Me’u na kunea vakacava na iwali ni noqu bolebole kei na leqa eso?

E okati ena bula rawati koya na sasaga ni vaqara iwali ki na noda leqa kei na bolebole eso. E vuqa vei ira na iwali oqo sa kune ena kosipeli vakalesuimai i Jisu Karisito. Sa kila vinaka tu na Tamada Vakalomalagi na bolebole eso eda sotava. E lomani keda o Koya ka vinakata me vukei keda. Sa dodonu meda masulaka na veituberi ni da vaqara na isau ni noda bolebole ena ivolanikalou kei na nodra vosa na parofita kei na iapositolo.

Mo vakarautaki iko vakayalo

Sa vakarautaki iwali vakacava na kosipeli kei na vakacegu ena gauna ni nomu bolebole eso?

Na cava eso na ka se bolebole era sotava na goneyalewa? Na bolebole cava eso e rawa ni ra sotava mai muri? Na ivakavuvuli cava ni kosipeli ena vukei ira mera rawata vakavinaka na veidredre oqo?

Na ivolanikalou kei na ivurevure cava tale ena vukei ira na goneyalewa mera kila deivaki na iwalewale e rawa ni vukea kina na bolebole ni bula na kosipeli?

Na Vosa Vakaibalebale 3:5–6; Maciu 11:28–30; Marika 4:36–39; Alama 7:11–13; Alama 37:35–37; 38:5 (Vakasaqara na veivuke ni Turaga ena bolebole kei na leqa eso)

Thomas S. Monson, “Eda Sega ni Lako Duadua Voli,” Ensign se Liaona, Nove. 2013

Richard G. Scott, “Vakaliuca mo Bulataka Nomu Vakabauta,,” Ensign se Liaona, Nove. 2014, 92–95

Jeffrey R. Holland, “Vaka na Bilo sa Kavoro” Ensign se Liaona, Nove. 2013, 40-42; raica talega na vidio “Like a Broken Vessel”

“Tiko Bulabula ni Yago kei na Vakasama,” Me iSakisaki ni iTabagone (2012), 25–27

Vidio: “Face to Face with President Eyring and Elder Holland: What can I do to stay positive and know that I am enough?”

Veivakavulici ena ivakarau ni iVakabula

A vakavulici ira na tamata na iVakabula mera vakanananutaka vakataki ira na ivolanikalou ka mera vakayagataka mera kunea kina na isau ni nodra vakatataro. O na rawa ni vukei ira vakacava na goneyalewa mera gadreva mera vuki ki na ivolanikalou kei na vosa ni parofita ni ra vakasaqara na isau ni nodra bolebole?

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

Sureti ira na goneyalewa mera tukuna eso na bolebole se leqa era sotava tiko na nodra itabavata, ka vola na ka era kaya ena vava ni volavola. Kerei ira na goneyalewa mera vakatakila eso na ka tawabulabula se tawayaga era na rairai cakava na itabagone me rawai kina na veileqa oqo. Sureti ira na goneyalewa ena gauna taucoko ni lesoni mera vakaraica na sala eso e rawa ni veivuke kina na dina ni kosipeli.
Wasea e dua na ka o sa sotava oti ena nomu bula a veivakacegui se veivuke kina na kosipeli me baleta vakatabakidua na leqa se bolebole a yaco. Sureti ira na goneyalewa mera wasea eso na ka e vakakina era a sotava ena nodra bula.

Vulica vata

Na itaviqaravi yadua e ra ena rawa ni vukei ira na goneyalewa mera vulica na iwalewale ki na nodra dui bolebole. Muria na veivakauqeti ni Yalotabu, ena nomu digitaka e dua se sivia ka na ganita na nomu kalasi:

