Digital Lamang
Sa Unsang Paagi ang Grasya sa Manluluwas Magamit Ngari Kanako ug sa Akong Sakop sa Pamilya nga may Kakulangan
Ang tagsulat nagpuyo sa Utah, USA.
Ang pagdako uban sa usa ka igsoon nga babaye nga may kakulangan mihimong lisod sa kinabuhi usahay, apan nahimo akong mas suod sa akong Manluluwas latas niining tanan.
Litrato sa maayong kabubut-on sa tagsulat
Ako adunay usa ka suod nga higala. Ang iyang ngalan mao si Barbara. Ganahan kami nga motan-aw ug modungan og kanta sa mga salida. Mag-uban kami nga maglakaw-lakaw ug motan-aw sa mga bulak sa mga nataran sa templo. Mag-uban kami nga magbasa og mga istorya kabahin sa prinsesa matag gabii. Kon kauban nako si Barbara, pwede ako nga mahimo kon kinsa ako. Dili lamang nga siya ang akong labing minahal nga higala, apan siya usab ang akong igsoong babaye.
Si Barbara adunay cerebral palsy, usa ka kahimtang nga nakaapekto kaniya sa pisikal ug mental nga paagi. Dili siya makalakaw, ug kinahanglan siya nga pakan-on pinaagi sa usa ka tubo. Ganahan siya nga mokanta apan naglisod sa pagpadayag sa iyang mga pagbati, mga gusto, ug mga panginahanglan pinaagi sa pagsulti. Ug bisan tuod og 29 anyos si Barbara, sa pangisip molihok siya sama sa usa ka gamayng bata.
Pagdawat sa usa ka Dako nga Responsibilidad
Bisan tuod si Barbara upat ka tuig nga magulang kay kanako, kanunay nakong gibati nga daw ako ang “magulang nga babaye.” Ang tibuok kalibotan sa akong pamilya nagtuyok libot kaniya. Siya mao ang adlaw, ug kami mao ang nagliyok nga mga planeta. Samtang ang sitwasyon usahay adunay talagsaon nga mga kaayohan—sama sa paglaktaw sa mga linya sa mga peryahan (amusement parks)—sa ubang panahon nagpasabot kini sa paghimo og mga sakripisyo, sama sa dili pag-adto sa piho nga mga kalihokan o sa pagpahigayon og mga kalihokan sa among panimalay. Matag adlaw rebyohon namo ang among eskedyul aron sa pagseguro nga sa kanunay adunay usa ka tawo nga mag-atiman ni Barbara ug sa iyang mga panginahanglan.
Aron matabangan ang akong mga ginikanan sa pag-atiman kaniya, ang akong magulang nga lalaki ug ako paspas nga nahingkod. Kinahanglan nga kami makat-on unsaon sa pag-ila kon si Barbara adunay seizure ug kon unsa ang angayng buhaton, unsaon sa pagpakaon kaniya pinaagi sa usa ka tubo, unsaon sa pag-ilis sa iyang mga diaper, ug unsaon sa pag-andam sa iyang mga tambal sa dihang bata pa kaayo kami. Samtang kining sayong pagkahingkod nakatabang kanako nga makabaton og pagsalig sa akong kaugalingon, kini mihimong lisod kaayo sa pakighalubilo.
Gibati nako nga lahi kaayo ko kay sa tanan nakong kaedad. Bisan kon gidapit ako nga molaag uban sa mga higala ug ang akong mga ginikanan miawhag kanako sa pag-adto, naglisod ko sa paglingaw-lingaw tungod kay gibati nako nga sad-an nga ang akong mga ginikanan adunay daghan kaayo nga buhatonon diha sa panimalay. Sa ubang panahon maglisod ako nga lingawon ang akong kaugalingon kon si Barbara nakigbisog sa iyang panglawas. Kasagaran, gusto lang ko og usa ka higala nga molingkod uban kanako ug maminaw.
