Mga Young Adult

Ang mga Pakigsaad Makapausab sa Atong mga Relasyon

Ni Emily Abel

Ang tagsulat nagpuyo sa Utah, USA.

Ang mga pakigsaad makahatag kanato og gahom sa paghigugma sa atong mga kaugalingon, makaalagad sa uban, ug makabalik ngadto sa atong Langitnong Amahan ug sa Manluluwas.

Isip usa ka bata, mapagarbuhon ako nga nakapasabot og usa ka importante nga pulong sama sa pakigsaad. Matag higayon nga mogawas kini nga hilisgotan diha sa simbahan, ako mapagarbuhong modako ang tingog, “Ang pakigsaad usa ka saad tali kanako ug sa Dios!”

Nagtubo, ako mihimo og mga pakigsaad pinaagi sa bunyag ug diha sa templo, ug ang akong pagpasabot kasagaran mipabilin nga wala mausab. Akong gitan-aw ang mga pakigsaad isip usa ka hugpong sa mga lagda alang kanako sa pagsunod, ug dayon ang Dios mohimo sa Iyang bahin sa sabot pinaagi sa paghatag sa gisaad nga mga panalangin.

Ngari kanako, ang mga pakigsaad ingon og usa ka butang nga butangan og tsek ang usa ka lista sa buhatunon sa kinabuhi kon kini natuman. Akong nakita kon sa unsang paagi ang mga buhat sa ebanghelyo, sama sa pag-ampo ug pagpuasa, mga mahitungod sa pagpalambo og usa ka relasyon sa Langitnong Amahan, apan ang mga pakigsaad ingon og mahitungod sa mga lagda sa Langitnong Amahan.

Nan, kini nahimo nga ang akong batan-ong pagpasabot usa ka maayong sinugdanan, apan kini nagkinahanglan og pipila ka dugang nga mga linya kon ang mga pakigsaad mopausab sa akong kinabuhi sa paagi nga kini gitinguha sa Dios.

Pagpuno sa Nawala nga mga Piraso

Kini nga mga pulong nga gikan ni Elder Gerrit W. Gong sa Korum sa Napulog Duha ka Apostoles mga nakatabang nga dapit sa pagsugod alang sa akong naglambo nga pagpasabot sa pakigsaad:

“Pinaagi sa balaanong pakigsaad, kita iyaha sa Dios ug sa usag usa. Ang pagkasakop diha sa pakigsaad usa ka milagro. …

“… Dili kini mohunong sa pagtuo sa atong kaugalingon, sa usag usa, o sa Dios.”¹

Sukad sa pagkakaplag niana nga kinutlo, ako nakaamgo nga ang mga pakigsaad adunay inadlaw nga epekto sa atong mga kinabuhi. Kon kita sa tinuoray nagpuyo pinaagi sa mga pakigsaad nga atong gihimo, kita dili mohunong sa pagtuo sa atong mga kaugalingon, sa mga tawo nga naglibot kanato, o sa Dios. Ang atong mga pakigsaad nagtabang kanato sa pagsabot sa tinuod nga kinaiyahan sa atong mga relasyon ug naghatag kanato og gahom nga atong gikinahanglan aron sa pagpalambo niini.

Ang mga pakigsaad labaw pa sa pagsunod sa mga lagda; sila mahitungod sa pagpalig-on sa mga relasyon!²

Atong tan-awon ang tulo ka mahinungdanong mga relasyon sa atong kinabuhi ug kon sa unsang paagi ang atong mga pakigsaad makapausab niini: atong relasyon uban sa atong mga kaugalingon, ngadto sa uban, ug sa atong Langitnong Amahan ug sa Manluluwas.

Pag-ila sa Atong Mahangturong Pagkatawo

Ang tanan nagtinguha og pagbati sa pagkatawo. Sa diha pa ako sa high school, akong natukod pag-ayo ang akong pagkatawo diha sa akong gugma alang sa sayaw. Samtang ako kanunay nagkuha og mga klase sa sayaw ug naghatag og mga pasundayag, ang “mananayaw” mao ang mahinungdanon nga bahin kon kinsa ako kaniadto.

