Na cava na inaki ni bula?

Ena bula oqo, eda na mai vakayago ka da na vakatovolei me laurai se da na muria na ivakaro ni Kalou. Eda mai vakarautaka ena vuravura oqo na tawamudu ni matavuvale, na nodra vakalougatataki na luvena na Kalou, kei na taraicake ni Nona matanitu. Na veika eda na mai sotava eke ena vukea na noda sasaga meda veiucui vata kei na Tamada Vakalomalagi.

Mo vakarautaki iko vakayalo

Ko sa sotava vakaevei na marau ena bula oqo? Na cava soti o sa sotava oti e sa vukei iko mo tubu vakayalo?

Na cava era sa vakayacora tiko na goneyalewa mera na veiucui kina kei na Tamada Vakalomalagi?

Wilika ena yalomasumasu na ivolanikalou kei na ivurevure eso oqo. Na cava e sa vakauqeti iko kina na Yalotabu mo wasea vei ira na goneyalewa?

2 Nifai 2:25 (Eda a buli meda mai marau)

Alama 12:25; 34:32; 42:4; Eparama 3:25–26 (Na bula oqo sa gauna ni noda vakatovolei meda na vakarau kina meda sota kei na Kalou)

3 Nifai 12:3–12 (E a cavuta na iVakabula e levu sara na ivakarau ni bula e vakalou)

3 Nifai 12:48 (Vinakata na Tamada Vakalomalagi meda vinaka sara me vaka ni sa vinaka sara o Koya)

V&V 138:53–56 (Eda mai tiko eke meda veivuke ena taraicake ni matanitu ni Kalou)

“Na Matavuvale: Ai Vakaro ki Vuravura Raraba,” Ensign se Liaona, Nove. 2010, 129

Carol F. McConkie, “Na Totoka ni Yalo Savasava,” Ensign se Liaona, Me 2017, 9–12

Thomas S. Monson, “Na Cici ni Cere sa Tu e Matada,” Ensign se Liaona, Me 2012, 90–93

“Nomu Va na Miniti, ” Ensign se Liaona, Me 2014

“Yavu ni Veivakabulai,” Tudei ena Vakabauta (2004), 210–211

Veivakavulici ena ivakarau ni Turaga

Na Turaga e lomani ira e vakavulica. E kilai ira vinaka ka kila na veika era rawa ni rawata. E kila na veika e rawa ni ra tubucake kina—kei na veika ena ganiti ira. Ni ra sotava na dredre, a sega ni biuti ira tu o Koya ia a tomana tikoga na nona lomani ira ka qaravi ira. Na cava o rawa ni cakava mo lomani ira ka qaravi ira kina na goneyalewa me vakataka na iVakabula?

Wasea na veika o sa sotava

Ena itekivu ni veikalasi yadua, sureti ira na goneyalewa mera wasea, vakavulica, ka vakadinadinataka na veika eso era sa sotava oti mai ena nodra bulataka na veika era sa vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa mera raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se na nomu nanuma ga mo vakamacalataka kina na lesoni ni macawa oqo:

Vola ena vava ni volavola, “Na cava na inaki ni bula?” Kerei ira na goneyalewa mera vakatututaka e so na ka me rawa kina vei ira na tamata mera na sauma na taro kevaka e sega ni tiko vei ira na taucoko ni kosipeli. Ena duidui vakacava na isaunitaro mai na kena e tiko ena kosipeli i Jisu Karisito?
Vakaraitaka e dua na wa balavu ka tiko ena kena veimama e dua na ibuki, ka veitalanoataka ni ibuki o ya e ivakatakarakara ni bula oqo, na veika e tiko ena yasa oqo ni ibuki e vakaraitaka na bula taumada kei na veika e tiko ena yasa ni ibuki kadua e vakaraitaka na bula ni sa yaco oti na mate. Ena tara vakacava na bula oqo na noda digidigi ena bula taumada? Ena tara vakacava na noda bula sa bera mai na noda digidigi ena bula oqo?

