Mga Young Adult

Nagpaayo gikan sa Espirituhanong Pagpamanhud

Ni Tadeo Murillo

Kita anaa sa espirituhanong kakuyaw kon mohunong kita sa pagbati sa Espiritu, apan uban sa tabang ni Kristo makabuntog kita niana nga espirituhanong pagpamanhud.

Imahe

photo of butterfly on woman’s shoulder

Mga litrato gikan sa Getty Images

Ang sanla usa ka makatakud nga sakit nga atong mabasa sa Biblia. Resulta kini sa usa ka bacterium nga makamugna og grabe nga mga nuka ug mga samad sa panit. Apan ang nag-unang mga sintomas niining sakit nga kini makahimo og grabe nga kadaot ngadto sa nervous system, moresulta sa pagkawala sa kasensitibo sa paghikap, sa init, sa sakit, o sa ubang mga pagbati. Ang mga tawo kinsa natakbuyan mahimong tinuoray nga mamanhud.

Bisan og ang sanla dili sama ka seryoso o sama ka komon sa unang panahon, mga tawo usab karon nawad-an na sa ilang abilidad sa pagbati—apan milabaw pa hinoon kay sa pisikal nga kadaot, kita nameligro nga mamanhud sa espirituhanong paagi.

Si Elder Neal A. Maxwell (1926–2004) sa Korum sa Napulog Duha Ka mga Apostoles mipasabut nga kini nga kahimtang sa kawalay pagbati mahimong maggikan sa pagbaliwala sa mga pag-aghat sa Balaang Espiritu ug sa dili pagtuman sa mga sugo sa Dios. Mitudlo siya:

“Ang atong kapasidad sa pagbati nagpugong sa atong kinaiya sa daghang mga paagi, ug pinaagi sa katapol kon ang atong mga pagbati moaghat kanato sa pagbuhat og maayo, atong gisumpo kanang kapasidad sa pagbati. Ang pagkadaling mobati ni Jesus ngadto sa mga panginahanglan niadtong naglibut kaniya ang nakahimo niining posible alang kaniya sa pagtubag pinaagi sa pagbuhat.

“Sa laing bahin sa managlahi nga espiritwal nga aspeto mao ang mga indibidwal sama sa masalaypon nga igsoong mga lalaki ni Nephi; namatikdan ni Nephi ang nagtubo nga kawalay pagbati ngadto sa mga butang nga espirituhanon: ‘ang [Dios] nakapamulong nganha kaninyo sa usa ka hinay nga hinagawhaw nga tingog, apan kamo ingon sa walay pagbati, mao nga kamo dili makabati sa iyang mga pulong’ [1 Nephi 17:45].”¹

Adunay dakong kakuyaw kon kita mohunong sa pagbati sa Espiritu o bisan kon dili kita sigurado kon sa unsang paagi ang Espiritu mamulong ngari kanato. Ang kalibutan daling makapalinga kanato o mopahisalaag kanato matag adlaw, nakapahimo kanato nga dili mobati nianang malinawon nga dyutay apan gamhanan nga tingog nga kanunayng andam sa paggiya kanato matag adlaw (tan-awa sa 1 Mga Hari 19:11–12).

Apan bisan kon mobati kita nga kita unta makabaton sa “espirituhanong sanla” usahay, ang pagkaayo posible.

Kinahanglan kanunay natong hinumduman nga si Jesukristo mao ang miayo sa mga tawo nga adunay sanla atol sa Iyang pangalagad. Ug Siya mao ang makaayo sa atong espirituhanong pagpamanhud karon ug makatabang kanato nga mobati pag-usab sa Espiritu. Ania ang pipila ka pamaagi nga mahimong makatabang.

Pag-ila sa Espiritu

Usa ka pamaagi aron mabati pag-usab maggikan sa atong abilidad sa pagdungog ug pag-ila sa mga paghunghong sa Espiritu Santo. Sama sa gitudlo ni Moroni, “Pinaagi sa gahum sa Espiritu Santo kamo mahimo nga masayud sa kamatuoran sa tanan nga mga butang” (Moroni 10:5). Atong ilikay ang atong kaugalingon sa pagpamanhud, magtinguha og personal nga pagpadayag, ug mobati sa atong mga kaugalingon sa kamatuoran sa tanang butang.