Apan ako migradwar sa high school, ug ang kinabuhi midala kanako diha sa dalan nga layo gikan sa sayaw. Kon wala ang sayaw, kulang ako sa matag adlaw nga kadasig, ug ako nagtinguha nga mobati sama og kabahin gihapon sa usa ka grupo. Nanlimbasog ako uban sa masulub-on nga mga pagbati sulod sa mga semana samtang naningkamot ako sa pagdiskobre og balik kon kinsa ako ug asa ako nahisakop. Kining malisod nga kasinatian mitudlo kanako nga samtang ang pipila ka mga pagkatawo lumalabay, ang uban makapalambo sa atong mga kinabuhi hangtod sa kahangtoran.

Mitudlo si Elder Gong:

“Uban sa walay kinutuban nga gugma, [ang Dios] nag-awhag kanato sa pagtuo ug pagpasakop diha sa pakigsaad.

“… Ang karaang paradoha [paradox] nagpabilin pa gihapon nga tinuod. Sa pagkawala sa atong kalib[o]tanong kaugalingon pinaagi sa pagkasakop sa pakigsaad, makaplagan nato ug mahimong labing mahangturon ang atong kaugalingon—gawasnon, buhi, tinuod.”³

Ang pagkamiyembro sa grupo sa sayaw usa ka makahuluganon, makahatag og pagtulun-an nga kasinatian, apan ang sobra nga pagpunting sa akong ngalan isip mananayaw milinga kanako gikan sa akong mahangturong pagkatawo.

Unsay mitabang kanako sa pagpunting og usab sa akong mahangturon nga pagkatawo mao ang pagpahinumdom sa akong kaugalingon sa akong mga pakigsaad sa bunyag. Pinaagi sa pagdesisyon nga hulmaon og una ang akong pagkatawo ug labaw sa tanan sa pagkamahimong disipulo ni Jesukristo, nakaplagan ko ang pagkanahisakop nga akong gitinguha.

Nakaamgo usab ako nga ang paghimo ug pagsunod sa sagradong mga pakigsaad uban sa Dios nagtabang kanato sa paghupot sa atong pagpunting diha ni Kristo, diin motabang kanato nga mohawod sa tanang aspeto sa kinabuhi. Ako nagtuo nga si Kristo nagtagad mahitungod sa akong gugma alang sa sayaw ug nakatabang kanako sa pagpangita og kalamposan sa pagbuhat niini; kinahanglan lamang ako mokat-on sa dili paghimo sa sayaw nga basehan sa akong pagkatawo.

Kining mortal nga panaw makita nga lahi alang sa tanan, apan sa paghupot sa mga pakigsaad ug magpabilin diha sa dalan sa pakigsaad makadala kanatong tanan sa gahum nga atong gikinahanglan aron mahimong atong labing maayong kaugalingon.⁴

Pagpalambo sa Atong Gugma alang sa Uban

Ang mahigugmaong mga relasyon mao ang usa sa labing makatagbaw nga bahin sa kinabuhi, apan sila mahimong lisod sa pagtukod ug sa pagpadayon. Pinaagi sa atong mga pakigsaad, kita mas maayo nga mosabot kon unsaon paghigugma sa mga tawo nga naglibot kanato. Miingon si Elder Gong, “Diha sa pagpadayag sa atong tinuod, balaan nga mga kaugalingon pinaagi sa atong mga pakigsaad uban sa Dios, makakat-on kita sa pag-ila ug paghigugma sa atong mga kaigsoonan sama sa Iyang gihimo.”⁵

Ang mga pakigsaad makapausab sa atong panglantaw sa yutan-ong mga relasyon. Sama pananglit, human ang akong higala nabunyagan sa iyang pangidaron nga mga kwarenta, siya miingon nga siya adunay lahi nga pagsabot sa iyang tahas isip usa ka inahan. Nasayod nga ang Langitnong Amahan mogiya kaniya pinaagi sa gasa sa Espiritu Santo mihatag kaniya og kasiguroan nga siya makatabang sa iyang mga anak sa pagbuntog sa ilang indibidwal nga mga hagit.

Ingon nga usa ka tighupot og pakigsaad makapanalangin sa atong yutan-ong mga relasyon sa daghang paagi, lakip sa mosunod:

Kon atong hinumduman ang mahangturong kinaiyahan sa mga pakigsaad, makaplagan nato ang dugang nga paglaom, kalig-on, ug pailub diha sa lisod nga mga relasyon.
Samtang kita mahimong mas maayo sa pagtuman sa mga saad, makapalambo kita og mas lawom nga kalidad sa pagsalig sa usag usa.⁶
“Pagbangutan uban niadto nga nagbangutan” (Mosiah 18:9) makatabang kanato sa pagpalambo og mga pagbati sa kasuod ug gugma.
Kon kita moila nga kitang tanan mga anak sa Langitnong Amahan, ang atong mga kasingkasing mapuno uban sa gugma bisan gani alang sa mga estranghero (tan-awa sa Doktrina ug mga Pakigsaad 18:10–11).

