Digital Lamang: Mga Young Adult
Sa Unsang Paagi ang Templo Nagpanalangin sa Atong Inadlaw-adlaw nga mga Kinabuhi
Nagkapuliki ang akong kinabuhi, apan nasayod ako nga ang paghatag og prayoridad sa templo mopanalangin sa akong pamilya ug kanako.
Mga modelo miposing sa pagpalitrato.
Gihigugma nako ang templo. Kanunay gayod.
Unsay akong ganahan kaayo kabahin sa templo mao ang paagi nga kini nagpalig-on sa gugma tali sa akong asawa ug kanako, sa among relasyon sa among unom ka anak, ug sa kinatibuk-an nga pagbati sa kalinaw sa among panimalay. Tinud-anay nakong nasinati ang gahom nga moabot gumikan sa paghimo ug pagtahod sa sagradong mga pakigsaad sa templo ug sa kadangpan nga gihatag kanato niining balaan nga mga gambalay gikan sa mga tintasyon ug mga kasamok sa kalibotan.
Sa dihang ang akong asawa ug ako naminyo sa Tokyo Japan Temple 10 na ka tuig ang milabay, naghimo kami og tumong nga magkaubang motambong sa templo labing menos kausa sa usa ka bulan. Apan sa wala madugay, ako gitawag sa kapangulohan sa Templo sa Tokyo nga moserbisyo isip worker sa templo matag Biyernes.
Nagmahinamon ako nga makaserbisyo, apan ang kinabuhi medyo okupado usab nianang panahona. Ako anaa sa akong senior nga tuig sa unibersidad, ug lisod ang pagbalanse sa eskwelahan uban sa akong part-time nga trabaho sa usa ka kompanya sa mga abogado [law firm], sa among binulan nga pagtambong sa templo isip magtiayon, ug karon usa ka dugang nga buluhaton sa templo matag Biyernes.
Taliwala niining hilabihan ka nagkapuliki nga panahon, mainampoon namong gihisgotan ang sitwasyon isip bana ug asawa, ug mihukom kami nga kanunay namong himoon nga prayoridad ang templo sa among mga kinabuhi. Nasayod kami nga mahimong lisod kini usahay, apan gusto namo nga ipabiling lig-on ang among relasyon ug dapiton ang mga panalangin ug kalinaw diha sa among panimalay.
Pinaagi niini nga mga sakripisyo sa pagserbisyo sa templo nga tinuoray nakong naamgohan kon unsa ka dako sa positibo nga kalainan ang mahimo sa templo sa akong kinabuhi. Ang templo makatabang kanato nga espirituhanong molambo sa talagsaon nga mga paagi, ug ang mga panalangin nga atong madapit diha sa atong mga panimalay kon kita mogahin og panahon sa pag-adto dili hitupngan.
Sa bag-ohay nga katuigan, si Presidente Russell M. Nelson mihatag og gibug-aton sa kaimportante sa templo sa atong mga kinabuhi: “Ang mga pagpangatake sa kaaway paspas kaayo, sa gikusgon ug sa matang. Ang atong panginahanglan nga maanaa sa templo kanunay wala sukad pa nga mas labaw nga gikinahanglan. Mohangyo ko kaninyo nga mainamp[o]ong motan-aw kon giunsa ninyo paggamit ang inyong oras. Pagpahinungod og oras alang sa inyong kaugmaon ug diha sa inyong pamilya. … Ako mosaad kaninyo nga ang Ginoo mohatag og mga milagro nga Siya nasay[o]d nga inyong gikinahanglan samtang kamo naghimo og mga sakripisyo sa pagserbisyo ug pagsimba diha sa Iyang mga templo.”1
Samtang mihimo kami og mga sakripisyo nga makanunayon nga motambong sa templo, ang Ginoo nagpadayon sa pagpanalangin sa akong pamilya ug kanako uban niini nga mga milagro.
Nasayran nako nga ang atong mga propeta ug apostoles naghatag og gibug-aton sa kaimportante sa templo sa atong mga kinabuhi tungod kay nasayod sila sa mga panalangin nga gitanyag sa Ginoo kanato kon kita mosulod sa Iyang balaan nga balay, mga panalangin nga madawat lang nato pinaagi sa mga ordinansa sa templo. Ang kasagarang pagbisita—o, kon kita dili makahimo sa pagbisita, ang pagtuman sa mga pakigsaad ug pagpaningkamot nga magpabiling takos sa usa ka rekomend sa templo2—makatabang kanato nga molambo sa espirituhanong paagi ug makakaplag og kalinaw, bisan kon ang kalibotan nagkaanam og kagubot.
Mapasalamaton ako alang sa mga pakigsaad nga akong gihimo ug sa paagi nga ang templo nakatabang kanako nga mobati nga duol sa Ginoo. Ug mapasalamaton kaayo ko alang sa espirituhanong kalig-on nga gihatag sa templo nganhi sa akong relasyon sa akong pamilya ug sa among panimalay. Samtang inyong hatagan og prayoridad ang templo sa inyong kinabuhi ug maningkamot nga mahimong “girekomendar ngadto sa Ginoo,”3 kamo makasinati sa hingpit nga kalipay ug sa mga milagro nga gisaad sa propeta ngari kanato.