Pagsabot ug Paglakip sa Atong mga Kaigsoonang LGBT

Ni Ryan J Wessel

Ang tagsulat nagpuyo sa Utah, USA.

Kitang tanan makatabang sa paghiusa sa atong mga ward ug mga komunidad.

Sa unang pipila ka bulan human gitawag isip usa ka bishop, ako natingala sa dihang tulo ka hugpong sa mga ginikanan sa akong ward pribadong miduol kanako og tagsa-tagsa sa pagpahibalo kanako nga sila adunay anak kinsa giila nga bayot o transgender [tawo nga ang sekso karon lahi sa sekso sa iyang pagkatawo]. Sa matag sitwasyon, ang mga ginikanan mipahayag og sinserong gugma alang sa ilang anak uban sa lain-laing kahimtang sa kabalaka nga ang ilang anak dili mohaom diha sa komunidad sa ward.

Sa kadugayan, ang ubang mga pamilya usab mipakigbahin sa susama nga impormasyon ngari kanako, ug ako nakaamgo nga bisan og ako dili kaayo pamilyar niini nga mga kasinatian, isip usa ka bishop ako adunay pribilehiyo sa pagtabang sa tanang sakop sa akong ward sa pagtukod og mas nagkahiusa nga komunidad, sa walay pagsapayan kon unsa ang ilang gisinati.

Ako dali nga nakaamgo nga ang pagkamahimong usa ka mas epektibo nga bishop, ako kinahanglang andam nga maningkamot sa pagsabot sa mga kasinatian sa mga miyembro kinsa giila isip LGBT ug sa ilang pamilya. Busa, pinaagi sa kinasingkasing ug dayag nga panagsultihanay, sa trial and error [pagsulay ug pagkat-on gikan sa sayop], daghang pagtuon, ug pagsalig diha sa Ginoo alang sa pagsabot, daghan ako og nakat-onan mahitungod kon sa unsa nga paagi ako makahatag og mas dakong suporta ngadto sa mga miyembro nga anaa niini nga mga kahimtang samtang sila naningkamot sa pagduol ngadto kang Kristo.

Ang akong mga mata naabli sa mga panginahanglan alang sa panaghiusa ug pagsabot, ug ako nakakat-on og pipila ka mga leksyon nga mitabang kanako isip usa ka bishop sa paghimo og sitwasyon nga mas malukpanon kalabot ngadto sa tanan natong mga kaigsoonang LGBT. Nanghinaot ako nga samtang ang mga lider ug ang uban nagbasa sa unsay akong nakat-onan, makakaplag sila og makatabang nga mga ideya alang sa ilang kaugalingong mga sitwasyon.

Leksyon 1: Sunda ang Buhing Apostoles

Dali akong nakadiskobre sa bili nga mahimong pamilyar sa labing bag-ong apostolikanhon nga mga pagtulun-an mahitungod sa hilisgutan.

Usa ka matahom nga kamatuoran sa Ang Simbahan ni Jesukristo sa mga Santos sa Ulahing mga Adlaw mao nga kita giniyahan og buhi nga mga apostoles ug mga propeta (tan-awa sa Doktrina ug mga Pakigsaad 1:30). Ug ngari kanako, ang pulong nga buhi nagpasabot nga kita makabaton og giya sa atong panahon kon sa unsang paagi ang ebanghelyo magamit ngadto sa mga panginahanglan sa atong panahon. Busa, kon kita mosalig lamang sa pinulongan sa kaniadto, mahimo natong malaktawan ang maanindot ug importanting giya nga ang Ginoo naghatag pinaagi sa atong kasamtangang mga propeta.

Usa ka kapanguhaan nga mitabang kanako sa pagribyo sa bag-ong apostolikanhon nga mga pagtulun-an mao ang Life Help nga seksyon sa website sa Simbahan, ilabi na sa mga pahina nga giulohan og “Same-Sex Attraction” ug “Transgender.” Ang pipila ka mga pamahayag nga importante ngari kanako naglakip sa mosunod:

Si Elder D. Todd Christofferson sa Korum sa Napulog Duha ka Apostoles miingon: “Ang panaglahi nga atong makita karon diha sa Simbahan mamahimong ang sinugdanan lamang. Sa walay lipud-lipod, tingali atong makita ang mas daghan pa nga panaglahi. … [A]ng tinuod nga ang mga tawo makahatag og lain-laing mga gasa ug mga panglantaw ug ang dako kaayong pagkalain-lain ug mga kaagi ug mga hagit nga gisinati sa mga tawo mopakita kanato kon unsa gayod ang importante sa ebanghelyo ni Kristo. Ug nga kadaghanan sa nahibilin nga bahin, nga tingali naangkon sa paglabay sa panahon ug mas sa kultura kay sa doktrina, mahimong mawagtang, ug kita makakat-on gayod sa pagkadisipulo.”¹
Si Elder Quentin L. Cook sa Korum sa Napulog Duha ka Apostoles mihatag sa pagdapit nga “mag-una sa pagpahayag og gugma, kalooy, ug pagtabang. Dili kita magbaton og mga pamilya nga dili mopaapil o dili motahod niadtong kinsa nagpili og lahi nga estilo sa kinabuhi isip resulta sa ilang mga pagbati mahitungod sa ilang kaugalingong sekso.”²