Pagbuntog sa Kamingaw
Usahay gibati nako nga walay usa nga nakasabot sa unsay akong giagian. Apan pipila ka butang ang nakatabang sa pagtambal niana nga kamingaw. Mihukom ako nga mosulay sa pagtabang sa mga tawo nga tingali mibati sa samang paagi. Sa dihang miadto ko sa mga kalihokan o sa simbahan, naningkamot ako sa paglakip niadtong naglingkod nga nag-inusara o kinsa makita nga daw sila adunay dili maayo nga adlaw. Sama sa gitudlo ni Elder Gerrit W. Gong sa Korum sa Napulog Duha ka Apostoles, “Ang mga milagro mahitabo kon kita mag-atimanay sa usag usa sama sa Iyang buhaton.”1 Ug nakakita ako og mga milagro nga miabot sa akong kinabuhi. Mibati ako nga mas komportable gayod nga moadto sa mga kalihokan ug mas malipayon kon mitanyag ko og gugma ngadto sa uban.
Laing butang nga nakatabang mao ang pagkaamgo kon sa unsang paagi ang Manluluwas tinuorayng nakasabot kanako. Nakaamgo ako nga Siya nasayod gayod sa unsay akong giagian ug kanunay nga magauban kanako. Mas gitutokan nako nga makaila Kaniya pinaagi sa mga kasulatan ug pag-ampo. Usahay kon mag-ampo ako, akong hunahunaon nga Siya ug ang Langitnong Amahan naglingkod uban kanako ug naminaw. Kon ako adunay lisod nga mga pagbati ug mobati nga nabug-atan kon daw unsa ka dili makiangayon usahay ang sitwasyon ni Barbara, akong gihinumdoman nga si Kristo motabang kanako nga makakaplag og kalinaw ug kasegurohan pag-usab. Si Elder Dale G. Renlund sa Korum sa Napulog Duha ka Apostoles hingpit nga mipasabot niini sa dihang siya miingon, “Diha sa dili makiangayong mga sitwasyon, usa sa atong mga tahas mao ang pagsalig nga ‘ang tanan nga pagkadili makiangayon kabahin sa kinabuhi mahimong mapahusto pinaagi sa Pag-ula ni Jesukristo.’”2
Pagsalig sa Grasya sa Manluluwas
Ang pagbaton og usa ka minahal nga may kakulangan mahimong magkinahanglan og labaw pa sa tawhanong kusog [near-superhuman strength]. Makaapekto kini sa inyong kinabuhi sa pisikal, mental, emosyonal, pinansyal, ug espirituwal nga paagi. Sa milabay nga 29 ka tuig, ang akong mga ginikanan mimata hapit kada adlaw sa alas 2:00 sa buntag aron sa pag-atiman ni Barbara. Kaming tanan kasagaran moadto sa gym aron mahimo kaming kusgan sa pag-alsa ug pagdala ni Barbara kon gikinahanglan. Ug mao nga daghang ubang mga responsibilidad ang nakahatag og dili maayo nga epekto kanamong tanan.
Unsaon kaha namo nga posibleng mabuhat ang tanan?
Mahulagway kini sa usa ka pulong: grasya.
“Ang grasya [mao ang] makaabag nga gahom ug espirituhanon nga pagpaayo nga gitanyag sa kaluoy ug gugma ni Jesukristo. …
“Ang grasya sa Dios makatabang nato kada adlaw. Makalig-on kini nato sa pagbuhat sa maayong mga buhat nga dili nato mabuhat sa atong kaugalingon.”3
Unsa ang akong ganahan kaayo ni Barbara? Uban kaniya nakakat-on ako og dugang mahitungod sa gugma sa Manluluwas alang kanato. Dali ra ninyo mabati ang Iyang gugma kon kauban ninyo si Barbara. Bisan pa sa iyang tanan nga mga kalisod, kanunay siyang nagpahiyom, nagkanta, ug nagpakatawa kanamo. Apan, adunay mga adlaw usab diin gibati nako nga walay mahimo, sa dihang ingon og walay makapaarang-arang sa iyang gibati. Apan tungod sa akong mga kasinatian, nasayod ako uban sa kasegurohan nga ang Manluluwas nakasabot sa unsay giagian nako ug ni Barbara. Bisan unsa pa ang atong yutan-ong mga pagsulay, ang usa ka matahom nga aspeto sa makaabag nga gahom sa Manluluwas mao nga kita dili lamang mahatagan og kusog aron masinati ug mabuntog ang lisod nga mga butang apan mabuhat usab nato kining tanan nga adunay hingpit nga kalipay.