1. A ko nga ra katoa o Enoka, e wha rau e toru tekau nga tau.

2. Nawai a, ko Metuhera, te tama a Enoka, kihai i tangohia, kia tutuki ai nga kawenata a te Ariki, i mea ai ia ki a Enoka, no te mea he pono, i kawenata ia ki a Enoka, he hua a Noa no tona hope.

3. Nawai a, ka poropiti a Metuhera ma roto i tona hope puta ake ai nga kingitanga katoa o te whenua (ma roto i a Noa), me te tango i te kororia ki a ia ano.

4. A i reira ka puta mai he mate kai ki runga i te whenua, ka kanga ai e te Ariki te whenua ki te kanga kino, a he tokomaha te hunga o reira i mate.

5. Nawai a, ka ora a Metuhera kotahi rau e waru tekau ma whitu nga tau, ka whanau tana ko Rameka;

6. A i ora ai a Metuhera i muri i te whanautanga o Rameka, e whitu rau e waru tekau ma rua nga tau, a whanau ana he tamariki tane, he tamahine;

7. A hui katoa nga ra o Metuhera e iwa rau e ono tekau ma iwa nga tau, a ka mate.

8. A kotahi rau e waru tekau ma rua nga tau i ora ai a Rameka, ka whanau tana tama;

9. A karangatia ana tona ingoa ko Noa, mea ana: Ma tenei tama e whakamarie i a tatou i te taha ki a tatou mahi, nga mahinga a o tatou ringaringa, no te mea, no te oneone i kanga nei e te Ariki.

10. E rima rau e iwa tekau ma rima nga tau i ora ai a Rameka i muri i te whanautanga o Noa, ka whanau he tamariki tane, he tamahine;

11. A hui katoa nga ra i ora ai a Rameka, e whitu rau e whitu tekau ma whitu nga tau, a ka mate ia.

12. A e wha rau e rima tekau nga tau te pakeke o Noa, ka whanau a Iapeta, e wha tekau ma rua nga tau i muri, ka whanau a Hema i taua whaea ano o Iapeta, a i a ia e rima rau nga tau te pakeke, ka whanau a Hama.

13. Na, ka whakarongo a Noa ratou ko ana tama ki te Ariki, me te ngohengohe, a huaina ana ratou he tama na te Atua.

14. No ka timata enei tangata te tokomaha haere i runga i te mata o te whenua, a ka whanau he tamahine ma ratou, a i te kitenga o nga tama a te tangata i te ataahua o a ratou tamahine, a tango ana ratou i a ratou hei wahine, ki ta ratou i pai ai.

15. Na, ka mea te Ariki ki a Noa: Kua hoko nga tamahine a ou tama i a ratou ano; a nana, kei runga taku riri i nga tama a nga tangata, mo ratou kihai i whakarongo ki toku reo.

16. Nawai a, ka poropiti a Noa, ka whakaako i nga mea o te Atua, ano ko nga mea i te timatanga.

17. A ka mea atu te Ariki ki a Noa: E kore toku Wairua e tohe tonu ki te tangata, no te mea e mohio ana ia ka mate nga kikokiko katoa; ahakoa ka kotahi rau e rua tekau ona tau; a ki te kahore nga tangata e ripeneta, ka tukua e ahau nga waipuke ki runga i a ratou.

18. A i aua ra he tangata roroa i runga i te whenua, a ka whai ratou ki te whakamate i a Noa, otira i a Noa te Ariki, me te kaha o te Ariki i runga i a ia.

19. Na, ka whakarite te Ariki i a Noa i runga i te ahua o tona ritenga, a ka whakahau ia i a ia kia haere atu ia ki te kauwhau i tona Rongo-pai ki nga tamariki a nga tangata, pera ano i te mea i hoatu ki a Enoka.

20. Nawai a, ka karanga a Noa i nga tamariki a nga tangata, me ripeneta ratou, heoi, kihai ratou i whakarongo ki ana kupu;

21. Heoi, i muri iho i to ratou rongonga ki a ia, ka haere mai ratou ki tona aroaro, ka mea: Nana, ko matou nga tama a te Atua; kihai ianei i tangohia nga tamahine a te tangata ma matou ano ? A kahore ianei matou i te kai, i te inu, i te marena, me te hoatu kia marenatia, a whakawhanau tamariki ana a matou wahine ma matou, a he tangata kaha ratou, e rite ana ki nga tangata o mua, he tangata ingoa nui. Na kihai ratou i whakarongo ki nga kupu a Noa.

22. A ka kite te Atua i te kino o nga tangata kua tino nui rawa i runga i te whenua; a ko nga tangata katoa kua hapai ake i nga whakaaro teka i roto i o ratou ngakau, e whakahono tonu ana i te kino.

23. Nawai a, ka mau tonu te kauwhau a Noa ki te iwi, e mea ana: Whakarongo, kia whakaarotia aku kupu;

24. Whakapono, me ripeneta ki o koutou hara, a kia rumakina i runga i te ingoa o Ihu Karaiti, te Tama a te Atua, ae ra, pera i o tatou matua, a ko reira koutou whiwhi ai ki te Wairua Tapu, kia whakakitea ai nga mea katoa ki a koutou; a ki te kahore koutou e mea i tenei ka puta mai nga waipuke ki runga ki a koutou; otira, kihai ratou i whakarongo.

25. A i ripeneta a Noa, i mamae hoki tona ngakau mo te Ariki i hanga i te tangata ki runga i te whenua, i mamae ai tona ngakau.

26. A ka mea te Ariki: Ka whakangaromia e ahau te tangata kua hanga nei e ahau, i runga i te mata o te whenua, te tangata me nga kararehe, me nga mea ngokingoki katoa, me nga manu o te rangi; no te mea i ripeneta a Noa moku i hanga i a ratou, a no te mea i hanga ratou e ahau; a kua karanga mai ia ki a au; no te mea i whai ratou kia whakamate i a ia.

27. A penei ka whai aroha noa a Noa i roto i nga kanohi o te Ariki; no te mea he tangata tika a Noa, he tangata hara kore i roto i tana whakatupuranga; i haere tahi ia me te Atua, i pera ano hoki ana tama tokotoru, a Hema, a Hama me Iapeta.

28. A kua pirau te whenua i te aroaro o te Atua, a ki tonu ana i te riri.

29. A ka titiro atu te Atua ki runga i te whenua, a nana, kua pirau, no te mea kua pirau nga kikokiko katoa i runga i te whenua.

30. A ka mea atu te Atua ki a Noa: Ko te whakamutunga o nga kikokiko katoa kua tae ake ki toku aroaro, no te mea kua ki te whenua i te riri, a nana, ka whakangaromia atu e ahau nga kikokiko katoa i runga i te whenua.