Digital Lamang

Pag-abli sa Pultahan ngadto sa Personal nga Pagpadayag

Ni Annelise Gardiner

May mga higayon sa dihang ako mibati ingon og ako nanuktok sa usa ka sirado nga pultahan nga dili maabli.

Sulod sa pipila ka mga tuig nga milabay, si Presidente Russell M. Nelson ug ang dili maihap nga mga lider sa Simbahan midapit kanato sa pagtinguha og personal nga pagpadayag ug sa pagkat-on sa pag-ila sa tingog sa Manluluwas nga aron [maka] “paminaw Kaniya” (Joseph Smith — Kasaysayan 1:17).

Apan alang kanako, ang personal nga pagpadayag usahay makalibug og gamay. Ako gusto nga ang Dios mamulong direkta ngari kanako, apan isip usa ka young adult nga giatubang ang daghang dagkong mga desisyon, usahay gibati nako nga ingon og ako nanuktok sa pultahan sa langit nga walay tubag.

Niini nga mga higayon, kanunay nakong gibuhat ang mga labing importante—pagbasa sa mga kasulatan, mga pag-ampo, pagsimba, ug pagsunod sa mga sugo—busa unsa ang akong kulang?

Sa miaging pipila ka mga bulan, akong nasayran nga usahay ang pagdawat og pagpadayag nagkinahanglan og mas dakong paningkamot sa atong bahin. Ania ang pipila ka mga paagi nga akong nakita nga ikadugang sa pagpaningkamot.

1. Pagmalinawon ug Paggahin og Panahon sa Pagpaminaw

Ang pagkamalinawon sa gihapon lisud alang kanako. Kanunay ako nga adunay walay katapusan nga lista sa unsay buhaton. Samtang ako daghan og buhat nga mahuman, ako kanunay nga naugtas ug nabug-atan sa tanan nga ako mipasalig sa akong kaugalingon nga buhaton. Samtang ako nangita og mga paagi nga mahimong mas andam nga modawat og personal nga pagpadayag, akong nasayran nga ako nagpuyo og kinabuhi sama ni Marta imbis ni Maria.¹ Wala ako maghatag sa akong kaugalingon og panahon nga magmalinawon lamang. Human og basa sa mga pakigpulong sa komperensya nga nagtambag kanato sa paghimo og usa ka dapit ug panahon aron kanunay nga maminaw sa Espiritu, ako nasayud nga ako kinahanglan mobuhat niana.² Karon ako naghimo mabuntag sa akong pagtuon sa kasulatan diha sa usa ka talad-sulatanan (imbis sa higdaanan), ug ako naggamit sa akong papel nga mga kasulatan aron ako dili malinga pinaagi sa akong telepono.

2. Paggahin og Tinuyo nga Panahon diha sa Templo

Napanalanginan ako nga nagpuyo duol sa pipila ka mga templo, ug ako kanunay nga maayo kaayo mahitungod sa pag-adto sa matag semana. Daghang mga General Authority ang mitudlo nga ang pagsimba sa templo makatabang kanato nga mas mahiuyon sa Espiritu,³ busa ako naghunahuna nga ako nakahimo na og igo. Apan ang mga tubag sa gihapon wala pa moabut. Samtang akong gitan-aw ang akong naandan nga mga kinaiya, ako nakaamgo nga ako adunay klaro kaayo nga dapit nga usbon: Ako kanunay nga katulgon sa templo. Akong gisultihan ang akong mga higala, “Kon si Elder Dieter F. Uchtdorf miingon nga ang ‘pagkatulog diha sa simbahan maoy usa sa labing maayo sa tanang pagkatulog’,⁴ nan ang pagkatulog sa templo tingali mas maayo pa gani!” ug ako nangatarungan sa akong pagkakatulugon pinaagi sa paghunahuna nga ang templo hilabihan kaayo ka malinawon nga dili ako makapugong niini. Apan ang templo dili usa ka dapit sa nagkalain-laing serbisyo sa pagpalambo og kahimsog [spa] sa adlaw. Ako moadto sa templo sa pagtrabaho—sa pagpahigayon og puli nga mga ordinansa nga maghatag sa akong namatay nga mga sakop sa pamilya sa oportunidad nga makabaton og kinabuhing dayon.⁵

Nakaamgo ako nga kini panahon alang kanako nga “mapukaw” (Alma 32:27) ug mas matinguhaon sa akong pagsimba sa templo. Maningkamot ako sa pag-andam sa akong kaugalingon sa espiritwal ug mental nga paagi sa dili pa ako moadto sa templo kay sa pagtagad niini nga sama lamang og laing bahin sa akong naandang buluhaton.

