Digital Lamang: Mga Young Adult

Pagtabang sa mga Minahal sa Pag-atubang sa mga Pangutana ug mga Pagduha-duha mahitungod sa Hugot nga Pagtuo

Ni Denya Palmer

Mga Serbisyo sa Welfare ug Pagbarug sa Kinaugalingong Paningkamot

Mahagiton ang pag-atubang sa mga pagduha-duha mahitungod sa hugot nga pagtuo. Ania ang pipila ka mga giya sa pagtabang sa imong mga minahal nga makasugakod niini.

Usa ka higala mitawag kanako usa ka gabii samtang nagdrayb ako pauli gikan sa trabaho, ug sa dihang siya nangutana kon kumusta na ako, ang tanang matang sa mga pagbati wala kapugngi nga migawas. Ako kanunay mibati og kabalaka mahitungod sa pipila ka mga pangutana nga ako aduna. Piho nga mga aspeto sa Simbahan ingon og nagdugang og kalibug kanako. Mibati ako og kasagmuyo nga ang mga tubag sa akong mga pangutana wala pa maklaro. Ug bisan tuod dili ako kasagarang masuko nga tawo, akong gibati ang kalagot ug kasamok. Ako nakigbisog sa akong mga pangutana sa makadiyot, ug wala ako masayud unsa ang buhaton.

Sa akong paghunong ngadto sa akong agianan sa sakyanan [driveway], akong gipagawas ang akong tanang gibati ug gihunahuna. Akong gisultihan siya mahitungod sa mga pangutana nga naghasol kanako ug unsa ang akong gibati. Human sa among panag-istoryahanay, mas naarang-arang ang akong gibati. Ug kini dili tungod kay siya aduna sa tanan nga mga tubag alang kanako—siya wala. Hinoon, siya andam lamang nga maminaw kanako. Siya mihatag og katarungan sa akong pagbati ug mitabang kanako nga mahibalo nga ako dili lamang ang tawo nga adunay mga pangutana. Ang akong mga pangutana dili usa ka hulagway sa kakulang sa hugot nga pagtuo sa akong bahin, ug OK ra nga magduha-duha.

Ang pagbaton og mga pangutana mahitungod sa ebanghelyo mahimong usa ka makahagit ug makausab sa kinabuhi nga kasinatian. Ug buot nga motabang sa usa ka minahal sa paglatas niini nga proseso makasakit ug makalibug. Tingali ilang gibati nga wala sila mahisakop o sama nga sila mao lamang ang kinsa nakigbisog sukad og mga pangutana.

Apan ikaw makatabang kanila ug makapakita kanila nga sila nahisakop, ug nga sila wala mag-inusara sa mga panahon sa pagduha-duha.

Unsa ang Buhaton Kon Magtabang sa usa ka Higala nga may mga Pangutana

Kon ang mga higala o mga minahal adunay mga pangutana, mga pagduha-duha o mga pakigbisog sa hugot nga pagtuo, gusto natong buhaton ang tanan nga atong mahimo sa pagtabang. Apan lisud nga mahibaloan kon unsa gyud ang tinuod nga makatabang. Ania ang pipila ka mga ideya nga motabang kanimo sa pagtabang sa imong mga minahal:

