1. A ka korero atu ano ahau, te Ariki, te Atua, ki a Mohi, ka mea: Ko tena Hatana tau i whakahau ai i runga i te ingoa o taku Tama Kotahi, ko ia ano tera i te timatanga mai ra ano, a i haere mai ia ki toku aroaro, i mea—Nana, tenei ahau, tonoa ahau, a ko ahau hei tama mau, a maku e hoko nga tangata katoa, e kore hoki tetahi wairua e ngaro, a he pono ka meinga tenei e ahau, no reira homai to honore ki a au.

2. Otira, nana, ko taku Tama Aroha, ko ia taku i Aroha ai, i Whiriwhiri ai no te timatanga, ka mea ia ki a au—E pa, kia meatia tau e pai ai, a mou te kororia, a ake tonu atu.

3. No reira, i te mea kua tutu mai a Hatana ki a au, me te rapu kia whakangaromia te here-kore o te tangata, taku, ta te Ariki, ta te Atua, i hoatu ai ki a ia, a me tana whai ano hoki kia hoatu toku kaha ki a ia; a he mea na te kaha o taku Tama Kotahi, i meinga ai e ahau kia panga atu ki raro.

4. A meinga ana ia ko Hatana, ae ra, ko te rewera, ko te matua o nga teka katoa, te kai maminga, te kai whakakapo i nga tangata, te kai arahi i a ratou ki te hereherenga kia rite ki tana e mea ai, ae ra te hunga katoa kihai i whakarongo ki toku reo.

5. Na, he mohio rawa te nakahi i nga kirehe katoa o te parae, kua hanga nei e ahau, e te Ariki, e te Atua.

6. A, purua ana e Hatana ki roto ki te ngakau o te nakahi (no te mea kua kumea e ia te tokomaha kia aru i a ia), a i rapu hoki ki te maminga i a Iwi, no te mea kihai ia i mohio ki nga whakaaro, no reira i anga ai ia ki te whakangaro i te ao.

7. Na, ka mea atu ia ki te wahine: Ae ra, i mea ranei e te Atua kia kaua korua e kai i nga rakau katoa o te kaari ? (I korero ia ma roto i te mangai o te nakahi).

8. A, ka mea atu te wahine ki te nakahi: E kai ano maua i nga hua o nga rakau o te kaari;

9. Engari ko nga hua o te rakau e kite na koe i waenganui o te kaari, ta te Atua i mea ai—Aua korua e kai i ona hua, aua hoki korua e pa atu, kei mate korua.

10. A, ka mea atu te nakahi ki te wahine: E kore korua e mate;

11. No te mea e mohio ana te Atua, i te ra e kai ai korua i tona hua katahi ka tuwhera o korua kanohi, a ka rite korua ki nga Atua, te mohio ki te pai me te kino.

12. A, i te kitenga o te wahine he pai te rakau mo te kai, a e ahuareka ana ki te kanohi, a he rakau hoki e hiahiatia ana hei mea i a ia kia matau, katahi ia ka tango i tona hua, a kainga ana, a hoatu ana ano hoki ki tona tane i a ia, a kai ana ia.

13. A ko nga kanohi o raua tokorua ka tuwhera, a ka mohi raua e noho tahanga ana raua. A tuia ana e raua nga rau piki, a meatia ana hei rapaki mo raua.

14. A ka rongo raua i te reo o te Ariki, o te Atua, i a raua e haereere ana i roto i te kaari, i te hauhautanga o te ra; a haere ana a Arama me tana wahine ki te huna i a raua ano i te aroaro o te Ariki, o te Atua, i roto i nga rakau o te kaari.

15. A, ka karanga ahau, te Ariki, te Atua, ki a Arama, a ka mea ki a ia: E haere ana koe ki hea ?

16. A ka mea ia: I rongo ahau i tou reo i te kaari, a wehi ana ahau, no te mea i kite ahau, kei te tu tahanga ahau, a huna ana ahau i a au ano.