Kadto pipila lamang ka mga ehemplo. Apan mapasalamaton ako nga samtang kita naghupot sa atong mga pakigsaad, ang Langitnong Amahan makapahulam kanato og gahom sa pagpalambo sa mga hiyas ug mga panglantaw nga gikinahanglan alang sa malampuson nga mga relasyon.

Pagpalig-on sa Atong Relasyon ngadto sa Langitnong Amahan ug ni Jesukristo

Samtang kini tinuod nga samang mga pulong ang gigamit kon ang mga indibidwal mohimo og piho nga mga pakigsaad (sama sa bunyag ug pagtuga sa templo), adunay duha ka mga pulong nga gipamulong sa dihang misulod ako niini nga mga pakigsaad nga mihimo niini nga talagsaon: Emily Abel. Kadtong duha ka mga pulong nahimong tanan nga mga pakigsaad alang sa akong personal nga pagdapit kang Kristo nga maanaa sa akong kinabuhi. Tungod niadto nga mga pakigsaad, ako karon, pinaagi sa gahom sa pagkapari, nabugkos ngadto kang Kristo “pinaagi sa mahigugmaon nga relasyon,”⁷ ug Siya karon nabugkos ngari kanako. Mao usab sa matag tawo kinsa naghimo og mga pakigsaad.

Si Dr. Ellie L. Young, associate professor sa clinical psychology ug espesyal nga edukasyon [special education sa Brigham Young University, miingon: “Ang pagkanabugkos ngadto ni Kristo nagpasabot nga kita nakaila Kaniya. Gibati nato ang Iyang makahupay nga gugma. Gibati nato ang Iyang magiyahon nga kamot diha sa atong mga kinabuhi.”⁸

Ang atong mga pakigsaad, sa labing minos nga bahin, mga mahitungod sa pagkat-on sa paghigugma sa atong Langitnong Amahan ug sa Manluluwas ug pag-ila sa Ilang mga tingog (tan-awa sa Alma 5:60). Ug nakakita sa atong mga pakigsaad isip kabahin sa usa ka personal, naglambo nga relasyon uban Kanila importante alang sa pagbalik ngadto sa dalan sa pakigsaad kon kita mahisalaag. Kon kita naghimo og sayop nga pagliko samtang naningkamot sa paglakaw diha sa dalan sa pakigsaad, Sila nagtawag ug nagdapit kanato sa pagbalik. Ang Langitnong Amahan ug si Jesukristo andam kanunay nga mopasaylo kon kita sinserong gusto nga mas mopaduol ngadto Kanila.

Karon ako nasayod nga ang pagtahod sa akong mga pakigsaad nagpasabot sa pagbaton og lig-ong relasyon ngadto sa Langitnong Amahan ug ni Jesukristo. Bisan human kita makabuhat og dako nga sala, ang atong mga pakigsaad dili mawala sa hangtod kon kita maghinulsol. Ang atong Amahan sa Langit ug ang Manluluwas nagdapit kanato sa pagduol ug pagsugod sa paghimo og mga pagpang-ayo. Sama sa gisulti ni Elder Jeffrey R. Holland sa Korum sa Napulog Duha ka Apostoles, “Imposible nga ang mahangturong kahayag sa Pag-ula ni Kristo dili moab[o]t kaninyo.”⁹

Sa kalibotan nga adunay daghang indigay, mapasalamaton ako alang sa mga pakigsaad nga nagtabang kanako sa paghinumdom sa akong walay kinutubang bili. Sa kalibotan nga puno sa gubot nga mga relasyon, mapasalamaton ako nga ang mga pakigsaad makagiya sa akong mga pakig-labot sa uban. Ug sa kalibotan nga puno sa mga hagit, mapasalamaton ako sa akong Langitnong Amahan ug sa Manluluwas, kinsa motabang kanako sa paglawig sa akong dalan sa pagpauli nga luwas.