Sa inyong panaw ngadto sa pagbati og balik sa Espiritu, pangutan-a ang inyong kaugalingon niining mga pangutana aron makasabut sa inyong relasyon uban sa pagpadayag:

Kanus-a ang katapusang higayon nakadawat ko og personal nga pagpadayag?
Kanus-a ang katapusang higayon nangayo ko og personal nga pagpadayag?
Kanus-a ang katapusang higayon nga mihangyo ko sa Langitnong Amahan sa pagtabang kanako nga makaila sa personal nga pagpadayag sa akong kinabuhi?

Sa kinatibuk-an, gitinguha ba gayud nimo ang pagpadayag gikan sa Dios? Malisud ang pagbati sa malipayong bunga sa Espiritu kon kini ingon og ang langit sirado (tan-awa sa Mga Taga-Galacia 5:22–23). Apan ang pagkaaktibo sa pagtinguha og pagpadayag sa inyong inadlaw-adlaw nga kinabuhi mao ang pamaagi sa pag-abli sa kalangitan ug pagdapit sa Espiritu sa pagbalik ngadto sa inyong kinabuhi.

Sayop nga pagsabut sa Pagpadayag

Apan ania ang espirituhanong mga kasinatian ug personal nga pagpadayag nga mahimong maliputon.

Kon kita maghisgut kabahin sa personal nga pagpadayag, ang atong mga hunahuna kanunay nga molaktud ngadto sa mga panan-awon, mga pagbisita sa anghel, o sa talagsaong mga tingog. Ug kon kita dili makasinati niining mga butanga, lagmit mobati kita nga ang pagdawat og giya gikan sa Espiritu walay paglaum. Tingali mobati kita nga murag duna kitay problema, nga modala kanato ngadto sa paghunong sa pagtinguha sa Espiritu.

Apan kinahanglan kita nga makaamgo nga ang pagbati sa Espiritu dili mahitungod niadtong mga dinagko, mahinungdanon nga mga higayon, ni ang Ginoo makigsulti lang kanato kabahin sa atong dagko nga mga desisyon sa kinabuhi. Ang laing laang nga kita mapandol mao nga kita kasagaran modangop sa Ginoo alang sa tabang diha lang sa dagko nga mga desisyon sama sa pag-eskwela, mga trabaho, kaminyoon, ug sa pamilya, apan mobaliwala kita sa pagdangop ngadto Kaniya sa matag hunahuna (tan-awa sa Doktrina ug mga Pakigsaad 6:36). Apan ang Langitnong Amahan mamulong kanato sa kanunay. Namulong siya kanato sa paagi nga kita makaila niini sa labing maayo kada usa. Makagiya Siya kanato matag adlaw, bisan sa mga gagmay nga mga detalye sa atong kinabuhi.

Imahe

butterfly on someone’s fingertips

Pagpangandam sa Pagdawat og Pagpadayag

Aron makadungog sa mga butang sa langit, kinahanglan natong ablihan una ang atong dunggan sa langitnong mga butang. Ania ang pipila ka mga paagi nga atong ablihan ang atong mga dunggan ug andamon ang atong kaugalingon sa pagpaminaw sa Ginoo:

Motuo. Sa atong pagpaningkamot sa pagbuntog sa espiritwal nga sangla, tingali kinahanglan nga mausab ang atong panghunahuna ug tinuoray nga motuo sa Langitnong Amahan ug magbaton og hugot nga pagtuo nga Siya mohimo ug mohatag gayud kanato og pagpadayag. Sa pagkatinuod, kita kinahanglang molaum Kaniya. Makahangyo pa gani kita Kaniya sa pagtabang kanato nga masayud kon sa unsang paagi nga Siya mamulong kanato. Kinahanglan molaum kita nga kanunayng makabaton og espirituwal nga mga kasinatian kon kita maningkamot nga mosunod sa Manluuwas ug motuman sa Iyang mga sugo.

