1 Thiab kuv, tus Tswv uas yog Vajtswv, hais rau Mauxes, hais tias: Tus Dab Ntxwg Nyoog ntawd, uas koj tau txib kom khiav mus los ntawm kuv Tib Leeg Tub lub npe, nws yog tus uas muaj nyob thaum chiv keeb, thiab nws los rau kuv, hais tias—Saib seb, kuv nyob ntawm no, txib kuv mus, kuv yuav ua koj leej tub, thiab kuv yuav txhiv tag nrho cov tib neeg dim, kom tsis muaj ib tug poob li, thiab kuv yuav ua li ntawd tiag; yog li ntawd muab koj lub sam xeeb rau kuv.

2 Tiam sis, saib seb, kuv Leej Tub uas Kuv Hlub, uas yog tus kuv Hlub thiab Xaiv txij thaum chiv keeb los lawm, hais rau kuv tias—Leej Txiv, cia muaj raws li koj siab nyiam, thiab lub yeeb koob yog koj li mus ib txhis li.

3 Yog li ntawd, vim tias Dab Ntxwg Nyoog ntxeev siab tawm tsam kuv, thiab nrhiav kev ua kom tib neeg txoj kev ywj siab xaiv puas tsuaj, uas kuv, tus Tswv uas yog Vajtswv, tau pub rau neeg, thiab kuj hais kom kuv muab kuv tus kheej lub hwj chim rau nws thiab; los ntawm kuv Tib Leeg Tub lub hwj chim, ces kuv thiaj muab nws ntiab tawm;

4 Ces nws hloov los ua Dab Ntxwg Nyoog, muaj tseeb tiag, twb los ua tus dab phem, leej txiv ntawm txhua txoj kev dag, kom dag ntxias thiab ua rau neeg dig muag, thiab txhom coj lawv raws li nws siab nyiam, twb coj tag nrho cov uas tsis kam mloog kuv lub suab.

5 Thiab nim no tus nab ntse tshaj txhua yam tsiaj nruab nrag huv tib si uas kuv, tus Tswv uas yog Vajtswv, tau tsim.

6 Thiab Dab Ntxwg Nyoog tshoov tus nab lub siab, (vim Dab Ntxwg Nyoog tau coj ntau leej raws nws qab,) thiab Dab Ntxwg Nyoog kuj nrhiav kev ntxias Evas thiab, vim Dab Ntxwg Nyoog tsis paub Vajtswv lub siab xav, yog li ntawd nws thiaj nrhiav kev ua kom neeg ntiaj teb puas tsuaj.

7 Thiab nws hais rau tus poj niam tias: Muaj tseeb tiag, Vajtswv puas tau hais tias—Neb yuav tsum tsis txhob noj txhua yam txiv ntoo hauv lub vaj no? (Thiab nws hais lus los ntawm tus nab lub qhov ncauj.)

8 Thiab tus poj niam hais rau tus nab tias: Wb yeej noj tau cov txiv ntawm cov ntoo nyob hauv lub vaj no;

9 Tiam sis cov txiv ntawm tsob ntoo uas koj pom nyob hauv plawv vaj, Vajtswv tau hais tias—Neb tsis txhob noj, thiab neb tsis txhob kov, tsam neb tuag.

10 Ces tus nab hais rau tus poj niam tias: Neb yeej yuav tsis tuag;

11 Vim Vajtswv yeej paub hais tias hnub uas neb noj cov ntawd, ces neb qhov muag yuav qhib, thiab neb yuav zoo li tej vaj tswv, paub qhov zoo thiab qhov phem.

12 Ces thaum tus poj niam pom tias tsob txiv ntoo twb zoo noj, thiab nws xav hais tias yuav ntxim qab heev, thiab xav tau tsob txiv ntoo kom nws txawj ntse, nws txawm muab lub txiv ntawd, thiab muab noj, thiab kuj muab rau nws tus txiv uas nrog nws, thiab nws tus txiv muab noj.

13 Ces nkawd qhov muag txawm qhib, thiab nkawd thiaj paub hais tias nkawd liab qab. Ces nkawd muab nplooj txiv cev xaws ua ke thiab muab ua sev rau nkawd sia.

14 Thiab nkawd hnov tus Tswv uas yog Vajtswv lub suab, thaum nkawd tab tom taug kev nyob hauv lub vaj, thaum yuav tsaus ntuj; thiab Adas thiab nws tus poj niam nkawd mus nraim nkawd tus kheej nyob hauv cov ntoo hauv lub vaj, kom deb ntawm tus Tswv uas yog Vajtswv xub ntiag.

15 Thiab kuv, tus Tswv uas yog Vajtswv, hu Adas, thiab hais rau nws tias: Koj dua twg lawm?

16 Thiab nws hais tias: Kuv hnov koj lub suab nyob hauv lub vaj, thiab kuv ntshai, vim kuv pom tias kuv liab qab, ces kuv thiaj nraim kuv tus kheej.

