Mga Young Adult
Ang mga Panalangin sa Pagka-Temple Worker
Ang tagsulat nagpuyo sa Utah, USA.
Ang pagserbisyo sa templo mihimo sa mga ordinansa ug mga panalangin nga mas espesyal ngari kanako.
Litrato gikan sa Getty Images
Sa akong unang pag-adto sa templo, nahingangha ako sa kahalangdon sa balay sa Ginoo. Akong gibati ang katin-awan mahitungod kon kinsa ako, nganong ako ania sa yuta, ug asa ako dad-a kon ako mopunting ni Kristo.
Bag-o lamang akong gitawag nga moserbisyo og misyon sa England, ug ako naghinam-hinam sa pag-adto sa templo sa wala pa ako molarga. Nangandam ako daan pinaagi sa pagkat-on mahitungod sa mga ordinansa sa templo ug sa pag-andam sa akong kaugalingon sa paghimo og mga pakigsaad uban sa Ginoo.
Pagkahuman, ako nahibalo nga ako gusto nga moadto didto sa kanunay sa akong tibuok kinabuhi. Ug kana nga desisyon miimpluwensya sa akong tinguha sa pagserbisyo isip usa ka ordinance worker usab.
Nagsakripisyo sa Pagserbisyo
Sumala sa gitudlo ni Elder Ronald A. Rasband sa Korum sa Napulog Duha ka Apostoles, “Ang pagtambong sa templo mopalambo sa atong panab[o]t bahin sa Dios nga Kapangulohan ug sa walay katapusang ebanghelyo, sa atong pasalig nga magpakabuhi ug motudlo sa kamatuoran, ug sa atong kaandam nga mosunod sa ehemplo sa atong Ginoo ug Manluluwas, nga si Jesukristo.”1
Gusto kong dapiton kadto nga mga panalangin sa akong kinabuhi, mao nga sa dihang miuli ako gikan sa akong misyon, nakigsulti ako sa akong bishop mahitungod sa pagkahimong usa ka temple worker. Sa kataposan ako gitawag sa pagserbisyo sa Templo sa Washington D.C. sulod sa pipila ka bulan samtang ako nagtrabaho aron magtigom og kwarta alang sa pag-eskwela.
Nagserbisyo ako sa templo atol sa alas 6 sa hapon nga turno matag Biyernes sa gabii. Kini nga iskedyol nagkinahanglan kanako nga mobiya og sayo sa akong trabaho ug mobiyahe sulod sa duha ka oras. Kadto usa ka dako ug usahay lisod nga pasalig nga tumanon sa matag semana.
Niana nga higayon, nagtrabaho ako og dugay sa daghang mga pisikal nga trabaho, busa ako kasagaran kapoy gayod alang sa akong turno sa templo. Ako hago usab sa utok sa kasagarang panahon sa pagpangandam sa pagbalik sa kolehiyo ug sa paghunahuna kon unsa ang akong buhaton sa nahibilin nga bahin sa akong kinabuhi.
Apan atol sa akong mga turno, ako naghinam-hinam kanunay sa pagkat-on og dugang pa mahitungod sa mga ordinansa. Ug bisan pa sa akong kanunay nga kakapoy ug walay kataposang lista sa buhatunon, ako sa laing paagi nakakaplag og kalinaw diha sa templo. Kanunay akong mibiya nga mapasalamaton alang sa kahigayonan sa pagserbisyo sa Ginoo didto, ug mibati ako nga gibag-o sa espirituhanong paagi sa kataposan sa matag turno samtang ako nagpunting diha sa Manluluwas. Ang kalinaw nga akong gibati mitabang usab kanako sa pagpangita sa direksyon ug mga tubag sa akong kinabuhi.
Paghimo og Panahon
Ang akong pagserbisyo sa templo natapos sa dihang mibalhin ako aron sa pag-eskwela sa kolehiyo. Ug ako nagkapuliki pag-ayo ug nabug-atan sa akong pag-eskwela nga ako wala motambong sa templo kanunay. Ako misugod sa pagkamatikod og siging-siging nga pagbati nga kinahanglan akong moserbisyo didto pag-usab, busa ako nakigkita sa akong bishop sa pagpangutana mahitungod niini.
Nakadawat ako og tawag sa pagserbisyo sa templo sa mga hapon sa Sabado.
Oo, ako nagkapuliki og maayo, apan naghinam-hinam ako sa paggahin og panahon sa pagserbisyo diha sa balay sa Ginoo sa matag semana. Sa matag turno, mas nagkaduol ako sa Manluluwas ug ngadto sa Langitnong Amahan, ug ako nakatagamtam sa kalinaw nga talagsaon sa Iyang balay.
Pagtagamtam sa mga Panalangin sa Templo
Ang akong pagserbisyo sa templo nahimong ingon og mubo, apan makapamatuod ako nga ang akong panahon sa pagserbisyo nakapausab sa akong kinabuhi ngadto sa mas maayo.
Tungod sa mga sakripisyo nga akong gihimo sa pagserbisyo ug tungod sa pagkamaayo sa Ginoo, sa tinuoray akong gibati ingon og nakadawat ako og mga panalangin sa templo nga gihulagway makausa ni Presidente Russell M. Nelson: “Ako mosaad kaninyo nga ang Ginoo mohatag sa mga milagro nga Siya nasay[o]d nga inyong gikinahanglan samtang kamo naghimo og mga sakripisyo sa pagserbisyo ug pagsimba diha sa Iyang mga templo.”2
Nakasinati ako niadto nga mga milagro. Ug ako nasayod nga kamo makahimo usab samtang kamo naghimo sa serbisyo sa templo nga usa ka mahinungdanong bahin sa inyong kinabuhi.
Dili kitang tanan makabaton sa oportunidad sa pagserbisyo isip usa ka temple worker. Apan pinaagi sa pag-apil diha sa templo ug family history nga buhat, paghupot ug pagtahod sa atong mga pakigsaad, ug pagtambong sa templo kon makahimo kita, tanan kita makapaduol ngadto sa Langitnong Amahan ug ni Jesukristo ug makadapit sa Ilang giya ug kamaayo nganhi sa atong mga kinabuhi. Ug kon Sila mao ang atong tumong, kanunay kitang makabaton og kalinaw sa atong mga kasingkasing, walay pagsapayan kon unsa nga mga hagit ang atong gisinati.