1. A ka whakarongo a Arama ki te reo o te Atua, a ka karanga atu i ana tama kia ripeneta.

2. A ka mohio ano a Arama ki tana wahine, a ka whanau tana tama, a huaina ana e ia tona ingoa ko Heta. A ka whakakororiatia a Arama i to te Atua ingoa; na te mea i mea ia: Kua whakawhiwhia ano ahau e te Atua ki tetahi uri, hei whakakapi mo Apera i kohurutia e Kaina.

3. Na ka whakakite te Atua i a ia ano ki a Heta; a kihai ia i tutu ki a ia, engari i tapaea atu e ia he whakahere tika, e rite ana ki tona tuakana i a Apera. A i whanau ano hoki he tamaiti tane mana, a huaina ana tona ingoa e ia ko Enoha.

4. Na ka timata enei tangata te karanga ki te ingoa o te Ariki, a ka manaaki te Atua i a ratou;

5. A i puritia tetahi pukapuka whakamaharatanga, i tuhituhia tera i roto i te reo o Arama, no te mea i hoatu ki nga tangata katoa e karanga ana ki te Atua kia tuhituhia he mea na nga akiakinga a te wairua;

6. A he mea na ratou i akona ai o ratou tamariki ki te korero pukapuka me te tuhituhi i roto i te reo nanukore, he-kore hoki.

7. Na ko tenei Tohungatanga ano i te timatanga a tae noa hoki ki te mutunga o te ao.

8. A i korerotia tenei poropititanga e Arama, he mea akiaki ia na te Wairua Tapu, a i tuhia ano he whakapapa o nga tamariki a te Atua. A ko te pukapuka tenei o nga whakatupuranga o Arama, i mea ai: I roto i nga ra i hanga ai e te Atua te tangata, i roto i te ahua o te Atua i hanga ai ia e ia;

9. I roto i te ahua o tona ake tinana i hanga raua e ia, he tane he wahine, a ka manaaki i a raua, a huaina ana to raua ingoa ko Arama, i te ra i hanga ai raua, i meinga ai hei wairua ora i te whenua o to te Atua turanga-waewae.

10. A i ora a Arama kotahi rau e toru tekau nga tau, ka whanau ano he tama e rite ana ki tona ake ahua, he mea rite tonu ki a ia, a huaina tona ingoa ko Heta.

11. Na, ko nga ra katoa o Arama i muri i te whanautanga o Heta, e waru rau nga tau, a ka whanau he maha ana tamariki tane me ana tamahine.

12. A hui katoa nga ra i ora ai a Arama e iwa rau e toru tekau nga tau, a ka mate ia.

13. A kotahi rau ma rima nga tau i ora ai a Heta, ka whanau a Enoha, a ka poropiti ia i ona ra katoa, me te whakaako i tana tama, i a Enoha ki nga huarahi o te Atua; no reira hoki a Enoha i poropiti ai.

14. A hui katoa nga tau i ora ai a Heta i muri i te whanautanga o Enoha e waru rau ma whitu nga tau, a ka whanau he tokomaha nga tamariki tane me nga tamahine.

15. A ka anga ka tokomaha haere nga tamariki a nga tangata i runga i te mata katoa o te whenua. I roto i aua ra i whai mana nui a Hatana i weanganui i nga tangata, a ka riri ratou i roto i o ratou ngakau; a no taua wa ano i puta ai nga whawhai me nga whakahekenga toto; a ka pa atu to te tangata ringa ki tona ake teina, i runga i te whakamate, no te mea no a ratou mahi ngaro, i rapua ai te kaha.

16. A hui katoa nga ra i ora ai a Heta, e iwa rau tekau ma rua nga tau, a ka mate ia.

17. E iwa tekau nga tau o Enoha ka whanau a Kainana. E ko Enoha me te morehu o nga tangata o te Atua ka puta atu i te whenua i karangatia ko Hurona a noho ana i te whenua o te kupu whakaari, i karangatia tera ki te ingoa o tana tama i karangatia e ia ko Kainana.

18. E waru rau tekau ma rima nga tau i ora ai Enoha i muri iho i te whanautanga o Kainana, ka whanau ano he tokomaha nga tamariki tane me nga tamahine. A ko nga ra katoa o Enoha e iwa rau ma rima nga tau, a ka mate ia.

19. A e whitu tekau nga tau i ora ai a Kainana, ka whanau a Maharareere; a e waru rau e wha tekau nga tau i ora ai a Kainana i muri i te whanautanga a Maharareere, a whanau ana he tamariki tane, he tamahine. A ko nga ra katoa o Kainana e iwa rau tekau nga tau, a ka mate ia.

