Digital Lamang: Mga Young Adult
Akong mga Pangutana ug ang Gugma ni Kristo
Akong natan-aw nga ang paghunahuna sa akong mga pangutana nga usa ka “hinay nga makasabut” nagtabang kanako sa pagpadayon uban sa hugot nga pagtuo diha kang Kristo.
Sa katapusan sa debosyonal uban ni Presidente Russell M. Nelson nga gihatag ngadto sa mga young adult, siya mipanalangin kanamo “nga makahimo sa pag-ila tali sa husto ug sa sayop, tali sa mga balaod sa Dios ug sa nagkasumpaki nga mga tingog sa kalibutan.” Siya mipanalangin kanamo “uban sa gahum sa pag-ila sa mga panglingla sa kaaway … [ug] uban sa mas dakong kapasidad sa pagdawat og pagpadayag.”1 Kana usa ka dakong panalangin alang kanamo isip mga young adult! Ako may kaugalingong mga kasinatian sa pagdawat og pagpadayag kalabut sa mga pangutana.
Kinaiya nako ang pagkamaukiton nga tawo kinsa sa kinatibuk-an sobra ang pagkamasukit-sukiton sa tanang mga butang. Ang pagpangutana ug ang pagpaabut alang sa mga tubag kanunay nga kabahin sa akong kinaiya, ug ang kamatuoran kanunay nga importante kaayo ngari kanako. Apan sulod sa mga katuigan, usahay akong gibati ang pag-inusara o kaulaw mahitungod sa pagbaton og daghang mga pangutana ug gani mga pagduha-duha mahitungod sa ebanghelyo ug sa Simbahan. Bisan pa niana, ang mga kasulatan nagsulti kanato nga “ayaw pagduha-duha” (Doktrina ug mga Pakigsaad 6:36). Ug ang Manluluwas nangutana ni Pedro, “O tawo nga diyutayg pagtuo, nganong nagduhaduha ka man?” (Mateo 14:31).
Pag-ila sa mga Kahuyang sa Atong Pagsabut
Usa ka higayon, ang akong hugot nga pagtuo ingon og nabugnaw. Apan ang Dios nakahimo sa pagtudlo kanako og usa ka nindot nga leksyon samtang ako nagbasa sa Basahon ni Mormon. Human si Kristo misangyaw ngadto sa mga Nephite, nakamatikod Siya og usa ka butang. “Ako nakasabut nga kamo mahuyang, nga kamo dili makasabut sa akong tanan nga mga pulong nga gisugo kanako sa Amahan nga isulti nganha kaninyo niini nga higayon” (3 Nephi 17:2).
Gibati nako nga si Kristo namulong niadto nga mga pulong ngari kanako. Gibati usab nako ang hilabihan og kahinay nga makasabut, ug ako dili makasabut sa tanan nga Siya gusto kanako nga mahibalo. Ang tubag ni Kristo ngadto niining kahinay nga makasabut mitandog kanako: Nakita ni Kristo ang gugma sa mga Nephite, ug bisan tuod sila hinay kaayo nga makasabut sa Iyang mga pulong, Siya nangalagad ug nahigugma kanila sa paagi nga sila mahimong makasabut.
Sa mga higayon diin ako mibati og hilabihan kahinay, hilabihan sa kakapoy, o hilabihan sa kahuyang sa pagsabut sa mga pulong ni Kristo, Siya nagpanalangin kanako og kalooy ug pagsabut. Ang Iyang gugma mao ang unsay nakahatag kanako og kalig-on sa pagpadayon ug sa pagpadayon sa pagsiksik alang sa mga kamatuoran nga ako nagtinguha.
Pagbati sa Gugma ni Kristo samtang Kita Nagtinguha sa Kamatuoran
Kon ikaw nanlimbasug sa kamatuoran o doktrina sa pagka-karon, ayaw kabalaka. OK ra ang pagpanlimbasug sa malisud nga mga butang ug adunay mga pangutana o mga kabalaka nga usahay makapalibug kanimo. Samtang ikaw nagsiksik sa kamatuoran, hinumdumi nga ang Dios nakasabut kanimo, nahigugma kanimo, ug malipay kon ikaw naggamit sa imong kabubut-on sa pagtinguha sa kahayag. Walay angay nga ikaulaw niana. Si Elder Jeffrey R. Holland sa Korum sa Napulog Duha Ka mga Apostoles miingon: “Ang pakig-away taliwala sa kangitngit ug kawalay paglaum ug pangamuyo alang sa kahayag mao ang nag-abli niini nga dispensasyon. Kini mao ang unsay naghimo niini sa pagpadayon, ug kini mao ang unsay naghimo kanimo sa pagpadayon.”2
Kita mahibalo sa kamatuoran sa tanang mga butang pinaagi sa gahum sa Espiritu Santo (tan-awa sa Moroni 10:5), apan kini panagsa ra nga moabut diha-diha dayon o sa panahon nga atong gikinahanglan nga moabut kini. Hinoon kita nagkat-on “pagtulun-an human sa usa ka pagtulun-an, lagda human sa usa ka lagda” (2 Nephi 28:30). Ang kamatuoran moabut sa panahon nga gitakda sa Ginoo. Siya nahibalo kanus-a kita andam alang sa kahibalo, ug nahibalo Siya unsay atong gikinahanglan nga masinati sa dili pa madawat kini.
Mapasalamaton ako alang sa usa ka Dios kinsa motudlo kanato diha sa atong mga kahuyang ug kinsa mopalaum una kanato, dayon motuo, ug dayon mahibalo. Ug ako nahibalo nga kita makadawat sa kamatuoran pinaagi sa personal nga pagpadayag, sama lamang sa gisaad ni Presidente Nelson. Ang Langitnong Amahan nagpakabana sa atong mga pangutana, ug Siya mogiya kanato ngadto niini. Usahay ang Iyang tubag mao ang pag-usab sa atong mga kasingkasing aron kita makakita sa mga butang sa lahi nga panan-aw, ug usahay gihangyo lamang kita nga magmapailubon ug magmatinud-anon ug “i-andam ang [atong] mga hunahuna alang sa ugma” alang sa Iyang pag-anha aron sa pagtudlo kanato sa dili madugay (tan-awa sa 3 Nephi 17:3).
Nasayud ako nga bisan unsa nga mga panabut nga kita nagkulang, makapadayon kita uban sa paglaum ug hugot nga pagtuo nga ang tanan usa ka adlaw niana ipadayag. Ug hangtud niana, kita makapadayon nga mas magpaduol ngadto ni Kristo, kinsa nakakita sa atong mga kahuyang ug sa gihapon nahigugma kanato.