Nakoia Rao aika Tangiraki,
N te ririki aio Tabatin te Banii e bwakara te kabanea n Tabati inanon Maati. Anne ngke ti bukamarua te bong are e rin iai Iesu i Ierutarem iaon te aati. A katiotioi bani ni kai aomata ao a takarua “Otanna!” Tabeua te bong imwiina, Iesu e korakai ao e mate ibukira. Imwiina E a mangauti! Ara kantaninga bwa ko na kukurei n te tai ae onoti aei n uringnga bwa tera ae a tia ni karaoia Tamara are i Karawa ao Iesu Kristo ibukira (taraa Ioane 3:16). Bon mai Irouia, ae ngaia ae ti kona ni manga maiu imwin matera!
Ma te Tangira,
Te Rao
P.S. Mwaitira te iteraniba iaon Iesu ae ko kona ni kunea n te beeba ni kaongora aei?
Karika ae Bon Am Bwai
I reiakinna bwa e kanga Nibwaai ni karaoa te booti (Beberuare 2020), bwa I aonga ni karaoa aron anne bwa N na mataata n te bwai are e namakinna Nibwaai. E kangaanga n te moan tai, ma I reiakinna bwa N na aki bwaranano ao n onimakina te Uea n aron are e karaoia Nibwaai.
Ian D., ana ririki 9, Veracruz, Mexico
Te Tabo Raa ae Ti Wareka iai te Rao
Ti tangiria ni wareka te Rao! E buokiira n namakina ae ti aki tiku n ti ngaira ibukina bwa bon ti ngaira kaain te Ekaretia n ara kawa. Ti warekia n te taetae n Tiaman ao n Dutch ibukina bwa tinara e roko mai Netherlands ao tamara mai Tiaman.
Lars ao Torben S., aia ririki 5 ao 3, Lower Saxony, Tiaman
Ti Tangiria ni Kan Noora te Tembora
Ti maeka irarikin te Barranquilla Colombia Tembora ao ti aki toki n nanakoiai ni katoa uoua te wiiki. E buokiira n ururinga te berita ae tabu are ti karaoia ma Tamara are i Karawa.
Te Moanrinan n te Mwaanga i Puerto Colombia, Colombia