Vulica vata

Na itaviqaravi ka koto qo e ra ena vukei ira na goneyalewa mera vulica na inaki ni bula. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Solia vei ira na cauravou yadua e dua na tikini pepa, ka qai sureti koya me wilika na ibalebale ni vosa na yalo savasava. Sureti ira na goneyalewa me ra wilika na vosa nei Sister Carol F. McConkie “Na Totoka ni Yalo Savasava” ka qai tomana na nona ivakamacala ni yalo savasava ki na kena ibalebale vei ira. Na cava e rawa ni da cakava me yaco me da savasava sara? Sureti ira na goneyalewa me ra digia e dua vei ira na ibalebale ni yalo savasava era vola ka qai wasea ena rawa vakacava me ra saga tiko ga me ra rawa ni vakasavasavataki ena sala oqo.
Sureti ira na goneyalewa mera wilika na iVunau ni Kalougata ena 3 Nifai 12:3–12 ka vakaraica na ivakarau e gadreva na Tamada Vakalomalagi meda vakamuria ena bula oqo. Kerei ira mera vakananumi ira na tamata ena ivolanikalou se ena bula oqo ka ra sa bulataka tiko na ivakarau oqo. E vukei keda vakacava na marama na ivakavuvuli ni iVakabula ena iwase ni ivola oqo meda kila kina na inaki ni noda bula?
Wasewasea na vosa nei President Thomas S. Monson “Na Cicivi ni Cere sa Tu e Matada” vaka iwasewase, ka sureti ira na goneyalewa me ra vaqara ena iwasewase na ka ena vukei ira me ra na kila vakavinaka cake na inaki ni bula. Kerei ira me ra vakasamataka vakabibi na ka era sa cakava tiko—kei na ka e dodonu me ra cakava tiko—me rawa ni vakavatukana na nodra inaki. Kerea e vica vei ira me ra wasea na nodra nanuma.
Sureti ira na goneyalewa mera vakaraica e so na tiki ni ivolanikalou e rawa ni ra vakayagataka mera vukea kina e dua e sega tiko ni kila na inaki ni bula (me ivakaraitaki, e rawa ni ra vakayagataka na tiki ni ivolanikalou ka tiko ena ituvatuva oqo). Kerei ira mera wasea na veika era sa kunea kivua e dua tale ena kalasi. Vakauqeti ira mera vakasamataka na sala mera na wasea kina na tiki ni ivolanikalou vua e dua na itokani se lewe ni matavuvale ka na sega tiko ni kila deivaki na inaki ni bula.
Kerea na veimama ni kalasi mera wilika na veika e baleti Noelle Pikus-Pace ena vosa nei Bishop Gary E. Stevenson “Nomu Va na Miniti,” ka kerea na ikarua ni veimama mera wilika na veika e baleti Torah Bright ena vosa vata ga. Sureti ira mera wasea vakaiira na veika era sa vulica me baleta na inaki ni bula mai na italanoa oqo. Solia e vica na miniti vei ira na goneyalewa mera talevalesu na vo ni vosa nei Bisopi Stevenson ka vakasamataka vakatitobu na kena vakayacoka tiko ena nodra “va na miniti” — na cakacaka vakalotu se cavuikalawa bibi cava e sa tu e matadra, ka ra sa vakavakarau tiko kina vakacava? Sureti ira na goneyalewa mera wasea na nodra nanuma.
Solia vei ira na goneyalewa e yadua na ilavelave ni “Na Matavuvale: Ai Vakaro ki Vuravura Raraba,” ka kerei ira mera wilika ka makataka na vosa ena rawa ni tukuna vei ira na inaki ni nodra bula vakaluvena yalewa na Kalou. Kerei ira mera wasea na ka era sa kunea ka vakamacalataka na vuna e vakaibalebale kina vei ira.

Kerei ira na goneyalewa mera wasea na veika era sa vulica nikua. Era sa kila deivaki cake beka na inaki ni bula? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa mera vakasamataka na sala mera bulataka kina na veika era sa vulica nikua. Me kena ivakaraitaki, e rawa ni ra:

Vakaraitaka e so na ka era sa vulica ena kalasi ka sa vakauqeti ira mera tomana tiko ni digitaka na vinaka se sa ra na veisautaka ena nodra bula.
Vakasamataka e so na ka mera cakava ena macawa oqo ka na rawa ni vakataucokotaka na nodra inaki tawamudu.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava mera vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.