Te Biaano ibukin Prophet
Te karaki aei e nako man te tabo ae Greater Accra, Ghana.
Te teinimwaane ae arana Prophet iai uoua ana kouru ae kakawaki.
“Te katangitang bon te taetae ae a kona ni mataata iai aomata nako” (Aia Boki n Anene Ataei, iii).
Prophet e tatangira te katangitang. E rangi n tangira riki anenen te Moanrinan ao anene n Taromauri. E a nenene ni karaurau ibon iroun ni karokoa te bong. E iangoia n ana iango bwa e tekateka n te biaano, ni katanga kunana ae e mamate nanona iai. E iangoia naba bwa e reireiniia tabeman aron katangan te biaano.
Ma iai te kaangaanga ae ti teuana. Akea ana biaano.
N te bong teuana e karaoa ana intawiu Prophet ma ana bitiobi.
“Ko a tia ni katea am kouru n te burokuraem are ibukiia Ataei ao Kairake?” e titiraki te bitiobi.
“Eng,” e taku Prophet. “I tangiria n reirei katangan te biaano.”
“E tamaroa te kouru anne,” e taku ana bitiobi.
“Ao ngkana e koro nanon te kouru anne,” e taku Prophet, “ngkanne iai riki Au kouru teuana. “I tangiria n reireiniia 20 riki aomata aron katangana.”
“Uoua am kouru aika tamaroa,” e taku ana bitiobi.
“Ao iai au kangaanga,” e taku Prophet. “Akea au biaano.”
“E raoiroi, tia noria bwa tera ae ti kona ni karaoia.”
N tain te taromauri n te Tabati are imwiina, te bitiobi e tuanga Prophet bwa e a tia n kuneia mitinare aika taanga ake a kona n reireinna. A na uotii biaano aika uarerekea ibukina ao ibukiia tabeman bwa a na kataneiai iaona. A na reireiniia aomata aika mwaiti aron katangan te biaano.
E marooro te bitiobi ma aomata. E taetae Prophet nakoia aomata. Ana utu Prophet a taetae nakoia aomata. N tokina a bane kaain te uoote n taekina te reirei iaon te biaano. Ao aroia naba ake tabeman.
“A mwaiti raraou ake tiaki kain te aro ae a tangiria ni kan reirei,” Prophet e tuanga te bitiobi.
“Eng, a butimwaeaki,” e taku te bitiobi. “A na anganiko mitinare te boki ao ni buokiko n reiakin reirei. Ao imwiin reiakinam, ko kona ni buokiia n reiakiniia tabeman.”
“Aio bon au kauoua ni kouru!” E taku Prophet.
Tabeua te tai imwiina e a kakataneiai Prophet ma mitinare. E kukurei n reiakin aekan nako nanon taian nooti ao n ongo tangiia ngkana a karinanaki ni karaoa te anene. Uoman raoraona ma te aro, Kelvin ao Alexander, a reirei naba. Imwiin teuana te namakaina, ataeinimwaane ake teniman a moana te anga reirei naba.
Ni katoa bong, ataeinimwaane aika a anga reirei iaon te katangitang n ana kateitei te Ekaretia. Ni moan waakina iai 10 atein te reirei, imwiina 20 ao imwiina riki 50!
“E kakukurei aio!” E taku Kelvin n te taina imwiin te kiraati.
“I taku bwa Tama ae i Karawa e kukurei ibukina bwa ti buokiia tabeman n reireiniia,” e taku Alexander.
E katoutoua atuna Prophet. Ana kouru e a kaman tia bwa e na buokiia aika mwaiti.
Ma teuana riki te bwai ae e karika kukurein Prophet. Ngkai ataei ake tabeman a kataneiai n anenean kunan te Moanrinan, a reiakina naba taekan Tamara ae i Karawa. Tabeman a titirakina Prophet ngkana a kona n reiakina riki taekan te Ekaretia.
Ao ni koauana, tabeman aomata ake a tibwa reiakina taekan te Ekaretia ibukin te reirei n te biaano n tokina a bwabetitoaki.
“Ngkai n tain taian bootaki,” e taku Prophet, “ti bane ni reitaki n anenei kuuna ake ti tangiri.”
Kamataata n te tamnei iroun Violet Lemay