Sureti ira na cauravou me ra vakasamataki ira nodra itokani era dau raici ira vakataki ira, vakabibi. Kerei ira na goneyalewa me ra sarava na vidio “Face to Face with President Eyring and Elder Holland: What can I do to stay positive and know that I am enough?” mera qai toqa na veika era na rawa ni wasea me vukei ira na nodrai itokani. Na itukutuku cava mai vei Peresitedi Eyring kei Elder Holland e vakauqeti ira na goneyalewa.
Sureti ira na goneyalewa mera vakasamataka e dua na bolebole se leqa era sotava na goneyalewa edaidai. Kerei ira mera barausitaka na ituvatuva ni matanivola ni ulutaga ena ivure ni koniferedi wale tikoga oqo ni Liaona, ena raici ni ulutaga eso ka na rawa ni veivuke ena veivosakitaki ni leqa oya. Sureti ira mera vakasaqara e dua vei ira na vosa ka semati ki na veiulutaga oya ka wasea vata na kalasi e dua na vosa ka na rawa ni vukea e dua na goneyalewa me lakosivita na nona bolebole. Vakayaloqaqataki ira na goneyalewa mera vakayagataka na ituvatuva ni matanivola ni ulutaga me raici kina na veivuke ki na nodra bolebole vakaiira.
Sureti ira na goneyalewa mera wilika na icavacava ni rua na parakaravu ni “Tiko Bulabula ni Yago kei na Vakasama” ena Me iSakisaki ni iTabagone ka vakaraica na ivakasala ka na rawa ni vukei ira se tamata era kila. Na cava eso na ivakaraitaki ni “iwali vivinaka” e dodonu meda vakasaqara ni yaco vei keda na leqa? Na iwali cava soti e vakarautaka na kosipeli i Jisu Karisito?
Wasea na veimalanivosa oqo mai vei Peresitedi Thomas S. Monson: “Kemuni na ganequ lomani, e lomani kemuni na Tamamuni Vakalomalagi—o kemuni yadudua sara. Na loloma oqori e sega ni veiveisau. E sega ni vakavuna na kemu irairai, na veika o taukena, se na levu ni ilavo e tiko ena nomu akaude ni baqe. E sega ni na veisautaki ena nomu taledi kei na nomu rawaka. Ena dau tu ga. E tu vei kemuni ena gauna ni rarawa se marau, yalolailai se nuidei. Na loloma ni Kalou e tu me nomu kevaka mada ga o nanuma se sega, ni dodonu me nomu. Ena duadua tu ga” (“Eda Sega ni Lako Duadua Voli,” Ensign se Liaona, Nove. 2013,123–24). Sureti ira na goneyalewa me ra wasea na veika era sa sotava ka ra vakila kina na loloma ni Kalou ena dua na gauna ni dredre. Kerei ira yadua na goneyalewa me wilika e dua na ivolanikalou mai na idusidusi oqo ka wasea na iwalewale e rawa ni vukei kina e dua tale ka sotava tiko e dua na bolebole se leqa ka sa matau tu vei ira na itabagone edaidai. Na cava na ibalebale ni “vakararavi vua na Turaga” se lako mai vei Karisito ni da gadreva na veivuke? E tiko tale beka eso na ivolanikalou e rawa ni ra vakasamataka na goneyalewa ka na rawa ni veivuke ki na so na bolebole kei na leqa vakatabakidua?
Kerei ira na goneyalewa mera vakasamataka e dua era kila ka sotava tiko na leqa ni bolebole vaka-vakasama se na bolebole ni lomada. Solia yadua vei ira na goneyalewa na ilavelave ni vosa nei Elder Jeffrey R. Holland “Vaka na Bilo Kavoro.” Kerei ira me ra vaqara na isau ni nona taro “na sala vinaka duadua cava mo sotava kina ni yaco mai vei iko se o ira o daulomana na bolebole vaka-vakasama se na bolebole ni lomada?” Sureti ira na goneyalewa me ra wasea na veika era sa vulica ka veivosakitaka na ivakarau e rawa ni vukea kina na tamata era vakasamataka tiko na veivakavuvuli oqo.
Kerei ira na lewe ni kalasi me ra vakasamataka na bolebole se na leqa era sotava tiko. Tuva ena vava ni volavola na va na iyaya ni cakacaka a cavuta o Elder Richard G. Scott ena nona vosa “Vakaliuca mo Bulataka Nomu Vakabauta,” ka kerei ira na lewe ni kalasi me ra vulica me baleta e dua vei ira na iyaya ni cakacaka era nanuma ni rawa ni vukei ira ena nodra bolebole. Sureti ira me ra wasea na veika era vulica mai na ivakasala nei Elder Scott.

Kerei ira na goneyalewa me ra wasea na veika era sa vulica nikua. Era sa kila deivaki li na iwalewale ni kena qarai na iwali ki na bolebole eso ni bula ena kosipeli i Jisu Karisito? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Vulica na ivolanikalou ni vakasamataki tiko vakatabakidua e dua na taro se leqa. Vola ena ivolaniveisiga na veika e vakilai kei na isaunitaro mai vua na Yalotabu.
Digitaka e dua na ulutaga ena ivola lobi Me iSakisaki ni iTabagone era na vinakata mera vakavinakataka. Me tiko vei iko e dua na ivolaniveisiga ni nodra sasaga kei na rawaka ena macawa ka lako mai.

Wasea vata kei ira na goneyalewa na veika era na vulica tiko ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.