17. A ka mea te Ariki, te Atua, ki a Arama: Na wai i mea ki a koe e tu tahanga ana koe ? Kua kainga ranei e koe te hua o te rakau i whakahau ai ahau ki a koe, aua rawa koe e kai, no te mea ki te peratia e koe ka mate rawa koe ?

18. A ka mea te tangata: Na te wahine i homai nei e koe ki a au, i whakahaua nei kia noho tonu ia ki a au, nana i homai ki a au te hua o te rakau, a kai ana ahau.

19. Na, ka mea atu ahau, te Ariki, te Atua ki te wahine: He aha tenei mea kua meatia e koe ? A ka mea te wahine: Na te nakahi ahau i maminga, a kai ana ahau.

20. A ka mea atu ahau, te Ariki, te Atua, ki te nakahi: Mo te meatanga i tenei mea kua meatia na e koe, ka kanga koe i runga atu i nga kararehe katoa, me nga kirehe katoa o te parae; a ko tou kopu hei haerenga mou, a ko te puehu ano tau e kai ai i nga ra katoa e ora ai koe.

21. A ka whakatupuria ake e ahau he pakanga i waenganui i a koe me te wahine, i waenganui i ou uri me o te wahine uri; a ka maru to matenga i a ia, a ka maru tona rekereke i a koe.

22. A ka mea ahau, te Ariki, te Atua, ki te wahine: Ka whakanuia e ahau tou mamae, me tou haputanga. A ka mamae koe ina whanau tamariki, a ka hiahia koe ki tou tahu, ko ia ano he rangatira mou.

23. A ka mea ahau, te Ariki, te Atua, ki a Arama: No te mea i whakarongo koe ki te reo o tou wahine, a kainga ana nga hua o te rakau i whakahau ai ahau ki a koe, i mea ai—Aua rawa koe e kai i ona hua, ka kanga te whenua mou; ka kainga e koe ona hua i roto i te mamae i nga ra katoa e ora ai koe.

24. Tataramoa hoki, he tumatakuru e whakaputaina ake mau, a e kai koe i te otaota o te parae.

25. Ma te werawera o tou mata e kai ai koe i te taro, a hoki noa koe ki te oneone—no te mea ka mate koe—i tangohia mai hoki koe i reira, no te mea he puehu koe, a ka hoki ano ki te puehu.

26. A ka huaina e Arama te ingoa o tana wahine ko Iwi, no te mea ko ia te whaea o nga tangata ora katoa; no te mea pera ano taku, ta te Ariki, ta te Atua i hua ai ko te tuatahi o nga wahine katoa, no te mea he maha.

27. A hanga ana e ahau, e te Ariki, te Atua, nga kiri koati mo Arama me tana wahine ano hoki hei kakahu mo raua.

28. A ka mea ahau, te Ariki, te Atua, ki taku Tama Kotahi: Nana, kua rite nei te tangata ki a taua, te mohio ki te pai me te kino; na, kei totoro atu tona ringa, kei tango i nga hua o te rakau o te ora, a ka kai, ka ora mo ake tonu atu.

29. No reira ahau, te Ariki, te Atua, e tono atu ai i a ia ki waho i te Kaari o Erene, hei ngaki i te whenua, i tangohia mai nei ia i reira.

30. No te mea e ora ana ahau, te Ariki, te Atua, me aku kupu ano e kore e memeha, no te mea i puta atu era i toku mangai, a ka tutuki rawa.

31. No reira i peia atu ai e ahau te tangata a whakanohoia ana ki te taha rawhiti o te Kaari o Erene, he kerupima, me te hoari muramura, he mea piupiu tonu ki tetahi taha, ki tetahi taha, hei tiaki i te huarahi ki te rakau o te ora.

32. (A ko nga kupu enei r korero ai ahau ki taku pononga, ki a Mohi, a e pono ana era, rite tonu ki taku e pai ai; a naku i korero ena ki a koe; aua e whakaaturia ena ki tetahi tangata, a kia whakahau ra ano ahau i a koe, engari ki te hunga e whakapono ana.) Amine.