Digital Lamang: Mga Young Adult

Dili Ako Ganahan sa Buhat sa Family History. Apan Nakasinati Dayon Ako og mga Milagro

Ni Yvonne Liu

Ang akong pamilya sa Taiwan wala kaayoy daghan nga impormasyon bahin sa among family history, apan pinaagi sa pagpakita og hugot nga pagtuo, nakasaksi ako og mga milagro.

batan-ong babaye nga nagtan-aw og album sa mga litrato

Sa dihang nag-edad ako og 10 ug nagpuyo sa Taiwan, ang akong lola mipaila-ila sa mga misyonaryo sa among pamilya. Ang akong papa nakahimo sa pagbunyag kanako, sa akong mama, ug sa akong igsoon nga lalaki. Apan, sa wala madugay human kami nasilyo sa templo, ang nahibilin sa akong pamilya mihunong sa pagsimba.

Mao nga, natural lang, nga ang responsibilidad sa buhat sa family history nahimo nako nga obligasyon. Apan kana nga buluhaton dili gayod sayon alang kanako.

Naningkamot ako sa pagsunod sa mga imbitasyon gikan sa atong mga lider sa Simbahan sa pagbuhat niining sagrado nga buhat, apan tungod sa nagkalain-lain nga mga kapakyasan, mihunong ako sa pagpaningkamot og maayo.

Usa ka rason, ang akong mga ginikanan wala gayod ganahi sa ideya sa paghimo sa buhat sa templo alang sa mga patay. Gibati nila nga gabuot-buot mi sa desisyon alang sa among mga katigulangan nga modawat og mga ordinansa ug nga kini walay pagtahod sa ilang kabubut-on.

Naglisod usab ako sa pagpangita og impormasyon mahitungod sa akong mga katigulangan. Kadaghanan sa Chinese nga mga pamilya nagtipig og libro sa genealogy nga gitawag og zupu nga naglangkob og mga rekord nga masubay hangtod sa 2000 B.C. Apan ang zupu sa akong pamilya walay mga tuig sa pagkatawo ug pagkamatay sa akong mga katigulangan nga lalaki o bisan unsa gayod nga impormasyon mahitungod sa akong mga katigulangan nga babaye, mao nga dili ako makasumiter og mga ngalan sa templo o makapahigayon og mga ordinansa alang sa akong mga katigulangan.

Human niini nga mga kapakyasan, miundang ako sa akong mga paningkamot sa family history.

Pagsugod Pag-usab

Sa dihang miabot na ako sa kolehiyo, wala ako makahunahuna mahitungod sa family history sulod sa katuigan. Dayon, atol sa usa ka semester, ang among stake miawhag kanamo sa paghimo og tumong sa pagdala og ngalan sa pamilya ngadto sa templo. Ang among mga lider sa stake misaad kanamo nga kon mag-ampo kami sa dili pa kami magsugod sa paghimo sa buhat sa family history, magiyahan kami ngadto sa mga katigulangan kinsa gusto nga mapahigayon ang ilang mga ordinansa.

Sa sinugdanan, dili gayod ako mahinamon mahitungod niini nga imbitasyon. Misulay na ako ug napakyas na kaniadto.

Apan, samtang nag-ampo ako kada adlaw aron makaangkon og kalamposan sa akong buhat sa family history ug alang sa usa ka tinguha nga magpadayon sa akong mga paningkamot, ang akong kasingkasing nalukmay. Ug sa wala gayod madugay, ako misugod sa pagbati og tinguha nga magsugod pag-usab.

Usa ka gabii, mibati ako og kusog nga pagdasig sa pag-abli sa akong family tree diha sa FamilySearch ug sa pagsiksik og usa ka piho nga linya sa mga katigulangan. Human nga wala molampos sa pagsiksik og pipila ka lain-lain nga ngalan sa usa ka search engine, nakakita ako og web page alang sa usa sa akong mga katigulangan.

Dayag lang, kini nga katigulangan usa ka inila nga tawo atol sa rebolusyon sa Taiwan, ug tanan sa iyang impormasyon girekord dinhi niini nga pahina, nga adunay gilakip nga mga tinubdan. Gikan didto, nakakaplag ako og dugang nga impormasyon mahitungod sa iyang mga anak ug mga ginikanan.

Pinaagi nianang sulagma nga pagsiksik sa internet, ako nakakaplag ug nakasumiter og unom ka ngalan ngadto sa templo nianang adlawa, ug sulod sa usa ka bulan nakasumiter ako og sobra sa 50 ka ngalan.

Dili kadto katuohan.

Nakahimo Ba Ako og Kalainan?

Sa wala madugay midala ako og daghang ngalan ngadto sa templo, apan gikuwestiyon gihapon nako kon ang akong mga katigulangan ba sa pikas nga habig sa tabil midawat niini nga mga ordinansa. Naghunahuna ako kon nakahimo ba ako og kalainan.

Mao nga nag-ampo ako alang sa pasalig usab. Ug sa sunod higayon nga ako miadto sa templo, sa dihang hapit na ako mahuman sa usa ka pagsilyo alang sa usa sa akong mga katigulangan, ang sealer sa templo milingi kanako nga nagluha ang iyang mga mata. Siya misulti kanako nga nabati niya ang kahinam sa akong katigulangan sa pagdawat sa ordinansa.

Nasayod ako nga ang Dios mitubag sa akong pag-ampo ug nga ang akong puli [proxy] nga buhat sa pagkatinuod nakahimo og kalainan.