Sa pag-awhag sa akong ward sa pagtuon sa labing bag-o nga apostolikanhong mga pagtulun-an kabahin niini nga hilisgotan, among gipahinungod ang usa sa among hiniusang ikalima nga Dominggo nga mga leksyon sa paghisgot kon sa unsang paagi kami mahimong mas makasunod og maayo sa mga lagda. Kana nga leksyon nahimong hilabihan ka mapuslanon, makapahinuklog ug makapalig-on nga kasinatian.

Leksyon 2: Pilia ang Hugot nga Pagtuo kay sa Kahadlok

Ang dili pamilyar mahimong makahadlok. Isip usa ka bag-ong bishop, kini makahadlok sa pagtabang sa usa ka miyembro sa ward kinsa giila nga bayot ug nagkinahanglan og espirituhanong tabang. Kadto mahagiton ang pagpangulo og mga panaghisgot mahitungod niini nga hilisgotan ug sa pagtambag sa mga ginikanan sa mga kabatan-onan kinsa nanlimbasog sa ilang pagkatawo.

Usa ka ulbo sa kabalaka moabot sa hunahuna:

“Unsa kaha kon makasulti ako og sayop nga butang?”

“Unsa kaha kon ako mora og kinaraan kaayo o nagpasulabi pag-ayo?”

“Ako ba kaha adunay igo nga kahibalo nga mahimong matinabangon?”

Usa ka adlaw samtang namalandong sa akong mga kahadlok, ang akong hunahuna nadani sa pagtuon sa mga kasulatan nga naghisgot og kahadlok. Mibati ako og kalinaw sa dihang akong nabasa ang, “Hingpit nga gugma mosalikway sa tanan nga kahadlok” (Moroni 8:16), ug nga “ang kahadlok wala diha sa gugma; hinonoa ang hingpit nga gugma nagahingilin sa kahadlok ”(1 Juan 4:18).

Kadto nga mga kamatuoran mitabang kanako sa paghinumdom nga kon ako milihok tungod sa sinsero nga gugma, ako mahimong masaligon sa pagdawat sa giya ug tabang gikan sa Ginoo.

Makapamatuod ako nga sa dihang ako andam ug igo ka mapainubsanon sa pagsunod sa mga pag-aghat sa Espiritu Santo, bisan og akong gibati ang kakulangan sa dili pamilyar nga mga sitwasyon, akong nasinati ang saad nga ang Dios “mohimo sa mahuyang nga mga butang nga mahimo nga malig-on” (Ether 12:27).

Leksyon 3: Gamita ang Yano nga mga Buhat—alang sa mga Lider

Pinaagi sa pagtinguha og tambag gikan sa matinud-anon nga mga kapanguhaan kabahin niini nga hilisgotan, ako nakadiskobre og pipila ka magamit nga mga sugyot nga adunay positibo nga impluwensya sa akong abilidad isip usa ka bishop sa pagtukod og usa ka komunidad sa paglakip. Samtang ikaw nagsalig sa Espiritu, mahimong gusto nimo nga ipahiuyon ang pipila sa mosunod nga mga sugyot aron matubag ang mga panginahanglan sa mga kahimtang sa inyong ward:

