1. Nawai a, i muri iho i taku, i ta te Ariki, te Atua, peinga atu i a raua ki waho, ka timata a Arama te ngaki i te whenua me te whai mana i runga i nga kirehe o te parae, me te kai i tana taro he mea na te werawera a tona mata, rite tonu ki taku, ki ta te Ariki, i whakahau ai ki a ia. A i mahi tahi ano hoki a Iwi, tana wahine i a ia.

2. A ka mohio a Arama ki tana wahine, a ka whanau he tamariki tane, he tamahine i tana wahine mana, a ka timata ratou te tokomaha haere me te whakakapi ano i te whenua.

3. A, mai i reira ki tetahi wa, ka timata nga tama me nga tamahine a Arama te wehe, takirua, takirua, ki runga i te whenua, me te ngaki i te whenua, me te tiaki i nga kahui, na whanau ana ano hoki nga tama me nga tamahine ma ratou.

4. Na, ka karanga ake a Arama raua ko Iwi, tana wahine, i runga i te ingoa o te Ariki, a ka rongo raua i te reo o te Ariki e puta mai ana i te aronga atu ki te Kaari o Erene, e korero mai ana ki a raua, a kihai raua i kite i a ia; no te mea kua tutakina atu raua ki waho i tona aroaro.

5. A, ka hoatu e ia nga whakahaunga ki a raua, me koropiko raua ki te Ariki, ki to raua Atua, me te hoatu ano i nga matamua o o raua kahui hei whakahere ki te Ariki. A ka ngohengohe a Arama ki nga whakahaunga a te Ariki.

6. A muri iho i nga ra maha, ka puta mai tetahi anahera a te Ariki ki a Arama, ka mea: Hei aha i tapaea ai e koe nga patunga tapu ki te Ariki ? Ka mea a Arama ki a ia: Kahore ahau i te mohio, engari i whakahaua ahau e te Ariki.

7. A ka korero atu te anahera, ka mea: Ko tenei mea he ritenga mo te patunga tapu o te Tama Kotahi a te Matua, ki tonu i te aroha noa me te pono.

8. No reira ko nga mea katoa, e meatia e koe i runga i te ingoa o te Tama, a me ripeneta koe, me karanga ake ki te Atua i roto i te ingoa o te Tama mo ake tonu atu.

9. A, i roto i taua ra ka tau iho te Wairua Tapu ki runga ki a Arama, koia nei te kai-whakaatu o te Matua me te Tama, ka mea: Ko ahau te Tama Kotahi a te Matua, no te timatanga ra ano, a mo ake tonu atu, a i te mea i taka koe, tera ano koe e hokona, me nga tangata katoa, ara nga mea e pai ana.

10. Na, i taua ra ka whakapaingia te Atua e Arama, a purena noa, ka timata te poropiti mo te taha ki nga whanau o te whenua, ka mea: Kia whakapaingia te ingoa o te Atua, no te mea, no toku takanga i tuwhera ai oku kanohi, a ka whai hari ahau i roto i tenei oranga, a i roto i te kikokiko tera ahau e kite i te Atua.

11. A i rongo hoki a Iwi, tana wahine i enei mea katoa, a koa ana, ka mea: Me i kore to taua takanga e kore rawa taua e whai uri, a kua kore i mohio ki te pai, ki te kino, me te hari o to taua hokonga, me te oranga-tonutanga e homai nei e te Atua ki nga mea katoa e ngohengohe ana.

12. Na, ka whakapaingia te ingoa o te Atua e Arama raua ko Iwi, a whakamohiotia ana e raua nga mea katoa ki a raua tama, me a raua tamahine.

13. Na, ka puta mai a Hatana i waenganui i a ratou ka mea: He tama ano hoki ahau na te Atua; a ka whakahauhau ia i a ratou, ka mea: Aua e whakapono; no ka kore ratou e whakapono, ka nuku atu to ratou aroha ki a Hatana i te aroha ki te Atua. Ka timata nga tangata i taua wa ki nga hiahia taikaha, ki nga niahi tutu, me nga mahi o te rewera.

14. A ka karanga te Ariki, te Atua i nga tangata katoa, he mea na te Wairua Tapu, i nga wahi katoa, me te whakahauhau i a ratou, me ripeneta ratou;

15. A ko te hunga katoa e whakapono ana ki te Tama me te ripeneta ano i o ratou hara, ka whakaorangia; a te hunga katoa e kore e whakapono, e kore e ripeneta, ka whakahengia; a i puta atu nga kupu i te mangai o te Atua i runga i te ture pumau; no reira me tutuki rawa.

16. A ko Arama raua ko Iwi, tana wahine, kihai i mutu te karanga ake ki te Atua. A ka mohio a Arama ki a Iwi, ki tana wahine, a ka whanau a Kaina, a ka mea: Kua whakawhiwhia ahau e te Ariki ki te tangata; no reira e kore ia e whakakahore i ana kupu. Otira, nana, kihai a Kaina i whakarongo, ka mea: Ko wai te Ariki, kia mohio ai ahau ki a ia ?