Tuguti ang Espiritu nga mogiya kanimo. Pag-ampo nga mahibalo kon sa unsa nga paagi ikaw makatabang ug unsay imong ikasulti, ug dayon salig sa Ginoo.
Pagbaton og pagsabut sa gibati. Pangutana mahitungod sa unsay gisinati sa imong higala ug paminaw aron makasabut. Paghatag og katarungan nga kini nga matang sa kasinatian mahagiton, ug pahibaloa sila nga ikaw anaa sa pagtabang sa bisan unsa nga paagi nga ikaw makahimo.
Diha ka lamang alang sa tawo. Tingali ang ila lamang nga gikinahanglan mao nga ikaw mahimong usa ka maayong tigpaminaw ug usa ka maloloy-on nga higala kinsa dili dali nga mohukom.
Hinumdumi nga dili ikaw responsable sa pag-ayo o pagsulbad sa mga pakigbisog sa imong higala. Ikaw makapaminaw ug makatabang—apan kini ilang panaw, dili imo. Unsa ang ilang desisyon dili usa ka hulagway kanimo o sa imong hugot nga pagtuo.
Kon ang mga pangutana sa imong minahal o mga kabalaka moalarma kanimo, paningkamuti nga makalma ug tabangi sila nga mobati og kalinaw kon sila anaa uban kanimo. Kon ang usa ka tawo adunay mga pangutana, sila mahimong mobati nga dili mahimutang, maglibug, o masuko. Busa kon ikaw magpakita og ka kalma kay sa kaisug, ikaw mas makatabang og maayo.
Hinumdumi nga wala diha kanimo ang tanang mga tubag. Makatanyag ka sa imong mga hunahuna ug panglantaw, apan OK usab ang pag-ingon, “Dili ako sigurado mahitungod niana”, o sa paggahin og panahon sa paghunahuna o pagtuon sa dili pa mohatag sa tubag.
Likayi ang diha-diha dayon nga pagtanyag og “sayon nga mga solusyon” nga mga sugyot. Ang mga tawo nagkinahanglan lamang og usa ka tawo nga maminaw una ngadto kanila sa dili pa makadungog og mga sugyot.
Kon ang tubag o sugyot nga imong gihatag dili makatabang o wala nila mauyoni, pasagdi lang. Kita matag usa kinahanglan nga mangita og mga tubag sa atong kaugalingon ug diha sa atong kaugalingong mga paagi, ug kita matag usa makadawat og lahi nga pagpadayag.
Pag-ampo ug pagpuasa alang sa imong minahal. Ang pag-ampo alang sa uban makadala sa mga gahum sa langit ngadto sa ilang mga kinabuhi. Labing importante, si Alma nga Batan-on nagiyahan ngadto sa paghinulsol tungod sa mga pag-ampo sa iyang amahan (tan-awa sa Mosiah 27:14). Ayaw gayud ipakaubos ang unsay mahimo sa imong hugot nga pagtuo alang sa uban!
Bisan unsa pay mahitabo, hinumdumi nga imong gimahal kini nga tawo. Kon ang usa ka tawo nga atong gimahal mohukom sa pagtuo og lahi kay kanato o maghimo og mga desisyon nga dili nato masabtan, makapili gihapon kita sa pagtahud sa ilang kabubut-on ug sa paghigugma kanila bisan unsa pa.

Sa kinatibuk-an, hunahunaa nga ang pagbaton og mga pangutana o mga pagbati nga nagduha-duha mahitungod sa mga butang OK ra—kini usa ka mahinungdanong bahin sa proseso sa pagtubo dinhi sa mortalidad. Si Elder Dieter F. Uchtdorf sa Korum sa Napulog Duha Ka mga Apostoles mitudlo: “Natural lang nga dunay mga pangutana—ang gamayng liso sa matinuorong pangutana sagad mogitib ug mohingkod sa pagkadakong kahoy sa panabut. Dunay pipila ka miyembro sa Simbahan kinsa, sa usa ka higayon, wala makasulay og seryoso o sensitibong mga pangutana. Usa sa mga katuyoan sa Simbahan mao ang pag-alima ug pag-ugmad sa liso sa pagtuo—bisan sa balason nga yuta sa pagduhaduha ug kawalay kasiguroan. Ang hugot nga pagtuo molaum sa mga butang diin dili makita diin mga tinuod.”¹

Wala gihapon akoy tubag sa akong tanan nga mga pangutana. Usa sa labing dako nga mga butang nga ang akong higala nakatabang kanako sa pagbuhat mao ang pag-amgo nga ako wala magkinahanglan nga makabaton sa tanang tubag diha-diha dayon. Paglabay sa panahon, ang mga tubag miabut kanako sa mga tinipik ug mga piraso. Ako misalig nga ang Dios aduna sa mga tubag ug nga Siya nagbantay kanako. Ako adunay paglaum nga ang mga tubag moabut sa panahon nga ako nagkinahanglan niini. Ug kana igo na alang kanako sa pagkakaron.