Duol sa mga indibidwal kinsa pamilyar sa mga isyu sa LGBT aron sa pagtabang kanimo sa pagkat-on ug pagsabot sa ilang mga panglantaw. Kini mahimong maglakip sa imong presidente sa stake, sa imong ward council, ubang mga bishop sa imong dapit, kasaligan nga mga higala, ug mga sakop sa imong ward kinsa giila isip LGBT ug sa ilang mga pamilya. Ang “Same-Sex Attraction” nga web page sa Simbahan (ChurchofJesusChrist.org/topics/gay) makahatag usab og giya. Adunay daghan kaayong tabang sa atong palibot, ug walay usa kanato nga nag-inusara sa pagtuman sa atong mga calling.
Mapainubsanong ipakigbahin ang imong pagpamatuod, ug ingon usab ayaw kahadlok sa pagpangutana mahitungod sa mga butang nga ikaw wala makasabot sa hingpit. Magtanyag kita og suporta bisan pinaagi sa pagkaandam nga maminaw ug magkat-on.
Ayaw kahadlok sa pagpangayo og pasaylo kon ikaw nakasulti o nakabuhat og usa ka butang nga nakapasakit, bisan kon kini wala tuyoa. Ang binaslanay nga pagkadayag makatukod og pagsalig.
Kon ang usa ka higala o miyembro sa ward naghimo og dili makatabang o makapasakit nga mga komentaryo mahitungod sa LGBT nga mga indibidwal, hunahunaa ang labing maayong paagi sa pagtubag. Sa kasagaran nga panahon kini nga mga komentaryo nagagikan sa walay kasinatian ug dili tuyo nga mahimong walay pagtahod. Ang paghatag og pribadong giya mahimong makatabang.
Pagmatngon nga ang imong pinulongan ngadto sa tanang mga anak sa Dios mahiuyon sa imong mga pakigsaad ug calling, sa walay pagtagad kang kinsa ikaw nakig-istorya.
Kon ang mga miyembro sa ward nakigbahin sa ilang mga kasinatian, kini hilabihan ka personal. Ayaw ipakigbahin ang ilang pribadong impormasyon nga walay pagtugot kanila.
Hinumdomi nga unsay gibati sa usa ka tawo ug sa unsang paagi sila mopili sa pagtubag niadto nga mga pagbati dili managsama nga butang. Usa ka artikulo sa Gospel Topics nagpasabot: “Ang Simbahan mihatag og kalainan tali sa pagkaibog sa sama og sekso ug sa homosexual nga kinaiya. Ang mga tawo kinsa nagsinati og pagkaibog sa sama og sekso o giila nga bayot, tomboy, o bisexual [maibog sa lalaki ug babaye] makahimo ug makatuman sa mga pakigsaad ngadto sa Dios ug sa hingpit ug sa takos nga paagi makaapil diha sa Simbahan. Ang pag-ila nga bayot, tomboy, o bisexual o nagsinati sa pagkaibog sa sama og sekso dili sala ug dili makapugong sa usa ka tawo sa pag-apil diha sa Simbahan, paghupot og mga calling, o sa pagtambong sa templo.”³
Pagmatngon nga dili magpugong sa mga oportunidad sa mga miyembro sa pagtampo kon sila giila isip bayot o transgender. Ang imong mga miyembro sa ward tanan adunay talagsaong mga kasinatian ug mga punto sa panan-aw nga makaayo sa imong ward. Sama nga si Elder Christofferson mitudlo usab, “Ang usa ka tawo kinsa nagsunod … sa mga sumbanan, [sa] mga pagtulun-an sa ebanghelyo ni Kristo, bisan og nag-atubang sila og pagkaibog sa sama og sekso, sa tinuod walay rason nga dili sila hingpit makaapil, nga sila dili mahimong usa ka hingpit nga miyembro sa Simbahan, ug maghupot og mga calling, ug mamulong, ug mosulod sa templo, ug moserbisyo didto, ug sa tanang uban nga mga oportunidad ug panalangin nga moabot gikan sa pagkamiyembro sa Simbahan mahimong maanaa alang kanila. ”⁴

Nagpadayon sa Pagkat-on ug Paghigugma

young men and young women interact during a youth activity

Sa panahon sukad nga ako gitawag isip usa ka bishop, ako miabot sa pagtuo og hugot nga matag usa sa atong mga kaigsoonan adunay usa ka maanindot ug talagsaon nga kontribusyon nga himoon ngadto sa ebanghelyo ni Jesukristo, ngadto sa atong mga komunidad, ug nganhi sa atong indibidwal nga mga kinabuhi. Ug sa walay pagsapayan sa atong tahas diha sa ward, kini usa ka bulahan nga responsibilidad ug pribilehiyo ang pagtukod og usa ka mas nagkahiusa nga komunidad pinaagi sa pagtinguha og mas maayong mohigugma, mosabot, ug mosuporta sa matag usa sa atong espirituhanong mga kaigsoonan.

Sama nga si Presidente Jean B. Bingham, Kinatibuk-ang Presidente sa Relief Society, mipamatuod: “Kon ipabilin ninyo ang inyong hunahuna nga bukas ug ang inyong kasingkasing nga abli, makakita kamo og daghang talagsaon nga mga butang mahitungod sa mga tawo nga kamo tingali dili gayod magdahom. Kon inyong nasinati, kon inyong nakita, kon inyong giablihan ang inyong kasingkasing ngadto sa ubang mga tawo, inyong makita nga tanan kita nahisakop.”⁵