17. A ka hapu ano ia ka whanau tona teina a Apera. Na ka whakarongo a Apera ki te reo o te Ariki. A he kai tiaki hipi a Apera, otira ko Kaina he kai ngaki i te whenua.

18. Na ka aroha a Kaina ki a Hatana, nuku atu i tona ki te Atua. A ka whakahau a Hatana i a ia, ka mea: Meatia he whakahere ki te Ariki.

19. Nawai a, ka puta mai te wa ka mauria mai e Kaina nga hua o te whenua hei whakahere atu ki te Ariki.

20. A ka mauria mai e Apera nga matamua o ana kahui, me o reira ngako. A ka aro mai te Atua ki a Apera, me tana whakahere.

21. Heoi kihai ia i manako ki a Kaina me tana patunga tapu. Na i mohio a Hatana ki tenei, he mea whakaahuareka hoki tera ki a ia. A nui rawa te riri o Kaina, a ka pouri tona ahua.

22. A ka mea te Ariki ki a Kaina: Hei aha koe i riri ai ? Hei aha i pouri ai tou ahua ?

23. Me e tika tou mahi, ka manakohia koe. A ki te kore e tika tou mahi ka takoto te hara i tou kuwaha; e hiahia ana a Hatana ki a koe; a ki te kahore koe e whakarongo ki aku whakahaunga, ka tukua atu koe e ahau, a ka meatia ki a koe rite tonu ki tana e hiahia ai. A ka whai mana koe ki runga i a ia;

24. No te mea timata atu i tenei wa ko koe te matamua o ana teka; ka huaina koe ko te Whakangaromanga, no te mea he pera ano hoki koe i mua atu i te ao.

25. A tera e kiia i nga wa e haere mai nei,—Ko tenei mea whakarihariha i putake mai i a Kaina; no te mea i whakakahore ia i te tikanga nui i homai nei e te Atua; a ko te kanga tenei e hoatu e ahau ki runga ki a koe, ki te kahore koe e ripeneta.

26. Na, ka riri a Kaina, a kore ake i whakarongo ki te reo o te Ariki, ki a Apera ranei, tona teina, i haere nei ia i roto i te tapu i te aroaro o te Atua.

27. Heoi tangi ana a Arama raua ko tana wahme i te aroaro o te Ariki, mo Kaina ratou ko ona teina.

28. Nawai a ka tango a Kaina i tetahi o nga tamahine o tona teina hei wahine, a nuku atu to raua aroha ki a Hatana i to raua ki te Atua.

29. A ka mea a Hatana ki a Kaina: Oati mai ki a au ma tou ake korokoro, a ki te korerotia e koe ka mate koe; a me oati ou teina ma o ratou matenga, ma te Atua ora hoki, aua ratou e korero i taua mea; no te mea ki te korerotia e ratou ka mate ratou; a kia kore ai tou papa e mohio ki tenei; a ko tenei ra ano tukua ai e ahau tou teina a Apera ki roto ki ou ringaringa.

30. A ka oati atu a Hatana ki a Kaina kia meatia e ia tenei kia rite ki tana whakahau. A i meinga katoatia enei i roto i te tikanga ngaro.

31. A ka mea a Kaina: He pono ko ahau a Mahana, te rangatira o tenei mea ngaro, kia kohuru ai ahau me te whiwhi taonga. No reira a Kaina i huama ai ko Mahita Mahana, a ka whai kororia ia i roto i ana mahi kino.

32. A haere ana a Kaina ki roto ki te parae, a ka korero a Kaina ki a Apera ki tana teina. Nawai a, i a raua i roto i te parae, ka whakatika atu a Kaina ki a Apera, ki tona teina, ka kohuru i a ia.

33. Na ka ahuareka a Kaina ki tana i mea, ai, ka mea: Kua watea ahau; he pono ko nga kahui o toku teina ka taka ki roto i oku ringaringa.

34. A ka mea te Ariki ki a Kaina: Kei hea a Apera, tou teina? A ka mea ia: Kahore au i te mohio, Ko ahau ianei te kai tiaki o toku teina ?

35. Na, ka mea te Ariki: He mahi aha tenei au ? E tangi ana mai ki a au te reo o nga toto o tou teina i te oneone.

36. Na, ka kanga koe i te whenua, i hamama nei tona waha hei rerenga mo te toto o tou teina i tou ringaringa.

37. Ka ngakia e koe te oneone e kore e tukua mai tona kaha a muri ake nei ki a koe; ka waiho koe hei tangata haereere noa, hei manene i runga i te whenua

38. Na, ka mea a Kaina ki te Ariki: Na Hatana ahau i whakamatautau, ko nga kahui o toku teina te take. A, ka riri ano hoki ahau, mou i manako ki ana whakahere, a kahore ki aku, a ko toku whiunga nui noa atu i toku kaha.

39. Nana, kua peia nei ahau e koe i tenei ra i te mata o te Ariki a ka huna atu ahau i tou mata, a ka meinga ahau he tangata haereere noa i runga i te whenua; nawai a ki te kite tetahi i a au ka patua ahau e ia, no te mea ko oku hara te take, no te mea ko enei mea kahore e huna atu i te Ariki.