20. A e ono tekau ma rima nga tau o Maharareere i ora ai, ka whanau a Iarere; na e waru rau e toru tekau nga tau i ora ai a Maharareere i muri i te whanautanga o Iarere, a ka whanau he tamariki tane, he tamahine. A ko nga ra katoa o Maharareere e waru rau e iwa tekau ma rima nga tau, a ka mate ia.

21. A kotahi rau e ono tekau ma rua nga tau i ora ai a Iarere, ka whanau a Enoka: a e waru rau nga tau i ora ai a Iarere i muri i te whanautanga o Enoka, a whanau ana he tamariki tane, he tamahine. A ka whakaako a Iarere i a Enoka ki nga huarahi o te Atua.

22. Na ko te whakapapa tenei o nga tama o Arama ko ia te tama a te Atua, ko ia hoki i korero tahi me te Atua.

23. A ko ratou he kai kauwhau i te tika, me te korero, me te poropiti, me te karanga i nga t angata katoa i nga wahi katoa kia ripeneta; a i whakaakona atu te whakapono ki nga tamariki a nga tangata.

24. Nawai a ko nga ra katoa o Iarere e iwa rau e ono tekau ma rua nga tau, a ka mate ia.

25. A e ono tekau ma rima nga tau i ora ai a Enoka, ka whanau a Metuhera.

26. Nawai a ka haereere a Enoka i te whenua i waenganui i te iwi; a i a ia e haere ana ka heke iho te Wairua o te Atua i te rangi, a tau ana ki runga ki a ia.

27. A, ka rongo ia i te reo no te rangi e mea ana: E Enoka, e taku tama, poropiti atu ki tenei iwi, mea atu ki a ratou—Ripeneta, e ai ta te Ariki: E riri ana ahau ki tenei iwi, a ko taku riri nanakia kua puta atu ki a ratou; no te mea kua whakapakeketia o ratou ngakau, me o ratou taringa kua kore e rongo, ko o ratou kanohi kua kore e mataara te kite;

28. Na, mo enei whakatupuranga maha mai ano i te ra i hanga ai ratou e ahau, kua kotiti ke ratou, a kua whakakahore ki a au, a kua runanga ratou i roto i te pouri; a i roto i o ratou whakarihariha kua mahi kohuru ratou, a kihai i puritia nga whakahaunga i hoatu e ahau ki to ratou matua, ki a Arama.

29. No reira kua oati ke ratou i a ratou ano, a he mea na a ratou oati, i takina iho e ratou te mate ki a ratou ano: me tetahi Reinga kua whakaritea e ahau mo ratou, ki te kore ratou e ripeneta;

30. A ko te ture tenei, i tukua atu e ahau i te timatanga ra ano o te ao, he mea na toku ake mangai, a mai i to reira turanga, he mea na nga mangai o aku pononga, o ou matua kua whakaritea tera e ahau, a ka tukua atu ki roto ki te ao, tae noa ki to reira mutunga.

31. Ano ka rongo a Enoka i enei kupu, ka piko iho ia ki te whenua, i te aroaro o te Ariki, a ka korero ki te Ariki, ka mea: Hei aha ahau i manakohia ai i tau tirohanga, no te mea he tamariki ahau, a i kino ano te iwi katoa ki a au; no te mea hoki he puhoi ahau ki te korero, no reira ko ahau tou pononga ?

32. A, ka mea atu te Ariki ki a Enoka: Haere atu, meinga kia rite ki taku i whakahau ai i a koe, a kahore he tangata e ahei te wero i a koe. Hamama tou mangai, a tera e ki, a maku e hoatu ki a koe he korero, no te mea ko nga kikokiko katoa i roto i oku ringaringa, a ka meatia e ahau kia rite ki taku e pai ai.

33. Mea atu ki tenei iwi: Whiriwhiria e koutou i tenei ra kia mahi ki te Ariki, te Atua, nana koutou i hanga.

34. Nana, kei runga toku Wairua i a koe, no reira ko au kupu katoa maku e whakamana; a ko nga maunga ka oma i mua i a koe, a ko nga awa ka huri ke to ratou rerenga; a ka u koe ki roto i a au, me ahau i roto i a koe; no reira haereere tahi me au.

35. A ka korero atu te Ariki ki a Enoka, ka mea atu ki a ia: Whakawahia ou kanohi ki te uku, horoia ano hoki, a ka kite koe. A pera ana ano e ia.

36. A ka kite ia i nga wairua i hanga nei e te Atua; a ka kite ano hoki i nga mea e kore nei e kitea e te kanohi maori; a no reira mai ano i pnta ai te kupu i runga i te whenua: He matakite kua whakaarahia ake e te Ariki ki tona iwi.

