1. Na, ka oti te rangi me te whenua me o reira mano katoa.

2. A no te whitu o nga ra, i oti ai taku, ta te Atua mahinga, i nga mea katoa i hanga e ahau; a ka okioki ahau i te whitu o nga ra i aku mahi katoa, a ka oti nga mea katoa i hanga e ahau, a ka kite ahau te Atua, i aua mea, e pai ana.

3. Na, ka whakapaingia e ahau, e te Atua te ra tuawhitu, a whakatapua ana; no te mea i okioki ahau i reira i aku mahi katoa i mahi ai ahau, te Atua.

4. A, nana, ka mea atu nei ahau ki a koe, ko enei nga whakatupuranga o te rangi me te whenua i te wa i hanga ai raua, i roto i te ra i hangaa ai e ahau, e te Atua te rangi me te whenua.

5. Nga mea katoa ano o te oneone i mua i te taenga mai ki te whenua, me nga otaota katoa i mua i te tupunga ake i te oneone. No te mea, naku, na te Ariki, te Atua i hanga nga mea katoa kua korerotia ake e ahau, he mea wairua, i mua atu o to ratou hanganga ki runga i te mata o te whenua. No te mea kahore ano ahau, te Ariki te Atua kia mea i te ua ki runga i te mata o te whenua. A naku, na te Ariki, te Atua i hanga nga tamariki katoa a nga tangata; a kahore ano kia whai tangata hei ngaki i te whenua; no te mea i hanga ake ratou e ahau i te rangi; a kahore ano he kikokiko noa i runga i te whenua, i roto ranei i te wai, i roto i te takiwa ranei;

6. Heoi, naku, na te Ariki, na te Atua i korero, a ka puta ake te kohu i te whenua, a whakamakukutia ana te mata katoa o te whenua.

7. A ka whakaahuatia e ahau, e te Ariki, e te Atua, te tangata i te puehu o te whenua, a whakahangia ana ki roto ki ona pongaihu te manawa ora; a ka whakawairua ora te tangata, te kikokiko tuatahi i runga i te whenua, te tangata tuatahi ano hoki; he ahakoa ra ko nga mea katoa kua oti te hanga i mua atu; otira he mea wairua to ratou hanganga, a hanga ana kia rite ki taku kupu.

8. Na, ka whakatokia e ahau, e te Ariki, e te Atua he kaari ki te taha rawhiti o Erene, a whakanohoia ana te tangata ki reira, taku i hanga nei.

9. Na, ka meinga e ahau, e te Ariki, e te Atua nga rakau katoa kia tupu ake i te whenua, he mea maori, he mea e ahuareka ana ki te titiro a te tangata; a e ahei ano hoki te tangata ki te titiro atu. A kua meinga hoki tera hei wairua ora. No te mea he mea whakawairua kau i te wa i hanga ai ia e ahau; no te mea ka mau tonu tera i roto i te ao i hanga ai ia e ahau, e te Atua, ae ra, nga mea katoa i whakaritea e ahau hei painga ma te tangata; a ka kite te tangata e pai ana tera hei kai. A ka whakatokia e ahau, e te Ariki, e te Atua te rakau o te ora i waenganui ano hoki o te kaari, me te rakau ano hoki o te matauranga ki te pai, ki te kino.

10. Na, ka meinga e ahau, e te Ariki, e te Atua, he awa kia rere atu i Erene, hei wai mo te kaari, a i reira ka wehewehea kia wha nga matapuna.

11. A ka huaina e ahau, e te Ariki, e te Atua, te ingoa o te mea tuatahi ko Pihona, a taiawhio ana tera i te whenua katoa o Hawira, i te wahi i hangaia ai e ahau, e te Ariki, e te Atua, kia nui te koura;

12. A he pai te koura o taua whenua, a kei reira ano te riuma me te kohatu onika.

13. A ko te ingoa o te awa tuarua, i huaina ko Kihona; a koia ano tera e taiawhio ana i te whenua katoa o Etiopia.

14. A ko te ingoa o te tuatoru o nga awa, ko Hirekere; tera hoki e rere whaka-te-rawhiti o Ahiria. A ko te tuawha o nga awa ko Uparati.

15. Na ka tango ahau, te Ariki, te Atua, i te tangata, a whakanohoia ana ia ki te Kaari o Erene, hei ngaki, hei tiaki i reira.

16. A ka whakahau te Ariki, te Atua, i te tangata, ka mea: Kainga noatia nga hua o nga rakau katoa o te kaari,

17. Ko te rakau ia o te matauranga ki te pai, ki kino, kaua e kai i ona hua; otiia kei a koe te tikanga ki te whiriwhiri mou ake, kua hoatu na hoki ki a koe; engari kia mahara, kua rahuitia tena e ahau, no te mea i te ra ano e kai ai koe i tetahi o ona hua, ka mate rawa koe.

18. A ka mea ahau, te Ariki, te Atua, ki taku Tama Kotahi; e hara i te mea pai mo te tangata kia noho ko ia anake; no reira ka hanga e ahau tetahi hoa mona.

19. No te oneone ano hoki nga mea katoa he mea whakaahua naku, na te Ariki, na te Atua, nga kararehe katoa o te parae, me nga manu o te rangi; a ka whakahau ahau i a ratou kia haere mai ki a Arama, kia kitea ai tana e hua ai i a ratou; a he wairua ora ano hoki ratou; no te mea naku, na te Atua i whakaha ki roto ki a ratou te manawa ora, me te whakahau ano ko ta Arama e hua i nga mea ora katoa, koia ra te ingoa mo ratou.

20. Na ka hoatu e Arama he ingoa mo nga kararehe katoa, me nga manu o te rangi, me nga kirehe katoa o te parae; engari mo Arama, kihai i kitea he hoa mona;

21. Na, ka mea ahau, te Ariki, te Atua, kia au iho te moe o Arama; a moe ana ia, a tangohia mai ano e ahau tetahi o ona rara, a tutakina atu ana te kikokiko hei whakakapi mo reira.

22. A ko te rara i tangohia e ahau, e te Ariki, e te Atua, i te tangata i hanga ai hei wahine, a kawea mai ana ki te tangata.

23. A ka mea a Arama: E mohio ana ahau ki tenei, ko te wheua o oku wheua, ko te kikokiko o oku kikokiko; me hua ia he Wahine, no te mea i tangohia ake ia i te tangata.

24. No konei ka mahue te tangata i tona papa me tona whaea, a ka piri ki tana wahine; a hei kikokiko kotahi raua.

25. I te tu tahanga raua, te tangata me tana wahine a kihai i whakama.