ki nga ra, ki nga marama me nga tau.

6. A ka mea te Ariki ki a au: Na e Aperahama, ko enei tikanga e rua he tika, nana, e kite ana ou kanohi i tera; e hoatu ana hoki ki a koe te mohiotanga ki nga taima o te tatau, me te taima kua whakaritea, ae ra, te taima kua whakaritea mo te whenua e tu na koe i runga, me te taima kua whakaritea mo te marama nui, kua meinga hei tohutohu mo te awatea, me te taima kua whakaritea mo te marama tuaiti kua meinga hei tohutohu i te po.

7. Na, ko te taima kua whakaritea mo te marama tuaiti, roa atu i te taima o tona tatau i te tatau o te taima o te whenua e tu na koe i runga.

8. A ko te wahi o enei e rua, tera ano tetahi atu kei runga atu i era, ara tera ano tetahi atu ao, e roa atu ana tona tatau i te taima;

9. A pera ano te tatau o nga taima o tetahi ao i runga ake o tetahi, a tata noa ki a Korapa, ko taua Korapa e rite ana ki ta te Atua tatau i nga taima; ko Korapa e tata atu ana ki te torona o te Atua, hei whakahaere i nga ao no taua ritenga ano o tena e tu na koe i runga.

10. A e hoatu ana ki a koe kia mohio ai koe ki nga taima kua whakaritea mo nga whetu katoa kua meinga hei homai i te marama a tae noa atu ki te torona o te Atua.

11. Na konei, ko ahau, ko Aperahama i korero ki te Ariki, he kanohi, he kanohi, ano he tangata e korero ana tetahi ki tetahi; a i korerotia mai e ia ki a au nga mahinga o ona ringaringa;

12. Na, ka mea mai a ia ki a au: E taku tama, e taku tama (me te totoro tona ringa), nana, ka whakaaturia e ahau ki a koe enei mea. A ka whakapa mai tona ringa ki oku kanohi, a ka kite ahau i nga mea kua hanga nei e ona ringaringa, he maha rawa; a ka tini haere i mua i oku kanohi, kore ake i ahei ahau te kite i tona mutunga.

13. Na ka mea mai ia ki a au: Ko Hineha tenei, ko te ra. A ka mea ia ki a au: Ko Kokopa he whetu. A ka mea ia ki a au: Ko Oria he marama. A ka mea ano ia ki a au: Ko Kokaupima, tona tikanga ko nga whetu, ara ko nga whakamarama nunui katoa, i roto i te kikorangi.

14. A he po te wa i korero mai ai te Ariki ki a au i enei kupu: Ka meinga koe e ahau kia tini, me ou uri hoki i muri i a koe, kia rite ki enei; a me he mea e taea ana e koe te tatau te maha o nga onepu, koia ra te tini o ou uri.

15. Na, ka mea mai te Ariki ki a au: E Aperahama, ka whakaaturia e ahau enei mea ki a koe i mua atu o tou haerenga ki Ihipa, kia ahei ai i a koe te korero i enei kupu.

16. Me he mea, tera etahi mea e rua, a kei runga atu ano tetahi i era, a tera ano he mea nui kei runga atu i era; no reira ko Korapa te mea nui rawa o era atu Kokaupima kua kitea na e koe, no te mea koia ra te mea tata mai ki a au.

17. Na, me he mea, e rua nga mea, kotahi kei runga atu i tetahi, a ko te marama kei runga atu i te whenua, no reira tera ano tetahi ao, whetu ranei e tu ana i runga atu i tera; a kahore he mea e whakaarohia ana e te Ariki e tou Atua, i roto i tona ngakau e kore e meatia e ia.

18. He ahakoa ra i hanga e ia te whetu nui; he pera hoki, me he mea e rua nga wairua a ko tetahi e nui atu ana tona matauranga i to tetahi, otira ko enei wairua e rua, ahakoa e nui atu ana te matauranga o tetahi i tetahi, kahore he timatanga; i te ora raua i mua, kahore o raua mutunga, ka ora a muri no te mea he mutunga-kore raua.

19. A ka mea mai te Ariki ki a au: E tika ana enei mea e rua, ara, e rua nga wairua, ko tetahi nui ake te matauranga i tetahi; tera ano tetahi nui atu te matauranga i a raua; ko ahau te Ariki, tou Atua, nuku atu toku matauranga i o era atu katoa.

20. Na te Ariki, na tou Atua i tono tana anahera ki te whakaputa i a koe ki waho i nga ringaringa o te tohunga o Erekana.

21. A e noho ana ahau i waenganui i a ratou; no reira ahau i haere iho ai ki a koe ki te whakapuaki i enei mahi kua mahia nei e oku ringaringa, a nui atu toku matauranga i o era atu katoa, no te mea ko ahau te kai whakahaere o nga rangi i runga, me te whenua i raro, me te matauranga katoa, me te whai-whakaaro, i runga i nga mea katoa kua kitea na e ou kanohi i te timatanga; i haere iho ahau i te timatanga i waenganui i nga mea whai-whakaaro kua kitea na e koe.

22. Na, kua whakaaturia mai e te Ariki ki a au ki a Aperahama, nga mea whai-whakaaro i hanga nei i mua atu o te ao; a i roto i enei he maha nga mea nunui, papai hoki.

23. Na, ka kite te Ariki i enei wairua e pai ana ratou, a ka tu ake ia i waenganui i a ratou, a ka mea ia: Ko enei ka meinga e ahau hei rangatira maku; no te mea i tu ia i waenganui i ena wairua, a kite ana ia, e pai ana ratou; a ka mea mai ia ki a au: E Aperahama, ko koe tetahi o ratou; i whiriwhiria koe i mua o tou whanautanga.

24. A tu ana tetahi i waenganui i a ratou, e rite ana ki te Atua, a ka mea atu ia ki te hunga i a ia ra: Me heke tatou ki raro, no te mea he takiwa watea kei reira, me mau e tatou enei taputapu, a kia hanga he whenua e tatou kia noho enei ki runga;

25. A me whakamatau e tatou ratou, kia kitea ai me he mea ka mea ratou i nga mea katoa i whakahau ai te Ariki to ratou Atua i a ratou;

26. A ko ratou e pupuri ana i o ratou ahua tuatahi ka whakanekehia ake; a ko ratou kahore i pupuri i to ratou ahua tuatahi e kore e whai kororia i roto i taua kingitanga ano i era e mau nei i to ratou ahua tuatahi; a ko ratou e pupuri ana i to ratou ahua tuarua, ka tapiritia atu te kororia ki runga i o ratou matenga mo ake, ake tonu atu.

27. Na, ka mea te Ariki: Ko wai hei tononga maku ? A ka whakahokia atu e tetahi e rite ana ki te Tama a te Tangata: Tenei ahau, ngarea ahau. A ka whakahokia e tetahi atu, a ka mea: Tenei ahau, ngarea ahau. A ka mea te Ariki: Ka unga e ahau ko te tuatahi.

28. A, ka riri te tuarua, ka kore i pupuri tona ahua tuatahi; a i taua ra he tokomaha i aru i a ia.