37. Nawai a ka haere atu a Enoka ki roto i te whenua, i waenganui i te iwi, tu ana i runga i nga puke me nga wahi teitei, he kaha rawa tona reo ki te karanga, e whakaatu atu ana i a ratou mahi; a ka riri nga tangata katoa ki a ia.

38. A haere mai ana nga tangata ki te whakarongo ki a ia, i runga i nga wahi teitei, a mea atu ana ki nga kai tiaki teneti: E noho koutou i konei me te tiaki i nga teneti, i a matou e haere ana kia kite i te matakite, no te mea e poropiti ana ia, a tera tetahi mea rereke kei roto i te whenua; kua puta mai he tangata mohoao ki waenganui i a tatou.

39. Nawai a i to ratou rongonga i a ia kahore he tangata i pa ringaringa ki a ia; no te mea i tau hoki te wehi ki a ratou e rongo ana i a ia; no te mea haere tahi ana ia me te Atua.

40. A ka haere mai tetahi tangata ki a ia, tona ingoa ko Mahitia, a ka mea atu ki a ia: Korerotia mata nuitia ki a matou ko wai ra koe, a i haere mai koe i hea.

41. A ka mea atu ia ki a ratou: I haere mai ahau i te whenua o Kainana, i te whenua o oku matua, i te whenua o te tika, a tae noa ki te ra. A na toku matua ahau i whakaako ki nga huarahi katoa o te Atua.

42. Nawai a i a au e haere mai ana i te whenua o Kainana ra te moana rawhiti, a ka kitea e ahau he kitenga; a nana, ka kite ahau i nga rangi, a ka korero te Ariki ki a au, ka homai e ia he whakahaunga; no reira he mea maku tenei; kia puritia te whakahaunga i korero ai ahau i enei kupu.

43. A hono tonu ana te korero a Enoka, ka mea: Ko te Ariki i korero mai ki a au, ko ia ra ano te Atua o te rangi, ko ia hoki toku Atua me to koutou Atua, a ko koutou oku teina, a hei aha koutou i runanga ai ki a koutou ano, me te whakakahore i te Atua o te rangi ?

44. A nana nga rangi, a ko te whenua tona turanga waewae; a ko to reira turanga nona. Nana, nana i whakatakoto, nana hoki nga mano tini o nga tangata i whakaputa mai ki runga ki to reira mata.

45. A puta mai ana te mate ki runga i o tatou matua; ahakoa ra e mohio ana tatou ki a ratou, a e kore e taea te whakakahore; ae ra te tuatahi o nga mea katoa e mohio ana tatou, ko Arama.

46. Kua tuhituhia e tatou he pukapuka whakamaharatanga, e rite ana ki te tauira i homai, he mea na te matihao o te Atua; a he mea homai tena i roto i to tatou ake reo.

47. A i a Enoka e korero ana i enei kupu a te Atua ka wiriwiri nga tangata, ka kore e ahei te tu i tona aroaro.

48. A ka mea ia ki a ratou: Na te mea i taka a Arama, i puta ai tatou; a na tona takanga i puta mai ai te mate; ameinga ana tatou te tango i nga mamae me nga aue.

49. Nana, kua puta mai a Hatana ki waenganui i nga tamariki a nga tangata, hei whakamatautau i a ratou kia koropiko ki a ia; a kua meinga nga tangata kia mahi he, kia tutu, kia rite hoki ki te rewera, a tutakina atu ana i te aroaro a te Atua.

50. Heoi, kua whakamohiotia atu ki o tatou matua me ripeneta nga tangata katoa.

51. A i karanga hoki ia ki to tatou matua, ki a Arama, na tona ake reo, i mea: Ko ahau te Atua; I hanga ai ahau i te ao me nga tangata i mua i to ratou nohoanga i te kikokiko.

52. I mea atu ano hoki ia ki a ia: Ki te tahuri mai koe ki a au, me te whakarongo ki toku reo, me te whakapono, me te ripeneta ki ou hara katoa, a ka rumakina ki roto ki te wai, i roto i te ingoa o taku Tama Kotahi, ki tonu nei ia i te aroha noa me te pono, ko ia nei a Ihu Karaiti, ko te ingoa anake tera kua homai i raro i te rangi, ma reira nei e puta mai ai te whakaoranga ki nga tamariki a nga tangata, e whiwhi ai koutou ki te homaitanga o te Wairua Tapu, me te inoi ki nga mea katoa i runga i tona ingoa, a he aha te mea e inoi ai koutou, ka hoatu ki a koutou.

53. I korero atu to tatou matua a Arama ki te Ariki, i mea: He aha te take i meinga ai nga tangata kia ripeneta, kia rumakina ki roto ki te wai ? A ka mea atu te Ariki ki a Arama: Kua murua nei e ahau tou takanga i roto i te Kaari o Erene.