3. Pag-apil sa Buhat sa Kasaysayan sa Pamilya [Family History]

Ang mga lider sa Simbahan nag-awhag kanato sa makadaghan nga higayon sa pag-apil sa buhat sa kasaysayan sa pamilya [family history] ug nagsumpay sa daghang mga panalangin sa atong pag-apil niini nga paningkamot.⁶ Hinoon, kadaghanan sa akong mga katigulangan nakompleto na sa ilang mga ordinansa sa templo. Busa unsa pa ang akong himoon? Ako makakat-on mahitungod sa kinabuhi sa matag tawo kansang ngalan akong gidala ngadto sa templo—maghanduraw gayud kanila isip usa ka tinuod nga tawo ug isip usa ka sakop sa akong pamilya. Misugod usab ako sa pagrekord sa kasaysayan sa akong kaugalingong kinabuhi, pag-index, ug sa pagpakigbahin og makapadasig nga mga istorya gikan sa kasaysayan sa akong pamilya.

4. Pakigbahin sa Ebanghelyo

Kon ako makigbahin sa ebanghelyo—ngadto sa dili mga miyembro ug mga miyembro —sa kasagaran ako nagtapos nga nagtudlo sa akong kaugalingon og usa ka butang. Tingali ikaw nakasinati niini sa imong misyon o samtang nangandam og leksyon sa Sunday School. Daghang mga lider sa Simbahan nagpamatuod nga ang pagpahayag sa atong hugot nga pagtuo ug pag-awhag og pagkamatinud-anon diha sa uban motabang kanato sa pagdawat og mas daghan pang personal nga pagpadayag.⁷ Kon kita “mamulong ubos sa inspirasyon sa Espiritu Santo,” kita makahimo sa “kanunay nga adunay makat-unan gikan sa unsay [atong] nasulti.”⁸ Ako nagsugod sa pagpakigbahin mahitungod sa ebanghelyo diha sa social media, ug ako naghisgot niini sa inadlaw nga mga pakigsultihanay uban sa akong mga higala ug pamilya.

5. Sabta Nga ang Personal nga Pagpadayag Anam-anam nga Moabut

Ang ubang mga tawo makadawat og klaro kaayo nga mga tubag kon sila mangutana sa Ginoo mahitungod sa dagkong mga desisyon sa ilang mga kinabuhi, apan alang kanako, ang Langitnong Amahan ingon og nagpabilin nga hilom mahitungod sa akong labing dako nga mga pangutana. Dayon ako nakaamgo nga ako tingali nangutana og sayop nga mga pangutana.

Ang Langitnong Amahan gusto nga makigsulti kanako,⁹ apan Siya naghatag kanako og mga tubag “pagtulun-an ngadto sa laing pagtulun-an,” dili sa hinanali.¹⁰ Ako nakaamgo nga ako nag-una og tan-aw ngadto sa katapusan sa akong panaw––—nagpaabut og pipila ka dagkong timailhan nga makasulbad sa akong tanan nga mga problema¹¹—nga sa tinuoray ang akong kinahanglan nga ipangutana, “Unsa ang sunod nga lakang?”

Ako sa gihapon wala makabaton sa tanang mga tubag sa akong dagko nga mga pangutana, apan akong nakita nga ang Dios sa inanay naggiya kanako ngadto niining mas dagko nga mga tubag, usa ka lakang matag higayon. Kini nga pagsabut nakapalig-on sa akong hugot nga pagtuo ug pagsalig nga Siya mopadayon sa paggiya kanako sa matarung nga direksyon.

Pag-abli sa Pultahan ngadto sa Personal nga Pagpadayag

Kon kita mosunod ni Jesukristo ug makabaton sa gasa sa Espiritu Santo, makadawat kita og personal nga pagpadayag sa matag adlaw. Apan kita kasagaran dili makaamgo o makagahin og panahon sa pag-ila sa Iyang kanunay nga presensya ug impluwensya sa atong palibut. Bisan pa niana, ang kalibutan nahimong mas makalibog, ug sama sa giingon ni Presidente Nelson, “Dili na posible ang espirituhanong pagsugakod kon wala ang giya, direksyon, ug makahupay nga impluwensya sa Espiritu Santo.”¹²

Kon kita mas makapaminaw ug makaila sa Espiritu, mas makaayo sa atong pagpangandam sa pag-atubang ug pagbuntog sa atong mga hagit. Kitang tanan makakaplag og mga paagi sa pagpaningkamot nga makadawat og personal nga pagpadayag diha sa atong mga kinabuhi, kon kini man pagpuasa, pagserbisyo sa uban, o pagbuhat sa bisan unsang kombinasyon sa mga butang nga makapaduol kanato ngadto ni Kristo. Ang tubag mahimong dili nato madawat diha-diha dayon—o bisan sa usa ka bulan—nga pagpangayo, apan kon kita maningkamot sa tinuyo nga pagdapit ug pagpaminaw sa Espiritu, mahimo kitang makadungog sa Iyang hinagawhaw nga tingog nga nagsulti kanato asa pangitaon ang yawe.