Himoa ang inadlaw-adlaw nga mga paningkamot. Usab kita mahimong mas sensitibo sa Espiritu pinaagi sa sinsero nga pag-ampo, pagtuon sa mga kasulatan, pag-ambit sa sakramento, pagtambong sa templo, pag-apil sa buhat sa family history, pagpaminaw sa espirituhanon nga mga musika, pagpangalagad, o sa bisan unsang paagi nga inyong mabati nga duol sa Dios. Kon magkaduol kita ngadto Kaniya, mas bukas ang atong mga kasingkasing sa pagkaayo sa espiritwal nga sanla ug sa pagbati pag-usab sa Espiritu Santo.

Motuman. Laing importanting aspeto sa pagdapit og balik sa Espiritu diha sa inyong kinabuhi mao ang inyong kaandam sa pagsunod kon unsa ang gisulti sa Espiritu kaninyo. Si Presidente Henry B. Eyring, Ikaduhang Magtatambag sa Unang Kapangulohan, mitudlo:

“Kon inyong gipakita ang inyong kaandam sa pagsunod, ang Espiritu mopadala ninyo og dugang nga mga pag-aghat kon unsay ipabuhat sa Dios kaninyo.

“Kon mosunod kamo, ang mga pag-aghat sa Espiritu mas kanunayng moabut, mas magkaduol ngadto sa kanunay nga pagpakig-uban. Ang inyong gahum sa pagpili sa matarung molambo.”²

Ang kaandam sa pagsunod sa kabubut-on sa Ginoo batok sa atong kaugalingon mahimong lisud usahay, apan kita sa kanunay mapanalanginan og dugang nga espirituhanong kapasidad kon kita mobuhat sa ingon. Bisan ang pagsunod sa ginagmay nga mga paagi, gikan sa pagpili sa pagbayad sa atong ikapulo, pagbalaan sa adlaw nga Igpapahulay, o gani sa pagsunod sa usa ka pag-aghat sa pagserbisyo sa laing tawo, makatabang kanato sa paghimo og luna alang sa Espiritu diha sa atong mga kinabuhi.

Ang Pagbati sa Espiritu Usa ka Gasa

Kinahanglan usab natong hinumduman ang saad nga anaa sa atong mga pakigsaad sa bunyag ngadto sa Ginoo. Kanato kinsa nakadawat sa gasa sa Espiritu Santo gisaaran nga kita makabaton sa Espiritu uban kanato kada adlaw kon kita maningkamot sa pagtuman sa atong mga pakigsaad (tan-awa sa Doktrina ug mga Pakigsaad 20:77, 79).

Ang Langitnong Amahan mihatag kanato og gasa sa Espiritu Santo ug gusto nga kita makatagamtam nianang gasa sa kahingpitan niini. Ang makanunayong pagpakig-uban sa Espiritu Santo nagtugot kanato sa paghimo og mga desisyon nga masaligon, mobati og kahupay atol sa mga hagit, molambo sa espirituhanon nga paagi, mobati og kalinaw ug kalipay, ug masayud kon unsaon sa pagserbisyo sa uban. Kini tinuoray usa ka gasa.

Ang pagkaayo gikan sa espirituhanong pagpamanhud nag-agad sa atong kaugalingong hugot nga pagtuo ug kaandam sa pagtabang, bisan kon wala kitay gibati. Samtang maningkamot kita sa pagdapit sa Espiritu diha sa atong mga kinabuhi, makadawat kita og mga impresyon sa hinay-hinay samtang kita maminaw ug motuman. Ang pagpakabuhi nga nahiuyon sa kabubut-on sa Dios makatabang kanato nga molambo sa pagkasensitibo sa Espiritu ug sa hinay-hinay moayo kanato gikan sa bisan unsang kabanhud nga atong gibati. Kon motabang kita sa Manluluwas bisan kita wala mobati, Siya motabang kanato nga mobati nga anaa Siya (tan-awa sa Doktrina ug mga Pakigsaad 88:63).