17 Thiab kuv, tus Tswv uas yog Vajtswv, tau hais rau Adas tias: Leej twg qhia koj tias koj liab qab? Koj puas tau noj ntawm tsob ntoo uas kuv kom koj tsis txhob noj, yog koj noj ces koj yeej yuav tuag?

18 Ces tus txiv neej hais tias: Tus poj niam uas koj muab rau kuv, thiab txib kom nws yuav tsum nyob nrog kuv, nws muab cov txiv ntawm tsob ntoo rau kuv thiab kuv tau noj.

19 Thiab kuv, tus Tswv uas yog Vajtswv, hais rau tus poj niam tias: Koj ua dab tsi li no? Thiab tus poj niam hais tias: Tus nab ntxias kuv, ces kuv thiaj li noj.

20 Thiab kuv, tus Tswv uas yog Vajtswv, hais rau tus nab tias: Vim koj tau ua li no koj yuav raug foom phem tshaj tej tsiaj nyeg, thiab tshaj txhua tus tsiaj qus nruab nrag; koj yuav nkag ntawm koj qab plab mus, thiab koj yuav noj hmoov av tag koj lub neej;

21 Thiab kuv yuav ua kom koj thiab tus poj niam cov tub ki sib ntxub, koj cov tub ki thiab tus poj niam cov tub ki; thiab nws yuav tsoo koj taub hau tawg, thiab koj yuav tom nws lub luj taws.

22 Kuv, tus Tswv uas yog Vajtswv, hais rau tus poj niam, hais tias: Kuv yuav tsub kev txom nyem thiab kev xeeb me nyuam ntau rau koj. Koj yuav muaj kev txom nyem thaum yug me nyuam, thiab qhov uas koj lub siab ntshaw yuav yog rau koj tus txiv, thiab nws yuav tswj hwm koj.

23 Thiab kuv, tus Tswv uas yog Vajtswv, hais rau Adas, hais tias: Vim koj tau mloog koj tus poj niam lub suab, thiab tau noj cov txiv ntawm tsob ntoo uas kuv txib koj, hais tias—Koj yuav tsum tsis txhob noj, cov av yuav raug foom tsis zoo rau koj; nrog kev tu siab koj yuav khwv tas koj sim neej thiaj tau noj tau haus.

24 Av yuav tuaj pos, thiab tuaj pos nroj rau koj, thiab koj yuav noj tej zaub tom teb.

25 Koj ntsej muag yuav tawm hws koj thiaj yuav tau mov noj, kom txog thaum koj rov mus rau hauv cov av—vim koj yeej yuav tuag—vim koj tawm hauv av los: vim koj yog av, thiab koj yuav rov mus ua av.

26 Thiab Adas hu nws tus poj niam lub npe ua Evas, vim Evas yog leej niam ntawm txhua tus uas muaj sia nyob; vim li no kuv, tus Tswv uas yog Vajtswv, thiaj muab thawj tus ntawm tag nrho cov poj niam hu li ntawd, uas coob heev.

27 Rau Adas, thiab rau nws tus poj niam, kuv, tus Tswv uas yog Vajtswv, tau muab tawv tsiaj los ua ris tsho rau nkawd, thiab muab rau nkawd hnav.

28 Thiab kuv, tus Tswv uas yog Vajtswv, hais rau kuv Tib Leeg Tub tias: Saib seb, tus txiv neej no twb hloov los zoo li wb paub qhov zoo thiab qhov phem lawm; thiab nim no tsam nws ho cev nws txhais tes mus thiab muab los ntawm tsob ntoo uas cawm neeg txoj sia, thiab noj thiab yuav muaj sia nyob mus ib txhis,

29 Yog li ntawd, kuv, tus Tswv uas yog Vajtswv, yuav xa nws tawm hauv lub Vaj Edees mus, kom mus ncaws tej av uas muab los puab nws;

30 Vim ib yam li kuv, tus Tswv uas yog Vajtswv, muaj sia nyob, ib yam li ntawd kuv tej lus yuav tsum muaj qab hau, rau qhov kuv tej lus uas tawm hauv kuv lub qhov ncauj mus lawm yuav tsum muaj raws li kuv hais.

31 Kuv thiaj ntiab tus txiv neej ntawd tawm, thiab nyob hauv lub Vaj Edees sab hnub tuaj, kuv tso ib co qhelunpees thiab ib rab ntaj nplaim taws uas tig txhua phab los zov thaiv txoj kev mus rau tsob ntoo uas cawm neeg txoj sia.

32 (Thiab tej lus no yog tej lus uas kuv hais rau kuv tus tub qhe Mauxes, thiab tej lus no yeej tseeb raws li kuv siab nyiam; thiab kuv tau hais tej lus no rau nej. Xyuas kom koj txhob muab qhia rau leej twg, kom txog thaum kuv txib koj tso, tsuas yog rau cov ntseeg xwb. Amees.)