Nahaunang Kababayen-an sa Pagpahiuli
Gigamit ni Lucy ang Iyang Espirituhanong mga Gasa
Sama ni Lucy Mack Smith, ang matag usa kanato makadawat og pagpadayag. Kitang tanan adunay lahi nga espirituhanong mga gasa nga makapanalangin sa atong mga pamilya ug sa Simbahan.
Paghulagway pinaagi ni Toni Oka
Oktubre kadto sa 1838, ug si Lucy Mack Smith migunit og maayo sa mga kamot sa iyang mga anak nga si Hyrum ug Joseph sa wala pa ang iyang mga anak nga lalaki gikuha. Ang mga lider sa gobyerno mimando sa mga Santos sa pagbiya sa dapit. Pipila ka mga lider sa Simbahan gidakop sa mga sundalo, ug usa ka ilegal nga martial sa korte mimando kanila nga ipapusil. Naghunahuna si Lucy kon makita pa ba kaha niya og balik ang iyang mga anak nga lalaki nga buhi.
Unsa kaha ang posibling makatabang sa usa ka inahan nga makalahutay sa usa ka pagsulay nga sama niini? Paglabay sa katuigan, si Lucy mihinumdom niining panahona ug misubli sa pagsaysay nga siya napalig-on pinaagi sa usa ka mensahe sa kahupayan nga nadawat “pinaagi sa gasa sa pagpanagna”: “Himoa nga ang imong kasingkasing mahupay kalabut sa imong mga anak, dili madagmalan sa ilang mga kaaway.”1
Kini nga kasinatian nakahatag ni Lucy ug sa iyang pamilya og mga pagbati sa “kahupayan, nga molabaw sa tanang yutan-ong paghupay.”
Ang mga Smith ug daghang mga pamilya nga Santos sa Ulahing mga adlaw giabug gikan sa Missouri. Human makakita og kadangpan diha sa kasikbit nga estado sa Illinois, si Lucy ug Joseph Smith Sr. misulay sa pagpangita og impormasyon mahitungod sa ilang mga anak apan walay nakit-an nga mga tubag. Ang Espiritu namulong pag-usab ngadto sa tanlag ni Lucy, nagsulti niya nga si Hyrum ug si Joseph moabut pagkasunod gabii.
Si Bishop Edward Partridge, kinsa uban ni Lucy sa dihang siya nakadawat niini nga pagpadayag, mipahayag og pagduha-duha: “kanunay kong mituo kanimo kaniadto; apan dili nako makita ang bisan unsang posibilidad niini nga panagna nga matuman; apan kon mao kini dili ko makiglalis pag-usab sa imong pulong.”
Nakatulog nianang gabhiona, si Lucy nakakita og panan-awon sa iyang luya ug gigutom nga mga anak nga lalaki nga nagpanaw ibabaw sa halapad nga kasagbutan. Si Lucy nangandam alang kanila sa ilang pag-uli—ug sila miabut gayud pagkasunod adlaw. Gihulagway nila ang panaw nga eksaktong mihaum sa unsay iyang nakita. Human niana, si Bishop Partridge miingon nga siya hangtud sa kahangturan moila ni Lucy nga “usa ka tinuod nga babaye nga propeta.”