Digital Lamang
Paghimo sa Doktrina ug mga Pakigsaad nga Personal nganha Kanimo
Ang pagtuon sa Dali, Sunod Kanako niini nga tuig motabang kanato nga makaamgo unsa ka personal nga mahimo ang mga kasulatan.
Niini nga tuig kita magtuon sa Doktrina ug mga Pakigsaad sa atong Dali, Sunod Kanako nga mga leksyon. Ang Doktrina ug mga Pakigsaad nagtudlo mahitungod sa doktrina sa ebanghelyo, sa mga panalangin sa pagsunod sa mga sugo, ug sa pagpaninguha ug pagdawat og personal nga pagpadayag. Sa pagkatinuod, kadaghanan sa basahon direkta nga pagpadayag gikan sa Ginoo, ug kini nagbarug isip usa ka gamhanan nga saksi nga Siya makasulti usab kanimo.
Ikaw makahimo sa imong personal nga pagtuon sa kasulatan nga mas gamhanan kon ikaw makaamgo nga unsay importante kanimo importante usab ngadto sa Ginoo. Importante Siya sa matag bahin sa imong kinabuhi, kini man kalabot sa trabaho, edukasyon, relasyon, pangalagad, o kinatibuk-an nimong kaayohan. Ang Doktrina ug mga Pakigsaad “naglakip og pagdapit sa tanan nga mga katawhan sa tanan nga dapit sa pagpaminaw sa tingog ni Ginoong Jesukristo, namulong ngadto kanila alang sa ilang temporal nga kaayohan ug sa ilang walay katapusan nga kaluwasan” (pasiuna sa Doktrina ug mga Pakigsaad).
Ingon nga kana nasulti, kon ikaw usahay adunay kalisud sa pagkonektar ngadto sa Doktrina ug mga Pakigsaad, ania ang pipila ka mga giya kon unsaon paghimo sa imong pagtuon nga mas personal ug makahuluganon:
1. Pag-ampo Daan ug Pagtuon nga may Katuyoan
Ang unang pulong sa seksyon 1 mao ang patalinghug, nga mao ang pagdapit sa Ginoo sa pagpaminaw sa dakong kakugi ug sa pagpatalinghug ngadto sa Iyang mga pulong. Ang Ginoo naghinam-hinam alang kanimo nga maminaw Kaniya ug mosunod sa Iyang tambag tungod kay Siya nakasabut sa imong mga panginahanglan ug unsaon sa pagtabang kanimo. Pinaagi sa pagsugod sa imong pagtuon uban sa pag-ampo, ikaw makadapit sa Espiritu Santo, mahimong mas sensitibo ngadto sa mga pag-aghat, ug makapangita og mga paagi nga mas masabtan ang mga bersikulo.
Si Elder Richard G. Scott (1928–2015) sa Korum sa Napulog Duha ka mga Apostoles mitudlo: “Sa katuigan, ang Amahan sa Langit midasig og pinili nga mga lalaki ug mga babaye sa pagpangita og solusyon, pinaagi sa giya sa Espiritu Santo, og mga solusyon sa makapalibug kaayong mga problema sa kinabuhi. Iyang gidasig kadtong awtorisado nga mga sinugo sa pagrekord sa mga solusyon isip usa ka matang sa handbook alang sa Iyang mga anak kinsa may hugot nga pagtuo sa Iyang plano sa kalipay ug sa Iyang Hinigugmang Anak, si Jesukristo.”1 Ang Doktrina ug mga Pakigsaad usa niadto nga mga basahon. Samtang ikaw nangandam sa pagdawat og personal nga pagpadayag pinaagi sa mahunahunaong pagkonsiderar sa unsa ug unsaon sa pagtuon, ikaw nagpakita sa Ginoo sa imong pagkaandam nga motrabaho uban Kaniya alang sa paggiya.
