1. Na penei ka oti i a tatou nga rangi me te whenua, me nga mano tini o reira.

2. A ka mea nga Atua i waenganui i a ratou ano: Hei te wa tuawhitu e whakaoti ai i a tatou mahi kua whakariteritea nei e tatou; a ka okioki tatou i te wa tuawhitu i a tatou mahi katoa kua whakariteritea nei e tatou.

3. A ka whakamutua e nga Atua i te whitu o nga wa, no te mea a te whitu o nga wa e okioki ai ratou i a ratou mahi katoa i whakariteritea nei e ratou (e nga Atua) i waenganui i a ratou ano, kia hanga; me te whakatapu i tera. A ko a ratou whakataunga era i te wa i runanga ai ratou i waenganui i a ratou ano mo te hanganga i nga rangi me te whenua.

4. A ka haere iho nga Atua, ka hanga i enei whakatupuranga o nga rangi me te whenua, i te ra e hanga ai e nga Atua, i hanga te whenua me nga rangi,

5. He mea rite tonu ki ta ratou i mea ai mo te taha ki nga otaota o te parae i mua ake i te putanga ake i te whenua, me nga mahuri katoa o te parae i mua atu o te tupunga; no te mea kahore ano nga Atua i mea i te ua ki runga ki te whenua i a ratou e runanga ana kia mahia aua mea, a kahore ano te tangata i hanga noatia hei ngaki i te whenua.

6. Otira ka pupu ake te kohu i te whenua hei whakamakuku i te mata katoa o te whenua.

7. A, ka hanga e nga Atua te tangata i te puehu o te oneone, a ka mau ki tona wairua (ara te wairua o te tangata), a purua ana ki roto ki a ia; a whakahangia ana ki roto ki ona ponga-ihu te manawaora, a ka whai wairua ora te tangata.

8. A, ka whakatokia e nga Atua he kaari i te taha rawhiti o Erene, a whakanohoia ana te tangata e ratou ki reira, i purua nei e ratou tona wairua ki roto i tona tinana i hanga nei e ratou.

9. A meinga ana e nga Atua kia tupu ake i te whenua nga rakau katoa e ahuareka ana ki ta te titiro, e pai ana hei kai; me te rakau o te ora ano hoki i waenganui o te kaari, me te rakau ano hoki o te matauranga ki te pai, ki te kino.

10. A ko tetahi awa e rere atu ana i Erene, hei whakumakuku i te kaari, a i reira ka wehewehea kia wha nga matapuna.

11. A, tangohia ana e nga Atua te tangata, a whakanohoia ana ki te Kaari o Erene, hei whakapai, hei tiaki.

12. Na, ka whakahaua te tangata e nga Atua, ka mea: O nga rakau katoa o te kaari me kai noa e koe,

13. Otira, ko te rakau o te matauranga ki te pai, ki te kino, kaua koe e kai; no te mea ko te wa e kai ai koe i ona hua, ka mate koe. Nawai a, i kite ahau, a Aperahama, e rite ana tera taima ki to te Ariki, pera ano i to Korapa, no te mea kahore ano nga Atua i whakarite i to Arama tatau taima.

14. Na, ka mea nga Atua: Tena tatou ka hanga i tetahi hoa mo te tangata, no te mea e hara i te mea pai mo te tangata ko ia anake, no reira ka hanga e tatou he hoa mona,

15. A ka meinga e nga Atua kia au iho te moe o Arama; a, moe ana ia, a ka tangohia e ratou tetahi o ona rara, a tutakina atu ana te kikokiko hei whakakapi mo reira;

16. A no te rara i tangohia e nga Atua i te tangata, i whakaahuatia ai e ratou te wahine, a kawea atu ana ia ki te tangata.

17. A ka mea a Arama: He wheua tenei no oku wheua, he kikokiko no oku kikokiko; na me hua ia he wahine, no te mea i tangohia ake ia i te tangata;

18. No reira, ka whakarerea e te tangata tona papa me tona whaea, a ka piri ki tana wahine, a hei kikokiko kotahi raua.

19. Na, i te tu tahanga raua te tangata me tana wahine, a kihai i whakama.

20. Na, he mea hanga e nga Atua nga kararehe katoa o te parae i te oneone, me nga manu katoa o te rangi, a kawea katoatia atu ana ki a Arama kia kitea ai he aha tana e karanga ai i a ratou; a ko ta Arama i hua ai ki nga mea ora katoa, koia ra he ingoa mo ratou.

21. A hoatu ana e Arama he ingoa mo nga kararehe katoa, mo nga manu o te rangi, mo nga kirehe katoa o te parae; a mo Arama i kitea he hoa mona.