Sa paglabay sa panahon, ang akong mga ginikanan dili gihapon kaayo ganahan sa ideya sa buhat sa family history. Apan nabati nako ang akong mga katigulangan nga naghupay ug nagsuporta kanako, ilabi na kon mobati ako nga nag-inusara nga ako ang bugtong aktibo nga miyembro sa akong pamilya. Gibati usab nako nga nagtabang sila sa pagpahumok sa mga kasingkasing sa akong mga ginikanan.

Si Elder John A. Widtsoe (1872–1952) sa Korum sa Napulog Duha ka Apostoles mitudlo nga “bisan kinsa nga nagtinguha sa pagtabang niadtong anaa sa pikas nga habig makadawat og tabang agi og balos alang sa tanan nga mga kalihokan sa kinabuhi.”¹

Ug nabati nako kana nga tabang nga naggikan sa pikas nga habig.

Ang family history mao ang usa sa labing makapahinam ug magantihon nga mga buhat nga atong mahimo isip mga miyembro sa Simbahan ni Jesukristo. Samtang atong gipundok ang Israel sa pikas nga habig sa tabil, atong gipundok ang “kasundalohan sa mga anghel” nga mosuporta kanato sa atong mortal nga panaw, nakigkonektar kita sa langit, ug kita mas nagkaduol ngadto kang Kristo. Ug, sama sa gipamatuod ni Sister Wendy Watson Nelson, “Ang buhat sa family history magdala og mga milagro sa inyong kinabuhi ug ngadto sa mga kinabuhi niadtong inyong gimahal.”²

Nasayod ako nga tinuod kana.

Mga Sugyot sa Pagpangita og mga Ngalan sa Pamilya

Nagtrabaho ako sa FamilySearch sulod sa usa ka panahon. Kana nga kasinatian mitudlo kanako og mas daghan pa nga mga sugyot ug mga paagi sa pagpangita og mga ngalan sa pamilya. Ania ang pipila lang niini:

Pag-ampo sa dili pa magsugod ug sunda ang Espiritu.

Ang pagpangita og mga ngalan sa pamilya mahimong susama sa kasinatian ni Nephi sa dihang gikuha niya ang mga palid nga tumbaga (tan-awa sa 1 Nephi 3–4). Mahimong wala kita masayod kon asa o unsaon sa pagsugod, apan kon motuo lang kita ug molihok nga inubanan sa hugot nga pagtuo sama ni Nephi, magiyahan kita pinaagi sa Espiritu. Ang Ginoo dili mohatag kanato og mga sugo nga dili mag-andam og paagi alang kanato nga mabuhat kini (tan-awa sa 1 Nephi 3:7). Gusto sa Langitnong Amahan nga mapalgan nato ang atong mga katigulangan, ug Iyang ipakita kanato ang paagi samtang magpadayon kita sa unahan inubanan sa hugot nga pagtuo.
Gamita ang Source Box nga feature sa FamilySearch aron makigtrabaho sa uban.

Lagmit nga samtang nagtrabaho kamo sa inyong linya sa family history, ang uban nga layo nga mga paryente nagtrabaho usab diha sa sama nga linya. Makadugang kamo og mga detalye diha sa Source Box nga magsulti sa uban kon diin ninyo nakit-an ang impormasyon mahitungod sa inyong mga katigulangan, kon unsa ka tukma ang impormasyon, ug unsa nga impormasyon ang gikinahanglan pa pangitaon. Makakita kamo og dugang nga impormasyon mahitungod sa Source Box nga feature diha sa website sa FamilySearch.
Tan-awa ang mga kapanguhaan nga mahimong naglangkob og impormasyon mahitungod sa inyong genealogy.

Kon kamo wala kaayoy impormasyon mahitungod sa inyong family tree, ang lokal nga mga ahensya sa gobyerno mahimong usa ka maayong dapit sa pagsugod, kay mahimong aduna silay access sa piho nga mga rekord.

Ang FamilySearch naglakip usab og sobra sa unom ka bilyon nga mga rekord gikan sa tibuok kalibotan nga libre ngadto ni bisan kinsa nga adunay account sa FamilySearch. Gamita ang Record Hints nga feature sa FamilySearch aron sa pagpangita sa inyong mga katigulangan ug sa pagpangita alang sa matag posible nga tinubdan, gikan sa mga rekord sa kaminyoon ngadto sa mga rekord sa kamatayon, mahitungod sa inyong mga katigulangan.

Mahimo usab ninyong sulayan ang pag-type sa mga ngalan sa inyong mga sakop sa pamilya diha sa usa ka search engine. Mahimong makakita kamo og daghang impormasyon sa internet kon ang inyong mga katigulangan inila o naapil sa piho nga mga panghitabo atol sa ilang kinabuhi.

Ang pagkontak sa buhi nga mga paryente makatabang usab. Tingali makatubag sila sa mga pangutana kabahin sa inyong mga katigulangan. Nindot usab kini nga rason sa pagpangomosta sa pamilya nga wala kaayo ninyo mailhi.

Sa kataposan, paghunahuna gamit ang bag-o nga panglantaw. Sama pananglit, ayaw kahadlok sa pagbisita sa mga dapit (o mokontak pinaagi sa social media sa usa ka tawo kinsa nagpuyo sa dapit) diin nagpuyo ang inyong mga katigulangan. Tingali makakaplag kamo og pipila ka makapasorpresa nga impormasyon.

Ang buhat sa family history mahimong lisod usahay, apan adunay daghang kapanguhaan nga magtabang kaninyo samtang magpadayon kamo. Kinahanglan nga andam lang kita nga mangayo og tabang ug maningkamot nga mopadayon!