Ang pagsulay og lain-laing paagi sa imong naandang paagi sa pagtuon makatabang usab kanimo sa pag-angkon og bag-ong mga panglantaw. Sulayi ang pagtuon pinaagi sa hilisgutan o sa nagsunod-sunod nga han-ay kon kanus-a ang mga pagpadayag gihatag (tan-awa sa Nagsunod-sunod nga Han-ay sa Sulod), dayon markahi ang mga bersikulo sa paagi nga motabang kanimo sa paghanduraw sa mga baruganan nga gitudlo.
2. Pakisayud sa Makasaysayanong Kinatibuk-ang Kahulugan
Ang pagkamasayud kon unsay miaghat sa mga pagpadayag diha sa Doktrina ug mga Pakigsaad motabang kanimo nga makasabut unsa ang gitudlo sa Ginoo.2 “Kining sagrado nga mga pagpadayag nadawat agi og tubag sa pag-ampo, sa panahon sa panginahanglan, ug gikan sa tinuod nga mga kahimtang sa kinabuhi nga naglakip sa tinuod nga mga katawhan. Ang Propeta ug ang iyang mga kauban nagtinguha sa balaan nga paggiya, ug kini nga mga pagpadayag nagpamatuod nga sila nakadawat niini. Diha sa mga pagpadayag ang usa ka tawo makakita sa pagpahiuli ug pagpasundayag sa ebanghelyo ni Jesukristo ug sa pagsugod sa kapaigoan sa kahingpitan sa panahon” (pasiuna sa Doktrina ug mga Pakigsaad).
Ang “Restoration and Church History [Pagpahiuli ug Kasaysayan sa Simbahan]” nga tab diha sa Gospel Library nga app adunay dako nga mga kapanguhaan mahitungod sa kasaysayan nga modala ngadto sa importante nga mga hitabo, sama sa Church History [Kasaysayan sa Simbahan] ug sa Gospel Topics nga mga mubong sinulat, ug mga istorya mahitungod sa tibuok kalibutan nga kasaysayan sa Simbahan. Ang pagsabut sa makasaysayanong kinatibuk-ang kahulugan makatabang kanimo sa pag-ila kon sa unsang paagi ikaw makadungog Kaniya.
3. I-Personal Kini
Daghang mga seksyon sa Doktrina ug mga Pakigsaad gipahinungod ngadto sa lain-laing mga tawo ngadto kang kinsa ang Ginoo nakigsulti. Samtang magbasa, sulayi ang pagsal-ot sa imong ngalan puli sa ila—kini makapahinumdom kanimo nga ang Ginoo nakigsulti nganha kanimo sa personal nga paagi kon imong ipahisama ang mga kasulatan nganha sa imong kaugalingon (tan-awa sa 1 Nephi 19:23).
Usab, ayaw kalimot sa pagpangita sa imong mga bayani sa Doktrina ug mga Pakigsaad! Sama nga si Nephi tingali ang imong bayani, pangita kang kinsa ikaw may susama nga kasinatian ug kinsa ang nagdasig kanimo diha sa Doktrina ug mga Pakigsaad. Kini nga basahon puno sa mga ehemplo sa mga Santos nga midangop ngadto sa Ginoo alang sa paggiya ug pagsuporta — sa maayo ug sa dautan nga mga panahon.
Nakaangkon ako og usa ka pagpamatuod sa Doktrina ug mga Pakigsaad samtang mainampoon akong naningkamot sa pag-ila sa personal nga mga mensahe nga ang Ginoo aduna alang kanako diha sa matag seksyon. Nadasig ako pinaagi sa hugot nga pagtuo niadtong kinsa mipahimutang sa pundasyon alang sa Pagpahiuli nga ako kabahin niini. Ang pagtuon niini nga basahon niini nga tuig makapahinumdom kanimo kon unsa ka talagsaon kini nga ang Ginoo makigsulti gihapon ngari kanato, sama lamang nga Siya nakigsulti ngadto sa uban sa nag-una nga mga kaliwatan. Imong mahibaloan nga Siya nagpakabana kanimo ug sa imong indibidwal nga mga kahimtang, ug Siya mogiya kanimo sa imong talagsaong mga hagit. Ug ang imong hugot nga pagtuo ug pagsalig diha Kaniya mopadayon sa pagtubo.