Ko e Hē mei he Moʻoní mo Hono Fakafoki mai ʻo e Ongoongoleleí
“Kuó u fekauʻi atu hono kakato ʻo ʻeku ongoongoleleí ʻi he nima ʻo ʻeku tamaioʻeiki ko Siosefá” (Tokāteline mo e Ngaahi Fuakava 35:17).
‘E tokoni ʻa e ngaahi fokotuʻutuʻu ʻi he ʻiuniti ko ʻení ke mahino ki he kau talavoú ʻa e Hē Fakaʻaufuli mei he Moʻoní mo e anga hono fakafoki mai ‘e Sīsū Kalaisi ‘a Hono Siasí mo hono kakato ‘o ʻEne ongoongoleleí ‘i he Palōfita ko Siosefa Sāmitá. ‘E lava e kau talavoú ‘o ako ‘i he ‘iuniti ko ‘ení ki he ngaahi meʻa mahuʻinga naʻe hoko ‘i hono Fakafoki Mai ‘o e Ongoongoleleí pea nau ‘iloʻi hono mahuʻinga ‘o e ngaahi meʻa ko iá ‘i heʻenau moʻuí.
‘Oku ‘i ai ha fatongia lakanga fakataulaʻeiki ‘a e kau maʻu Lakanga Taulaʻeiki Faka-ʻĒloné ke nau vahevahe ‘a e ongoongoleleí mo fakaafeʻi ‘a e kakai kotoa pē ke nau haʻu kia Kalaisi. ‘Oku lava ‘e he ngaahi meʻa te nau aʻusia ‘i he ‘iuniti ko ‘ení ‘o tokoniʻi kinautolu ke nau fakahā mahino pea ‘i he mālohi ‘a e pōpoaki ‘o hono Fakafoki Mai ‘o e Ongoongoleleí ‘i he taimí ni ‘i heʻenau hoko ko e kau maʻu Lakanga Taulaʻeiki Faka-ʻĒloné mo e kahaʻú ‘i heʻenau hoko ko ha kau faifekau taimi kakató.
Koeʻuhí ke hoko e Fatongia ki he ʻOtuá ko ha konga ʻo e fakataha fakakōlomu he ʻaho Sāpaté, mahalo te ke fakakaukauʻi hano akoʻi e fokotuʻutuʻu ki he Fatongia ki he ʻOtuá ʻoku ʻoatu ʻi laló lolotonga e ʻiuniti ko ʻení.
Ngaahi Fokotuʻutuʻu ke Fili mei ai he Māhina ní
Mutualé
Fakakaukau ki he founga te ke lava ʻo palani ai e ngaahi ʻekitivitī ʻoku fehokotaki mo e meʻa ʻoku ako ʻe he toʻu tupú. ʻOku ʻi ai ha saiti ki he Ngaahi ʻEkitivitī e Toʻu Tupú ke tokoni atu kiate koe. Ko e lahi taha ʻa e ngaahi ʻekitivitī ako ʻi he ngaahi fokotuʻutuʻu ko ʻení ʻe lava ke fakaʻaongaʻi ia ʻi he ngaahi ʻekitivitī ʻa e Mutualé. Ngāue fakataha mo e kau palesitenisī fakakōlomú ke fili mo palani ha ngaahi ʻekitivitī lelei ke fakamamafaʻi e meʻa ʻoku ako ʻe he kau talavoú ʻi he ʻaho Sāpaté.
Fatongia ki he ʻOtuá
ʻOku fekauʻaki ʻa e ngaahi konga ko ʻeni mei he tohi Fatongia ki he ʻOtuá mo e ngaahi ngaahi lēsoni ʻi he ʻiuniti ko ʻení:
“Fakaafeʻi ‘a e Kakai Kotoa pē ke Haʻu Kia Kalaisi,” peesi 28–29, 52–53, 76–77