40. A ka mea ahau te Ariki ki a ia: Ko te tangata e whakamate ana i a koe, e whitu nga utu e rapua i a ia. A ka hoatu e ahau, e te Ariki he tohu ki a Kaina kei kitea ia e etahi, kei whakamatea ia.

41. A tutakina atu ana a Kaina i te aroaro o te Ariki, me tana wahine, me te tokomaha o ona tuakana e noho ana i te whenua o Nora, i te rawhiti o Erene.

42. A, ka mohio a Kaina ki tana wahine, a ka whanau ia i a Enoka, a ka whauau ano hoki i a ia he maha nga tama me nga tamahine. A hanga ana e ia he pa, a huaina ana e ia te ingoa o te pa ki te ingoa o tana tama o Enoka.

43. A ka whanau ta Enoka ko Irara me etahi tamariki tane, wahine hoki. Ka whanau ta Irara ko Mehutaere me nga tamariki tane, me nga tamahine. A, ka whanau ta Mehutaere ko Metuhaere, me nga tamariki tane me nga tamahine. A ka whanau ta Metuhaere ko Rameka.

44. A ka tango a Rameka mana kia tokorua nga wahine; ko te ingoa o tetahi ko Araha, ko te ingoa o tetahi ko Tira.

45. A ka whanau i a Araha, ko Iapara; ko ia te matua o te hunga noho teneti, hei kai tiaki kararehe ratou; a ko te ingoa o tona teina, ko Upaia, ko ia te matua o nga kai whakatangi hapa me nga okena.

46. Me Tira hoki, whanau ake tana ko Tupara Kaina, he kai whakaako ia no nga kai mahi parahi me te rino. A ko te tuahine a Tupara Kaina i huaina ko Naama.

47. A ka mea atu a Rameka ki ana wahine, ki a Araha raua ko Tira: Whakarongo ki toku reo, e nga wahine a Rameka, whakarongo mai ki aku kupu; no te mea kua patua e ahau tetahi tangata mo oku tunga, he taitamariki mo toku mamae.

48. Me he mea e whitu nga whakautu mo Kaina, he pono kia whitu tekau ma whitu mo Rameka;

49. No te mea i uru a Rameka ki te kawenata ki a Hatana, e rite ana ki a Kaina, i a ia i meinga ko Mahita Mahana, ko te rangatira o nga mahi ngaro i tuaritia e Hatana ki a Kaina; a, ko Iraia, te tama a Enoka i mohio ki a ratou mahi ngaro, nana i timata te whakaatu ki nga tama a Arama;

50. No reira a Rameka i riri ai, i kohuru ai i a ia, kihai i rite ki ta Kaina ki tona teina, ki a Apera, kia whiwhi ki nga utu, engari i kohurutia ia no te oati te take.

51. No te mea, mai i nga ra o Kaina, tera tetahi huihuinga ngaro; ko a ratou mahi no roto i te pouri, e mohio ana ratou ki nga tangata katoa, ki o ratou teina.

52. No reira i kanga ai te Ariki i a Rameka, me tona whare me nga tangata katoa kua kawenata ki a Hatana; no te mea kihai ratou i pupuri ki nga whakahaunga a te Atua, a kihai te Atua i ahuareka, a kihai ia i mahi atu ki a ratou, ko a ratou mahi he mea whakarihariha, a timata ana te horapa haere ki nga tama a te tangata.

53. A, i roto i nga tama a nga tangata, i roto ano hoki i nga tamahine a nga tangata, kihai enei mea i korerotia, a i te mea i korerotia atu e Rameka enei mea ngaro ki ana wahine, a ka riri raua ki a ia, a ka panuitia enei mea kia horapa haere, a kahore he aroha ki a ia;

54. No reira a Rameka i kinongia ai, a peia atu ai, a kihai i haere mai ki waenganui i nga tama a te tangata kei mate ia.

55. A no konei timata ai nga mahi o te pouritanga te horapa haere i waenganui i nga tama katoa a te tangata.

56. A ka kanga te whenua e te Atua ki tetahi kanga nanakia, me te riri ki nga kai mahi o te kino, ki nga tama katoa a nga tangata kua hanga nei e ia;

57. No te mea kahore ratou i whakarongo ki tona reo, kahore hoki i whakapono ki tana Tama Kotahi, ae ra ki a ia ra i whakaaturia tera e haere mai i waenganui o nga wa, kua whakaritea nei i mua noa atu i te hanganga o te ao.

58. A no konei timata ai te kauwhau i te Rongo-pai mai i te timatanga, he mea whakapuaki na nga anahera tapu, i tonoa mai nei i te aroaro o te Atua, a he mea na tona ake reo, he mea hoki na te homaitanga o te Wairua Tapu.

59. A i pera te whakaunga o nga mea katoa ki a Arama, he mea na te ritenga tapu me te Rongo-pai i kauwhautia, me te ture i tukua atu, kia noho tonu i te ao taea noatia tona mutunga; a pera ana ano. Amine.