Digital Lamang: Mga Baroganan sa Pagpangalagad

9 ka Paagi sa Paghimo og Gamhanan nga Kalainan: Pagmugna og Pagbati sa Pagkahisakop sa Simbahan

Kitang tanan adunay parte sa paghimo sa simbahan nga usa ka maabiabihon nga dapit.

Ang pag-abiabi sa uban, paglakip kanila, ug pagtabang kanila nga makahibalo nga sila nahisakop pulos importante nga mga paagi nga kita makasuporta sa usag usa diha sa dalan sa pakigsaad aron ang Manluluwas makaalim kanato (tan-awa sa Mga Hebreo 12:12–13; 3 Nephi 18:22–23, 32). Ang pagkahiusa usa usab ka importante nga bahin sa pagtukod sa Zion (tan-awa sa 4 Nephi 1:15–17; Doktrina ug mga Pakigsaad 38:24–27; Moises 7:18–19).

Bisan kon kamo bag-o sa Simbahan, bag-ohay lang mibalhin ngadto sa usa ka bag-o nga ward, o taudtaod na nga anaa sa usa ka ward, ania ang siyam ka paagi nga kita makahimo sa simbahan nga usa ka maabiabihon nga dapit diin ang tanan nahisakop.

Kon Kamo Bag-o sa Ward

1. Tambong sa mga miting ug mga kalihokan. Sa kanunay, kita makahimo og mga higala pinaagi sa pakigkuyog sa ubang mga tawo ug sa pag-ila-ila kanila. Moabot og sayo, pipila ka minuto sa dili pa ang mga miting ug mga kalihokan sa Simbahan o pagpabilin pagkahuman aron makahimamat og bag-o nga mga tawo. Mahimo usab nga moboluntaryo kamo sa pagserbisyo kon ang tabang gikinahanglan. Mao kini ang sayon nga mga paagi sa paghimo og mga koneksiyon nga mahimong mga panaghigalaay.

2. Pangita og mga kalig-on. Ipasabot sa publiko ug pribado nga paagi ang mga kalig-on nga inyong nakita sa inyong bag-o nga ward, mga lider, ug komunidad. Imbes nga maghunahuna lamang mahitungod sa maanindot nga dapit nga inyong gibiyaan, diskobreha kon unsa ang talagsaon mahitungod sa inyong bag-o nga ward ug paghisgot mahitungod kon kinsa ang inyong nahimamat karon. Pangutana sa uban alang sa impormasyon ug mga ideya mahitungod kon unsay buhaton, asa mamalit, ug unsaon sa pagpangita og maayo nga dentista o mga dapit nga kakan-an. Ikonsiderar nga mag-uban sa pag-adto sa pipila ka dapit nga inyong gihisgotan.

3. Pakighigala og bag-o nga mga tawo. Ayaw hunahunaa nga ang mga tawo nga naglingkod tapad kaninyo diha sa Sunday School anaa na diha sa daghang tuig. Hunahunaa nga bag-o usab sila, ug nga sila nagpaabot kaninyo sa pagtabang nga mabati nga maabiabihon ang ward ngadto kanila. Ipaila-ila ang inyong kaugalingon ug mahimong mapakisayron bahin kanila, bisan unsa ka dugay na sila anaa didto. Ug buhata kana pag-usab sa sunod semana ug sa sunod.

4. Pagmapailobon. Pagmapailobon sa inyong kaugalingon ug sa uban samtang maningkamot kamo sa pagpalambo og mga panaghigalaay. Kon ang usa ka tawo nga inyong gidapit sa panihapon dili interesado, hangyoa ang lain nga tawo. Kon molabay ang laing bulan nga wala kamo makadawat og calling, pakigsulti sa mga lider sa ward pag-usab mahitungod kon sa unsang paagi kamo makaserbisyo.

Kon Kamo Taudtaod Na nga Anaa sa Ward

1. Pag-ampo mahitungod kon asa molingkod. Tingali dili kamo kanunay nga ganahan nga molingkod tapad sa usa ka tawo nga wala ninyo mailhi, apan kon kamo moabot sa usa ka miting sa Simbahan, pag-andam sa paghunong sa pultahan ug pag-ampo alang sa giya kon kinsa ang taparan sa paglingkod. Dayon buhata ang mga pag-aghat nga mas ila-ilahon pa ang uban.

2. Pangutana kon unsaon ninyo nga makapangalagad sa uban. Pahibaloa ang mga lider sa ward nga andam kamo nga ila-ilahon ang usa ka bag-o nga tawo ug nga kamo andam nga motabang kon ang uban nagkinahanglan og usa ka higala. Ang pagserbisyo sa uban ug ang pagkat-on nga tinud-anay nga magpakabana mao ang usa sa labing maayong mga paagi sa pagmugna og mga panaghigalaay. Pag-ampo aron masayod unsay inyong mahimo sa pagtabang sa uban nga mobati nga giabiabi ug gihigugma, dili igsapayan kon unsa na sila kadugay diha sa ward.

3. Pagbansay sa pagpaambit og gugma. Ang pagmugna og usa ka komunidad sa pagkahisakop alang sa uban usa ka pagpahayag sa gugma nga putli—ang tiunay nga gugma ni Kristo nga atong gipaningkamotan sa pagpalambo. Apan kitang tanan dili managsama nga natugahan sa mga kahanas o natural nga mga kinaiya sa paghimo niini nga malamposon. Kon ang pag-ugmad og relasyon sa uban dili natural alang kaninyo, pangita og mga paagi nga mahimong dili kaayo lisod ang pagpalambo og panaghigalaay sa uban, sama sa pagdapit og ikatulo nga higala nga moapil kaninyo diha sa mga panag-istoryahanay o sa mga laag o pinaagi sa pagdapit kanila ngadto sa mga kalihokan nga inyoha nang tambongan.

Kon Kamo Lider sa Ward

1. Panimbaya diha sa pultahan. Barog duol sa mga pultahan sa chapel (o hangyoa ang ubang mga miyembro sa ward sa pagbuhat niini) aron magbantay sa mga tawo nga bag-o lang mipasakop o mibalhin. Ila-ilaha sila ug pangayoa ang ilang impormasyon sa pagkontak; mahimo gani ninyo silang hangyoon nga kuhaan og litrato nga inyong mapakigbahin ngadto sa ubang mga lider sa ward. Kon ang inyong ward kasagaran adunay daghang bag-o nga mobalhin, ikonsiderar ang paghimo og hayag og kolor nga mga bag nga adunay impormasyon sa ward ug lamian nga pagkaon [treat] nga ihatag ngadto sa bisan kinsa nga bag-o. Dapita ang tanang miyembro sa ward nga magbantay alang niadtong mga bag nga hayag og kolor ug mohimo og dugang nga paningkamot sa pag-abiabi ni bisan kinsa nga naghupot niini.

2. Himoa kini nga usa ka ward nga paningkamot. Ikonsiderar nga himoon ang pagkamahigalaon ug paglakip nga usa ka tumong sa ward. Magkauban nga hisgoti sa mga miting sa korum ug klase kon unsaon sa pagtabang sa uban nga mobati nga adunay higala. Paglakip og panagsa nga pahinumdom diha sa mga komunikasyon sa ward o sa mga bulletin board.

Mahimo kamong mopadala sa inyong kaugalingon nga artikulo, mga ideya, o feedback sa liahona.ChurchofJesusChrist.org. Mahinamon kami nga makadungog gikan kaninyo!