54. No reira i puta atu ai te kupu i waenganui o te iwi, Ko te Tama a te Atua, nana i utu te hara tuatahi, no reira ko nga hara o nga matua e kore e whakautua ki runga i nga matenga u nga tamariki, no te mea he hara-kore ratou no te hanganga mai ra ano o te ao.

55. A ka korero atu te Ariki ki a Arama, ka mea: I te mea ka whanau ou tamariki i roto i te hara, a ina timata ratou te tupu ake a ka puta ake te hara i roto i o ratou ngakau, a ka whakamatau ratou i te kawa, kia ahuareka ai ki te pai.

56. Na e hoatu ana ki a ratou kia mohio ki te pai, ki te kino; a no reira ratou i waiho ai ki a ratou ano, na kua hoatu e ahau tetahi atu ture me te whakahaunga.

57. No reira, akona atu tera ki ou tamariki; me ripeneta nga tangata katoa i nga wahi katoa, a ki te kahore e kore rawa ratou e whiwhi ki te kingitanga o te Atua, no te mea kahore he mea poke e ahei ai te noho ki reira, ara te noho i tona aroaro; no te mea i roto i te reo o Arama, ko te Tangata o te Tapu tana ingoa, a ko te ingoa o tana Tama Kotahi, ko ia te Tama a te tangata, ko Ihu Karaiti, he kai whakariterite tika tera e haere mai i waenganui o nga wa.

58. No reira ka hoatu e ahau he whakahaunga ki a koe, kia whakaakona noatia atu enei mea ki au tamariki, ka mea:

59. He mea na te hara i puta mai ai te takanga, a he mea na te takanga i puta mai ai te matenga, a i te mea he whanau mai koutou ki roto i te ao, he mea na te wai, na te toto, me te Wairua, i hanga nei e ahau, a he mea na te puehu i puta ai he tangata ora, no reira hoki i tika ai me whanau ano koutou ki roto ki te kingitanga o te rangi, i te wai, i te Wairua, a kia whakamakia i te toto, ae ra i nga toto o taku Tama Kotahi; kia whakatapua ai koutou i nga hara katoa, kia koa ai ki nga kupu o te oranga-tonutanga i tenei ao, ki te oranga-tonutanga i roto i te ao meake puta, a tera noa ake ki te kororia mutunga-kore;

60. No te mea, ma te wai e pupuri ai koutou i te whakahaunga, a ma te Wairua, ka tika ai, a ma te toto ka tapu ai;

61. No reira kua hoatu kia u ki roto i a koutou te whakaaturanga o te rangi; te kai-whakamarie; nga mea whakamarie o te kororia mutunga-kore; te pono o nga mea katoa; te kai-whakahohoro o nga mea katoa, a e meinga ana nga mea katoa kia ora; ko tera e mohio ana ki nga mea katoa, a kei a ia te kaha katoa, e rite ana ki te matauranga, ki te mahi tohu, ki te pono, ki te tika, me te whakaritenga whakawa.

62. A, nana, ka mea atu ahau ki a koe: Ko tenei te tauira o te whakaoranga ma nga tangata katoa, ma roto i nga toto o taku Tama Kotahi, e haere mai ai i waenganui o nga wa.

63. A, nana ko nga mea katoa kei o ratou na ahua ano, a nga mea katoa kua hanga, i hanga hei kai whakaatu maku, ara nga mea e rua, nga mea maori me nga mea wairua; nga mea i te rangi i runga, nga mea i runga i te whenua, me nga mea i roto i te whenua, me nga mea i raro i te whenua; a ko nga mea katoa he kai whakaatu moku.

64. Nawai a, i ta te Ariki korerotanga ki a Arama, to tatou matua, ka karanga atu a Arama ki te Ariki, a ka kahakina ia e te Wairua o te Ariki, a kawea iho ana ki roto ki te wai, a whakatakototia ana ki raro o te wai, a mauria ake ana ki waho o te wai.

65. A i pera tona rumakanga, a ka tau iho te Wairua o te Atua ki runga ki a ia, a i pera tona whanautanga i te Wairua, a whakaorangia ana ki to roto tangata.

66. A ka rongo ia i te reo i puta mai i te rangi, e mea ana: Kua rumakina koe ki te ahi me te Wairua Tapu. Ko tenei te whakaaturanga a te Matua me te Tama, atu inaianei, a ake tonu atu;

67. Na, kei roto koe i te ritenga ona, kahore he timatanga o ona ra, he mutunga rahei o ona tau, mai i ake tonu atu ki ake tonu atu.

68. Nana, ka kotahi koe i roto i a au, he Tama na te Atua; a ma te penei e meinga ai te katoa hei tama maku. Amine.