Digital Lamang: Mga Young Adult
Mapuslanon Gayod! Ang Templo Usa ka Makapausab sa Kinabuhi nga Panalangin
Tungod sa COVID 19 pandemic, akong pamanhunon ug ako nag-atubang og dakong oposisyon sa pag-adto sa templo, ug nagsugod ko sa paghunahuna kon makasulod ba gayod kami.
Mga modelo miposing sa pagpalitrato
Ang akong bana ug ako naglisod sa pagminyo ngadto sa templo—dili tungod kay dili namo gusto! Dihay daghang mga butang nga nagpadayon sa pagpugong kanamo gikan sa paghimo niining sagrado nga pakigsaad.
Apan pinaagi niini nga panaw sa kalisod, paglambo, ug gugma, ako nakabaton og mas dakong pagpamatuod sa templo ug sa mga panalangin nga mahatag niana nga sagrado nga dapit sa among mga kinabuhi.
Daghan Kaayong mga Problema
Ang mga butang nahimong lisod sa wala madugay human kami nahimong sinayuran [engaged]. Taud-taud na nga, daghang dili maayong mga kahimtang ang nakapugong kanamo sa pagpadayon sa kaminyoon sa templo. Busa human sa daw sama sa kahangtoran, sa kataposan nagtakda ang among petsa sa pagtuga ug pagselyo sa Mayo 2020. Hapit tanang butang naplano na. Mao na gayod kini sa kataposan!
Apan dayon ang kalibotan naigo sa COVID-19 nga pandemya, ug ang among nasod, ang South Africa, hingpit nga gi-lockdown.
Sa makausa pa, ang templo ug ang among kaminyoon nalangay.
Nagsugod ko sa paghunahuna nga dili gayod ko makasulod sa templo. Ug ako naghunahuna kon mapuslanon ba ang tanang paningkamot. Ang akong bana ug ako wala pa gihapon nakadawat sa among pagtuga, ug mibati ko nga nawad-an og kadasig tungod kay human sa pagpangandam sa hapit tibuok nakong kinabuhi nga mahimong takos nga makaadto, ang mga butang wala gihapon magsilbi.
Apan naghunahuna ko sa tanan nga gitudlo sa mga propeta mahitungod sa kaimportante sa pagtambong sa templo ug sa daghang panalangin nga atong madawat kon kita mohimo og pakigsaad uban sa Ginoo. Si Presidente Russell M. Nelson nagtudlo nga “ang dakong kaayohan sa pagkamiyembro sa Simbahan matuman lamang pinaagi sa makapahimaya nga mga ordinansa sa templo.”1
Busa determinado gihapon ako sa pag-adto sa dihang ang panahon husto na.
Mapuslanon ang Pagpaabot
Sa misunod nga pipila ka bulan, ang akong bana ug ako mipuasa, nag-ampo, ug mipakita og hugot nga pagtuo nga kami magpabiling takos ug mahimo nga magminyo sa templo. Ug milagro kaayo nga, sa Septyembre 2020, ang Johannesburg South Africa Temple adunay limitado nga pagbukas nga nakapahimo sa akong bana ug kanako sa pagdawat sa among pagtuga.
Dili ikapadayag sa pulong kon unsa ka duol ang akong nabati ngadto sa Langitnong Amahan ug sa Manluluwas sulod sa templo. Usa kadto ka higayon sa espirituhanong kasuod nga dili gayod nako makalimtan. Ug mapuslanon ang pagpaabot.
Wala madugay human niana, ang akong bana ug ako sa kataposan makahimo sa pagpaselyo alang karon ug sa kahangtoran sa balay sa Ginoo.
Ang among adlaw sa pagselyo sagrado kaayo. Kami lang ang magtiayon diha sa templo nianang higayona, sa paghimo nianang mahangtorong pakigsaad sa usag usa ug sa Ginoo. Naghingapin ang akong kalipay. Mibati ko nga daw ang Manluluwas naglingkod tupad kanamo, nag-ingon, “nahimuot Ako sa inyong hugot nga pagtuo—sa kataposan nahimo ninyo kini!”
Ug kami mahinamon sa pagsugod og usa ka bag-ong panaw nga magkauban, diin makabalik-balik kami ngadto sa templo.
Mga Panalangin sa Templo
Bisan og ang mga templo dili pa andam kaayo para kanatong tanan, kon atong unahon ang pagbisita sa balay sa Ginoo ug maningkamot sa pagpabilin nga takos sa rekomend sa templo, kita makadapit sa mga panalangin ngadto sa tanang dapit sa atong mga kinabuhi.
Si Elder Quentin L. Cook sa Korum sa Napulog Duha ka Apostoles nagtudlo: “Nag-ampo ko nga ang matag usa kanato motahod sa Manluluwas ug mohimo sa gikinahanglan nga mga kausaban aron sa paghunahuna sa atong mga kaugalingon nga anaa sa Iyang sagrado nga mga templo. Sa pagbuhat sa ingon, makatuman kita sa Iyang balaan nga mga katuyoan ug mag-andam sa atong mga kaugalingon ug atong mga pamilya alang sa tanang mga panalangin nga mahatag sa Ginoo ug sa Iyang Simbahan niini nga kinabuhi ug sa kahangtoran.”2
Kon ako maghunahuna sa akong mga pakigsaad sa templo o makatambong sa templo, ako mobati nga mas maduol sa Langitnong Amahan ug ni Jesukristo ug makahimo ako sa pagbiya sa mga butang sa kalibotan ug sa pagdapit sa kalinaw sa akong kinabuhi. Tungod sa mga panalangin sa templo, ang akong bana ug ako nakahimo sa pagtan-aw og balik ug makita ang kamot sa Langitnong Amahan nga naggiya sa among kinabuhi ug nakapalambo sa among hugot nga pagtuo nga Siya naggiya kanamo sa matag adlaw.
Ako mapasalamaton alang sa pagtuga sa templo, nga makatabang nato nga makahibalo unsaon sa pagbalik ngadto sa Langitnong Amahan, ug sa kahigayonan nga kita kinahanglan nga mabugkos sa kahangtoran niadtong atong gimahal—ang dili mahulagway nga mga panalangin nga anaa kanato tungod sa Pag-ula ni Jesukristo.
Kitang tanan mamahimong takos sa mga panalangin samtang kita mangandam sa atong kaugalingon ug mosunod sa ehemplo sa Manluluwas—bisan pa sa bisan unsang hagit o kalisod moabot kanato.
Ang makaabot didto mapuslanong ang tanang paningkamot. Tuo kanako.